मरकुस 7 - बुक्सारीति-रिबाजौ कै माननै को सबाल ( मत्ती 15:1–9 ) 1 एक दिन फरीसी दल के और कुछ सास्तरी लोग जो ऐरूसलेम सैहर सै आए हे, ईसु के धौंरे इखट्टे भए। 2 उनौनै देखो कै उसके कुछ चेला बिना हात धोए रोटी खा रए हैं। 3 कैसेकै फरीसी दल के और सब यहूदी, पुरखौं की रीति-रिबाजौ मै चलै हैं और जब तक सई सै हात ना धो लैं तब तक रोटी ना खावै हैं। 4 और जब बे बजार सै आवै हैं, जब तक बे मौह हात ना धो लेते, तब तक कुछ बी ना खावै हैं। और ऐंसी भौत सी और परम्परा बी उनकै माननै कै मिली हैं, जैसे कटोरौं, और लोटौं, और काँसी के बरतनौ कै माँजनो, और धोनो। 5 इसताँई फरीसिऔं और सास्तरिऔं नै ईसु सै पूँछी, “तेरे चेला पुरखौं के रीति-रिबाजौ के हिसाब सै काए ना चलते? बे काए बिना मौह हात धोए रोटी खावै हैं।” 6 तब ईसु नै उनसै कैई, “तुम कपटिऔ के बारे मै यसाया नै ठीक भबिसबानी करी है, जैसो कै लिखो है कै, ‘जे लोग ओठौं सै तौ मेरो आदर करै हैं, पर उनको मन मैंसै दूर रैहबै है। 7 और जे बेकार मै मेरी पिराथना करै हैं, और जे जो सिकाबैं हैं, कैसेकै बे तौ सिरप लोगौ के दुआरा बनाए भए नियम है।’ 8 कैसेकै तुम बी परमेसर के हुकम कै टालकै लोगौ के रीति-रिबाजौ कै मानौ हौ।” 9 ईसु नै उनसै कैई, “तुम लोग अपने रीति-रिबाजौ कै माननै के ताँई परमेसर के हुकम कै कैसे अच्छी तरै टाल देवौ हौ। 10 कैसेकै मूसा नै कैई है कै अपने अब्बा और अपनी अईया को आदर कर, और जो कोई अब्बा या अईया कै सराप देए, बौ जरूर मार डारो जाय। 11 पर तुम कैबौ हौ कै अगर कोई अपने अईया सै कैए, कै मेरी जिन किसी चीजौ सै तुमकै फाएदा मिल सकै हो, बौ ‘कुरबान’ (मतलब परमेसर कै भेंट कर दंई हैं) 12 तौ तुम उसकै अब्बा या उसकी अईया की कुछ सेवा ना करन देते। 13 इस तरै तुम अपनी रीति-रिबाजौ सै जो तुमनै बनाए हैं, और परमेसर को बचन टाल देवौ हौ, और इस तरै के और बी भौत से काम करते रैहबौ हौ।” आदमिऔ कै सुद्द और असुद्द कन्नै बारी बात ( मत्ती 15:10–20 ) 14 फिर ईसु नै लोगौ कै अपने धौंरे बुलाकै उनसै कैई, “तुम सब मेरी सुनौ और समजौ। 15 ऐंसी तौ कोई चीज ना है जो बाहार सै आकै आदमिऔ कै असुद्द करै, पर जो चीज आदमिऔ के भीतर सै लिकरै है, बौई बाकै असुद्द करै है। 16 जिसके सुन्नै के कान हौं बौ सुन ले और समज ले।” 17 जब ईसु लोगौ कै छोड़कै घर आ गओ, तौ बाके चेलौ नै बासै पूँछी “गुरू, इस दासतान को अरथ का है?” 18 ईसु नै कैई, “का तुम लोग बी इतने नासमज हौ? कै जो चीज बाहार सै आदमिऔ के भीतर जावै है, बौ उसकै असुद्द ना कर सकै है? 