ምስላታት 1 - መፅሓፍ ቅዱስ

ጥቕሚ ምስላታት

¹ ምስላታት ሰሎሞን ወዲ ዳዊት ንጉስ እስራኤል፦

² ጥበብን ምኽርን ንምፍላጥ፥ ናይ ፍልጠት ቃላት ንምስትውዓል፥

³ ዘለብም ምዕዳንን ሓቅን፥ ፍትሕን ቅንዕናን ንምቕባል፥

⁴ ንገርህታት ጥበብ ዝህብ፥ ንመንእሰያት ድማ ፍልጠትን ጥንቃቐን ዝህብ እዩ።

⁵ ጠቢብ ነዚኣተን ብምስማዕ፥ ፍልጠት ይውስኽ፤ ለባም ከዓ ፅቡቕ ምኽሪ የጥሪ።

⁶ በዙይ ከዓ ንሳቶም ንምስላን፥ ትርጉምን፥ ንዘረባ ጠቢባንን ዓሚቝ ሓሳባቶምን፥ ከስተውዕልዎ ይኽእሉ።

ምኽሪ ንመንእሰይ

⁷ ንእግዚኣብሄር ምፍራሕ፥ ናይ ጥበብ መጀመርታ እዩ፤ ሰነፋት ግና ንጥበብን ንተግሳፅን ይንዕቕዎ።

⁸ ወደይ፥ ንምዕዳን ኣቦኻ ስምዓዮ፤ ንትምህርቲ ወላዲትካ ድማ ኣይትሕደጎ።

⁹ እዙይ ንርእስኻ ኣኽሊል፥ ንኽሳድካ ኸዓ ድሪ እዩ።

¹⁰ ወደይ፥ ሓጥኣን እንተ ሓባበሉኻ፥ ሕራይ ኣይትበሎም።

¹¹ ንሳቶም፦ “ምሳና ነዓ፤ ኣድቢና ደም ነፍስስ፤ ንንፁህውን ብዘይ ምኽንያት፥ መፃወድያ ነፃውደሉ እንተ በሉ፥

¹² “ናብ ጕድጓድ ከም ዝወርዱውን፥ ብህይወቶም እንተለዉ፥ ከም ሲኦል ኴንና ንውሓጦም፤

¹³ “ክቡር ዝኾነ ዅሉ ኽንረክብ፥ ነአባይትና ኸዓ በቲ ዝዘመትናዮ ኽንመልኦ ኢና፥

¹⁴ “ነዓ፥ ዕፃኻ ምሳና ኣውድቕ፤ ናይ ኵልና ኸረጢት፥ ሓደ ይኹን እንተ በሉኻ”

¹⁵ ወደይ፥ ምስ ከምዚኣቶም ዝበሉ፥ መንገዲ ኣይትኺድ፤ ካብኣቶም ረሓቕ፤

¹⁶ ንሳቶም ክፉእ ንምግባር ይጐዩ፤ ኣእጋሮም ከዓ ደም ንምፍሳስ፥ ቅልጡፋት እየን።

¹⁷ ኣብ ቅድሚ ኣዒንቲ ዅለን እተን ኣኽናፍ ዘለወን ኣዕዋፍ፥ መፈንጠር ብኸንቱ ኣይፃወድን እዩሞ።

¹⁸ ንሳቶም ኣብ ልዕሊ ደሞም የድብዩ፤ ኣብ ልዕሊ ነፍሶምውን የሻርዉ።

¹⁹ ኵሉ መንገዲ ህሩፍ ከምዙይ እዩ፤ ንነፍሲ ዋናኡ የጥፍኣ።

ጥበብ ትዛረብ

²⁰ ጥበብ ኣብ ጐደናታት ትፅውዕ፤ ኣብ ኣደባባያት ድምፃ ዓው ኣቢላ ተስምዕ።

²¹ ህዝቢ ኣብ ዘለዎ ጐደና ትፃዋዕ፤ ኣብ ኣፍ ደገታት እታ ኸተማ ኸዓ ቓላ ተስምዕ፤

²² “ኣቱም ዓያሹ፥ ክሳዕ መኣዝ ኢኹም ዕሽነት እትፈትዉ? መላገፅቲኸ ክሳዕ መኣዝ እዩ ላግፂ? ሰነፋትከ ኽሳዕ መኣዝ እዮም ፍልጠት ዝፀልኡ?”

²³ ናብ ተግሳፀይ ተመለሱ፤ እንሆ መንፈሰይ ከፍስሰልኩም፥ ቃላተይ ከፍልጠኩም እየ።

²⁴ ክፅውዐኩም እንተለኹ እምቢ ስለ ዝበልኩም፥ ኢደይ ዘርጊሐውን ዘስተብሃለ ስለ ዘየለ፥

²⁵ ንዅሉ ምኽረይ ሸለል ስለ ዝበልኩም፥ ንተግሳፀይ ኣይተቐበልኩምዎን።

^26-27 ኣነውን፥ እቲ እትፈርሕዎ ኽመፅእ እንተሎ፥ እቲ እትፈርሕዎ ኸም ኣውሎ ንፋስ ክመፅእ፥ መከራ ኸም መሸምቦባ ኾይኑ ኽበፅሐኩም፥ ፀበባን ጭንቀትን ክወርደኩም እንተሎ፥ ብመከራኹም ክስሕቕን ከባጭወልኩምን እየ።

²⁸ ሽዑ ናባይ ክትምህለሉ ኢኹም፤ ኣነ ግና ኣይምልሰልኩምን እየ፤ ኣንጊህኹም ክትደልዩኒ ኢኹም፤ ግና ኣይትረኽቡንን፥

²⁹ ፍልጠት ስለ ዝፀላእኹም፥ ፍርሓት እግዚኣብሄር ስለ ዘይመረፅኩም፥

³⁰ ንምኽረይ ስለ ዘይፈተኹምዎን፥ ንተግሳፀይውን ስለ ዝነዓቕኩምዎ፥

³¹ ፍረ መንገድኹም ክትበልዑ፥ ካብ ምኽርኹምውን ክትፀግቡ ኢኹም።

³² ነቶም ዓያሹ፥ ካብ ጥበብ ምርሓቕ ክቐትሎም እዩ፤ ነቶም ደናቝር ከዓ፥ እቲ ሸለልትነቶም ከጥፍኦም እዩ።

³³ እቲ ዝሰምዐኒ ግና ብደሓን ይነብር፤ ንኽፉእ እንተይፈርሐ ድማ፥ ብዘይ ስግኣት ክነብር እዩ።