1 यहून्ना 2 - बुक्साईसु हमरी सायता कन्नै बारो 1 हे मेरे बालकौ, जे बात मैं तुमकै इसताँई लिख रओ हौं कै तुम पाप ना करौ। पर अगर कोई पाप करै है, तौ परमेसर के धौंरे हमरी ओर सै एक बोलनै बारो है, और बौ है धरमी ईसु मसी। 2 बौ खुद हमरे पापौं कै दूर कन्नै बारो बलिदान है, पर ना सिरप हमरे पापौं के ताँई, पर सिगरी दुनिया के पापौं के ताँई बी। 3 अगर हम परमेसर की आगियाँऔ कै मानंगे, तौ हमकै जौ पतो लग जागो कै हम बाकै जान गए हैं। 4 जो कोई आदमी कैबै है कै, “मैं परमेसर कै जानौ हौं,” पर बाकी आगियाँऔ कै ना मानै है, तौ बौ झूँटो है, और बामै सच्चाई ना है। 5 पर जो कोई आदमी परमेसर के बचन कै मानै है, बामै सचमुच परमेसर को पियार सिद्द भओ है, तौ हमकै इस्सै पतो लगै है, कै हम परमेसर मै बने भए हैं। 6 जो ऐंसो कैबै है कै मैं परमेसर मै बनो रैहबौं हौं, तौ बाकै बैसीई जिन्दगी जीनी चँईऐ जैसी ईसु मसी नै जीई। नई आगियाँ 7 पियारे भईयौ, मैं तुमकै कोई नई आगियाँ ना लिख रओ हौं, जौ बौई पुरानी आगियाँ है, जो सुरू सै तुमकै मिली है। जौ पुरानी आगियाँ को बचन है, जिसकै तुम सुन चुके हौ। 8 फिर बी मैं तुमकै एक और नई आगियाँ लिख रओ हौं, और जो तुम्मै और मसी मै सच है। कैसेकै इन्धेरो खतम करो जा रओ है और सच्चाई की जोती अबी चमक रई है। 9 जो कोई कैबै है कै मैं जोती मै हौं, और अपने भईया सै नफरत करै है, तौ बौ अब तक इन्धेरे मै है। 10 जो कोई अपने भईया सै पियार करै है, बौ जोती मै रैहबै है, और बाकी जिन्दगी मै ऐंसो कुछ बी ना है, जिस्सै कै बौ ठोकर ना खाऐ। 11 पर जो अपने भईया सै नफरत करै है, बौ इन्धेरे मै है और इन्धेरे मै चलै है। बौ जौ ना जानै है कै बौ कहाँ जा रओ है, कैसेकै इन्धेरे नै बौ अन्धो बना दओ है। 12 पियारे बालकौ, मैं तुमकै इसताँई लिख रओ हौं, कैसेकै तुमरे पाप ईसु मसी के नाम की बजै सै माफ भए हैं। 13 हे अब्बाऔं, मैं तुमकै इसताँई लिख रओ हौं, कैसेकै तुम ईसु मसी कै जानौ हौ, जो सुरू सैई है। हे जमानौ, मैं तुमकै इसताँई लिख रओ हौं, कैसेकै तुमनै बा दुसट के ऊपर जीत पाई है। 14 पियारे बालकौ मैंनै तुमकै इसताँई लिखो हो, कै तुम पिता परमेसर कै जान गए हौ। हे अब्बाऔं, मैंनै तुमकै इसताँई लिखो हो, कैसेकै तुम ईसु मसी कै जान गए हौ, जो सुरू सैई है। हे जमानौ, मैंनै तुमकै इसताँई लिखो हो, कैसेकै तुम सकतिसाली हौ, और तुम्मै परमेसर को बचन बनो रैहबै है, और तुमनै बा दुसट के ऊपर जीत पा लई है। दुनिया सै पियार ना करौ 15 तुम ना तौ दुनिया सै और ना दुनिया की चीजौ सै पियार करौ, अगर कोई दुनिया सै पियार करै है, तौ बामै पिता परमेसर को पियार ना है। 16 कैसेकै जा दुनिया की हर एक चीज अब्बा की ओर सै ना पर दुनिया की ओर सै है मतलब सरीर की बुरी इच्छा, आँखौं की बुरी इच्छा, और दौलत को घमंड। 17 दुनिया और बाकी बुरी इच्छा दौनौ खतम करी जा रईं हैं, पर जो परमेसर की इच्छा मै चलै है, बौ अमर हो जावै है। मसी के बिरोदी 18 हे बालकौ, जौ आखरी घड़ी है, और जैसो कै तुमनै सुनो है कै मसी बिरोदी आ रओ है। और अब बी भौस्से मसी बिरोदी आ चुके हैं, इस्सै हम जानै हैं कै आखरी घड़ी आ गई है। 19 बे मसी बिरोदी हमरे बीच मैई सै लिकरकै गए हैं, कैसेकै बे हमरे अपने ना हे, अगर बे हमरे अपने होते, तौ बे हमरेई संग रैहते। पर बे चले गए, जिस्सै जौ साप-साप पतो लगै है, कै उनमै सै कोई बी हमरो अपनो ना हो। 20 तुम लोगौ कै तौ पबित्तर आत्मा सै अबीसेक मिलो है और तुम सबई लोग सच्चाई जानौ हौ। 21 मैं तुम लोगौ कै इसताँई ना लिखौ हौं कै तुम सच्चाई ना जानौ हौ बलकन इसताँई कै तुम सच्चाई जानौ हौ कैसेकै कोई बी झूँट सच्चाई की ओर सै ना आवै है। 22 पर जो कोई ईसु कै मसी ना मानै है, बौ झूँटो है। ऐंसो आदमी मसी बिरोदी है, बौ तौ पिता परमेसर और लौंड़ा ईसु मसी कै ना मानै है। 23 जो कोई लौंड़ा कै ना मानै है, बाके धौंरे अब्बा बी ना है, पर जो कोई लौंड़ा कै मानै है, बाके धौंरे अब्बा है। 24 जो सिक्छा तुम लोगौ नै सुरू सै सुनी, बौ तुम्मै बनी रैह। जो सिक्छा तुम लोगौ नै सुरू सै सुनी, अगर बौ तुम्मै बनी रैहगी, तौ तुम बी परम पिता परमेसर और बाके लौंड़ा मै बने रैहओगे। 25 बानै हमकै हमेसा की जिन्दगी दैनै को बादो करो है। 26 मैंनै जे बात तुमकै उन लोगौ के बारे मै लिखी हैं, जो तुमकै भटकानो चाँहै हैं। 27 तुम लोगौ कै मसी सै जो पबित्तर आत्मा मिली है, बौ तुम्मै बनी रैहबै है। इसताँई तुमकै किसी दूसरे गुरू की जरूरत ना है। बौ तुमकै सब कुछ सिकाबै है और बाकी सिक्छा सच्ची है, झूँटी ना है। तुम बा सिक्छा के हिसाब सै मसी मै बने रौह। 28 इसताँई बालकौ, अब तुम मसी मै बने रौह, जिस्सै कै जब बौ दुबारा आगो, तौ हम्मै हिम्मत होए और जब बौ आगो तौ बाके सामने हमरी बेजती ना होए। 29 अगर तुम जौ जानौ हौ कै बौ धरमी है तौ तुम जौ बी जानौ हौ कै जो कोई धरम के काम करै है, बौ परमेसर की औलाद है। |
New Life Compute Institute [NLCI] - CC BY-NC-ND 4.0