याकूब 1 - बुक्सा1 उन बारैह गोतौं कै जो अगल अगल देसौ मै रैहबैं हैं नमस्कार, मैं परमेसर को और परभु ईसु मसी को सेवक याकूब जौ चिट्ठी लिख रओ हौं। बिसवास और समज 2 हे मेरे भईयौ, जब तुम तरै-तरै की मुसीबतौं मै पड़ौ तौ जाकै बड़ी खुसी की बात समजौ। 3 कैसेकै तुम जानौ हौ कै तुमरे बिसवास कै परखनै सै सबर पैदा होवै है। 4 पर सबर कै अपनो पूरो काम करन दो कै तुम पूरे और पक्के हो जाऔ और तुम्मै किसी बात की कमी ना रैह। 5 अगर तुम्मै सै किसी मै समज की कमी होए, तौ परमेसर सै माँगै, कैसेकै बौ सबई कै बिना डाँटे दिल खोलकै देवै है। 6 पर बौ बिसवास सै माँगै, और कुछ बी सक ना करै; कैसेकै जो सक करै है बौ समन्दर की लहरौं के हाँई है जो हवा सै उठै और इतै-उतै जावै है। 7 ऐंसो आदमी जौ ना समजै, कै बाकै परभु की ओर सै कुछ मिलैगो। 8 कैसेकै ऐंसो आदमी दो सोच बारो है, और बौ सिगरी बातौं मै डामाडोल रैहबै है। गरीब और सेट 9 जिस बिसवासी आदमी कै लोग निकम्मो समजै हैं बाकै जा बात मै गर्ब होनो चँईऐ कै परमेसर नै बाकै ऊँचो औहदा दओ है। 10 और सेट आदमी अपनी कमी घटी मै गर्ब करै; कैसेकै बौ घाँस के फूल के जैसे नास हो जागो। 11 कैसेकै जब सूरज लिकरै है तौ चटक्को घाम आवै है, तौ बौ घाँस कै सुका देवै है और बाको फूल झड़ जावै है और बाकी चमक खतम होती जावै है; बैसेई सेट आदमी बी अपने कामकाज कै करतो करतो मट्टी मै मिल जागो। परख और लालच 12 धन्न है बौ आदमी, जो परख मै खरो लिकरै है, कैसेकै बौ खरो लिकरकै जिन्दगी को बौ मुकट पागो, जिसको बादो परमेसर नै अपने पियार कन्नै बारौ सै करो है। 13 किसी बी आदमी कै अगर पाप को लालच आय तौ बौ जौ ना कैए कै परमेसर मैंकै पाप को लालच देवै है। कैसेकै कोई बी परमेसर कै बुरी बातौं सै ना परख सकै है और नाई परमेसर किसी कै बुरी बातौं सै परखै है। 14 पर हर आदमी अपनी बुरी इच्छा मै खिच कै और फसकै पाप के लालच मै पड़ जावै है। 15 फिर जब बौ बुरी इच्छा गरबबती होवै है, तौ बौ पाप कै जलम देवै है, और जब पाप पूरो बढ़ जावै है, तौ बौ मौत कै जलम देवै है। 16 हे मेरे पियारे भईयौ, धोको ना खाऔ। 17 कैसेकै सबई अच्छे और पक्के बरदान ऊपर सै हैं, और जे सबई उज्जेरे के अब्बा की ओर सै नीचे आबै हैं, और छाँई तौ बदल जावै है पर बौ कबी ना बदलै है। 18 परमेसर नै अपनी मरजी सै हमकै सच्चाई के बचन सै पैदा करो है, जिस्सै कै हम बाकी बनाई भई चीजौ मै सै पैलो फल बनै। सुन्नो और कन्नो 19 हे मेरे पियारे भईयौ, जौ बात कै तुम जानलो कै हर एक आदमी सुन्नै के ताँई तईयार रैह और बोलनै मै जल्दबाजी ना करै, और नाई जल्दी सै घुस्सा करै। 20 कैसेकै आदमी के घुस्सा की बजै सै जो परमेसर की नजरौ मै सई है बौ ना हो सकै है। 21 इसताँई सिगरो मैलोपन और जो बुराई फैली हैं बाकै दूर करकै, बा बचन कै अपनाऔ जो तुमरे दिल मै बोओ गओ है और जो तुमरे पिरान कै बचा सकै है। 22 परमेसर के बचन मै चलनै बारे बनौ, ना कै सिरप सुन्नै बारे। अगर तुम बाकै सिरप सुनौई हौ तौ अपने आपकै धोको देवौ हौ। 23 कैसेकै जो कोई बचन कै सिरप सुनैई है, पर बाके ऊपर चलै ना है, तौ बौ बा आदमी के हाँई है, जो अपनो मौह दरपन मै देखै है। 24 बौ खुद कै देक्कै चलो जावै, और तुरन्त भूल जावै है कै मैं कैसो हो। 25 पर परमेसर के नियम सिद्द हैं जो हमकै आजादी देवै हैं, अगर कोई आदमी उन बचनौ के ऊपर धियान देवै है और उनकै सुनकै ना भूलै है, पर उन बचनौ के हिसाब सै चलै है तौ बौ परमेसर सै अपने कामौ मै आसीस पागो। 26 अगर कोई आदमी खुद कै धरमी समजै है, पर अपनी जबान मै लगाम ना लगाबै है, तौ बौ खुद कै धोको देवै है और बाकी भक्ति बेकार है। 27 हमरे परम पिता परमेसर की नजरौ मै सुद्द और बिना दोस की भक्ति जौ है, कै मुसीबतौं मै पड़े अनाथौं और राँड़ौ की सायता करौ, और दुनिया के कलंक सै खुद कै बचाए रक्खौ। |
New Life Compute Institute [NLCI] - CC BY-NC-ND 4.0