मरकुस 11 - बुक्सा

ऐरूसलेम मै ईसु को राजा के हाँई सुआगत

¹ जब ईसु और चेला ऐरूसलेम के धौंरे जैतून नाम पहाड़ मै बैतफगे और बैतनिया गाम के धौंरे आए, तौ ईसु नै अपने दो चेला जौ कैते भए भेजे

² कै, “अपने सामने के गाम मै जाऔ, और उसमै पौंचतेई एक जमान गधा जिसमै कबी कोई ना चढ़ो है, तुमकै बंधो भओ मिलैगो, उसकै खोलकै हिंया ले आऔ।

³ अगर कोई तुमसै कुछ कैए जौ का कर रए हौ? तौ कै देईओ, परभु कै इसकी जरूरत है, और बौ जल्दी उसकै हिंया भेज देगो।”

⁴ चेलौ नै जाकै उस जमान गधा कै गली मै एक मकान के मौहड़े के धौंरे बंधो भओ देखो, और उसकै खोलल लगे।

⁵ और कुछ आदमिऔ नै, जो बहाँ खड़े हे, उनसै पूँछी, “इस जमान गधा कै खोलकै तुम का कर रए हौ?”

⁶ चेलौ नै उनसै बौई कैओ जो ईसु नै बताओ हो, तब उनौनै बे जान दए।

⁷ फिर बे उस जमान गधा कै ईसु के धौंरे लाए, और चेलौ नै उसके ऊपर अपने लत्‍ता बिछा दए, फिर ईसु उसमै बैठ गओ।

⁸ तब ईसु के सुआगत के ताँई भौतौं नै अपने लत्‍ता रस्ता मै बिछा दए, कुछ लोगौ नै खेतौ सै हरे-भरे डुग्गे काटकै फैला दए।

⁹ ईसु के अग्गे-अग्गे जानै बारे और पीछे-पीछे आनै बारे लोग जौ नारो लगा रए हे, “परभु की जै जैकार हो, धन्‍न है बौ जो परभु के नाम सै आ रओ है।

¹⁰ धन्‍न है हमरे पुरखा दाऊद को आनै बारो राज, सुरग मै परभु की जै जैकार हो।”

¹¹ और ईसु ऐरूसलेम पौंच कै मन्‍दर मै आओ, और बहाँ सब कुछ अच्‍छी तरै देखकै बौ अपने बारैह चेलौ के संग बैतनिया गाम चलो गओ, कैसेकै साँज हो गई ही।

बिना फल को अंजीर को पेड़

¹² अगले दिन जब बे बैतनिया सै आ रए हे, तौ ईसु कै भूँक लगी।

¹³ थोड़ी दूर उसकै अंजीर को एक हरो भरो पेड़ दिखाई पड़ो, जौ देखनै के ताँई बौ पेड़ के धौंरे पौंचो कै सायद उसकै कुछ फल मिल जाँय, पर जब बौ बहाँ पौंचो तौ उसकै पत्‍तौ के सिबा कुछ ना मिलो, कैसेकै फल को मौसम ना हो।

¹⁴ तब ईसु नै पेड़ सै कैई, अब सै कोई तेरो फल कबी ना खाय। और उसके चेला सुन रए हे।

ईसु दुआरा मन्‍दर मै सै ब्यापारिऔ कै लिकान्‍नो

¹⁵ फिर बे ऐरूसलेम मै आए, और बौ मन्‍दर मै गओ, तौ ईसु नै बे लोग जो मन्‍दर मै बेचनै और खरीदनै बारे हे, उनकै बाहार लिकान्‍नो सुरू कर दओ। बानै पैसौ को लेन-देन कन्‍नै बारौ की मेज उलट दंई और कबूतर बेचनै बारौ के तख्‍ता पलट दए।

¹⁶ और ईसु नै मन्‍दर मै सै होकै किसी कै बी कुछ लेकै आनै जानै ना दओ।

¹⁷ फिर बानै सिकाते भए उनसै कैई, “पबित्‍तर सास्तरौं मै लिखो है, ‘मेरो घर सब जाति के लोगौ के ताँई पिराथना को घर कैलागो?’ पर तुम लोगौ नै जौ डाँकुऔं को अड्‍डा बना दओ है।”