19 कैसेकै बौ उसके मन मै ना, पर पेट मै जावै है और हगनै मै बाहार लिकर जावै है।” जौ कैह कै बानै खानै की सबई चीज सुद्द ठैरांई। 20 ईसु नै फिर कैई, “जो आदमी के भीतर सै लिकरै है, बौई आदमिऔ कै असुद्द करै है। 21 कैसेकै भीतर सै मतलब आदमी के मन सै बुरे बिचार, लौंड़ियाबाजी, चोरी, कतल, 22 पराई बईयर के संग गलत काम, लालच, छल-कपट, दुसटता, लुचपन, गलत नजर, चुगलखोरी, ऐहंकार, और मूरखता लिकरै है। 23 जे सब बुरी बात भीतर सैई लिकरै हैं और आदमी कै असुद्द करै हैं।” गैर यहूदी बईयर को बिसवास ( मत्ती 15:21–28 ) 24 फिर ईसु बहाँ सै उठकै चलते चलते सूर और सैदा मुलक मै जाकै एक घर मै गओ, और बौ चाँहै हो कै “किसी कै जाको पतो ना चलै,” पर बौ छिप ना सको। 25 और ऐंसो भओ कै एक गैर यहूदी बईयर ईसु की चरचा सुनकै तुरन्त आई और ईसु के पाँऐ मै गिर पड़ी, कैसेकै उसकी छोटी लौंड़िया मै दुसट आत्मा ही। 26 जौ यूनानी ही और सीरिया के फिनीकी मै पैदा भई ही, और उसनै ईसु सै बिनती करी कै, “हे गुरू, मेरी लौंड़िया सै दुसट आत्मा लिकार दे।” 27 ईसु नै उस्सै कैई, “पैले बालकौ कै रज जान दो, कैसेकै बालकौ की रोटी लेकै कुत्तौ के अग्गे डान्नो ठीक ना है।” 28 फिर बी उस बईयर नै उसकै जबाब दओ कै, “सच है परभु, तौबी कुत्ता बी तौ मेज के नीचे बालकौ की रोटी के जुठन कै खा लेबै हैं।” 29 फिर ईसु नै उस्सै कैई, “इस बात के कारन चली जा, दुसट आत्मा तेरी लौंड़िया मै सै लिकर गई है।” 30 फिर उसनै अपने घर आकै देखो कै लौंड़िया खटिया मै आराम सै लेटी पड़ी है, और दुसट आत्मा लिकर गई है। ईसु मसी दुआरा बैहरे, गूँगे कै ठीक कन्नो 31 फिर ईसु सूर सै लिकरते भए सैदा होकै दिकापुलुस मुलक सै होतो भओ गलील के झील के धौंरे बापस पौंचो। 32 तब लोगौ नै एक बैहरे कै जो हकलाबै बी हो, उसके धौंरे लाकै उस्सै बिनती करी, कै ईसु अपनो हात उसमै रख दे। 33 तब ईसु उसकै भीड़ सै अगल ले गओ, और अपनी उंगरिआ उसके कानौ मै डारी, और उसकी जीब मै अपनो थूक लगाओ। 34 फिर सुरग की ओर ऊपर देखकै गैहरी साँस भरते भए उस्सै अपनी बोली मै कैई, “इप्फतह” मतलब खुल जा। 35 और तुरन्त उसके कान खुल गए, और उसकी जीब की गाँठ बी खुल गई, और बौ साप-साप बोलल लगो। 36 ईसु नै लोगौ कै आदेस दओ कै, “जौ बात किसी सै ना कैईयो,” पर बौ जितनो मनैह करै हो, लोग उतनोई जाको परचार करै हे। 37 और बे भौतई अचम्बे मै होकै कैललगे, उसनै जो कुछ करो है बौ सब अच्छो करो है, बौ बैहरौं कै सुन्नै की और गूँगौ कै बोलनै की सकति देवै है। |
New Life Compute Institute [NLCI] - CC BY-NC-ND 4.0