¹⁸ जब मुक्‍ख पुजारिऔं और सास्तरिऔं नै जौ बात सुनी तौ बे ईसु कै मार डान्‍नै को मौको ढूंड़नै लगे। पर बे डरै हे, कैसेकै भीड़ के सबई लोग उसके उपदेस सै अचम्बे मै हे।

¹⁹ फिर जब साँज भई, तौ ईसु और उसके चेला सैहर सै बाहार चले गए।

बिसवास की सकति

²⁰ अगले दिन सुबे जब ईसु अपने चेलौ के संग जा रओ हो तौ उनौनै देखो कै बौ अंजीर को पेड़ जड़ सै सूक गओ है।

²¹ तब पतरस कै बौ बात याद आई, और उसनै उस्सै कैई, हे गुरू, देख, जौ अंजीर को पेड़ जिसकै तैनै सराप दओ हो सूक गओ है।

²² ईसु नै उनकै जबाब दओ कै, “परमेसर मै बिसवास रक्‍खौ।

²³ मैं तुम लोगौ सै सच कैए रओ हौं कै जो कोई इस पहाड़ सै कैए, कै तू उखड़ जा, और समन्‍दर मै जा गिर, और मन मै सक ना करै, पर जौ बिसवास करै कै मैं जौ कैरओ हौं पूरो होगो, तौ उसके ताँई बैसोई हो जागो।

²⁴ इसताँई मैं तुमसै कैए रओ हौं तुम जो कुछ पिराथना मै माँगौ हौ, बिसवास करौ कै बौ तुमकै मिल गओ है और बौ तुमकै देओ जागो।

²⁵ जब तुम खड़े होकै पिराथना करौ हौ और तुमकै किसी सै कोई सिकात है, तौ उसकै माफ कर दो, जिस्सै तुमरो सुरग को अब्बा बी तुमरी गलतिऔं कै माफ करै।

²⁶ और अगर तुम माफ ना करौ तौ तुमरो अब्बा बी जौ सुरग मै है, तुमरी गलतिऔं कै माफ ना करैगो।”

ईसु के अधकार मै यहूदी नेताऔं को सक

²⁷ फिर ईसु और चेला ऐरूसलेम मै लौहट आए। ईसु जब मन्‍दर मै टैहल रओ हो तौ बड़े पुजारी और सास्तरी और बुजरग यहूदी नेता उसके धौंरे आए।

²⁸ और बोले, “तू इन कामौ कै किस अधकार सै करै है? इनकै कन्‍नै को अधकार तेकै किन्‍नै दओ है?”

²⁹ ईसु नै उनसै कैई, “मैं तुमसै एक सबाल पूँछौ हौं, अगर तुम मैंकै जाको जबाब दोगे, तौ मैं बी तुमकै बता दंगो कै मैं जौ काम किस अधकार सै कर रओ हौं।”

³⁰ जो जल संस्कार यहून्‍ना देए करै हो, बौ परमेसर की ओर सै मिलो हो या आदमिऔ सै? मैंकै जबाब दो।

³¹ बे ईसु के सबाल मै जौ कैते भए आपस मै बिचार करल लगे, “अगर हम जौ कैबै हैं, बौ उसकै परमेसर की ओर सै मिलो हो, तौ जौ कैगो, तौ तुमनै उसको बिसवास काए ना करो?

³² अगर हम कैंऐ, ‘बौ आदमिऔ सै मिलो हो,’” तौ बे जनता सै डरै हे, कैसेकै यहून्‍ना कै सब लोग परमेसर को सन्‍देसो दैनै बारो मानै हे।

³³ तब ऐंसो सोचनै के बाद उनौनै ईसु कै जबाब दओ कै, “हम ना जानै हैं।” ईसु नै उनसै कैई, “मैं बी तुमकै ना बतातो, कै मैं बी जौ काम किस अधकार सै कर रओ हौं।”