NASEPTE 1 - Thukhun Thak NT (BSI)

¹ Theophila aw: Ka laibu masa ah Jesu silbawl leh thuhilh patchil thu jousiah ka gelh ahi.

² Khasiangthou panpihna in sawltak a telte kiang a thu apiakkhit a laktouh a aom ni tan thu.

³ Akiang uah gentheihna athuak nungin theihpihna tampi-in hingin aki musak a, nisawmli sungin akiang uah tamveipi akilak a, Pasian gam thu agen gen hi.

Khasiangthou chiamna

⁴ Tualeh amauh tawh kipawl jel in, “Jerusalem khua paisan kei unla, hinanleh Pa silchiam ka gen najak uh hua nangak un, chi`n thu apia hi.

⁵ Ajiak Johan in tuiin hung baptist ngut a, hinanleh nou ni sawtlou nungin Khasiangthou in baptisma natang ding uh,” achi hi.

Jesu van a laktouh a omna

⁶ Tuajiakin, amauh ahung kikhop un, akiang ah, “Toupa tuin maw Israelte kiang a a kumpi gam uh napiak kik ding?” chi`n adong ua.

⁷ Tualeh aman akiang uah, “Pa in ahun leh ani ama thuthu a om ding a aguat, nou natheih ding uh ahi kei, achi hi.

⁸ Hinanleh natung uah Khasiangthou a hungtun chiangin sil bawltheihna nanei ding ua; tuachi`n Jerusalem khua ah zong, Judea gam tualeh Samaria gam jousiah ah zong, tualeh leitawp tanpha in zong ka thu theihpihte na hi ding uhi,” achi hi.

⁹ Tualeh hih thute agen zoh in, amuhlaipi un laktouh in aom a, meiin amuhphak louhna uah ala mangta hi.

¹⁰ Tualeh apaitouh lai a amau`n vanlam a et et lai un, ngaiin, minih puankang silh in akiang uah ahung ding ua,

¹¹ huate`n, “Galili gam a mite aw, bangding a vanlam en a ding ding na hi ua? Hih Jesu na kiang ua pat a laktouh a om namuh mahbang un, a mahmah ahung paikik ding hi.”

Judas tang ding guatna

¹² Tuachi`n Olive mual achih ua pat in Jerusalem khua ah ahung kilehkik ta ua,Olive mual pen Jerusalem khuagei ahi a, khawlni a vaphak theihna ahi.

¹³ Tualeh inn atun un, Peter leh Johan, Jakob leh Andru, Philip leh Thoma, Bartholomai leh Mathai, Alphai tapa Simon zealot leh Jakob a sanggampa Juda omna indan tung ah a paitou ua.

¹⁴ Hihte tengteng numei leh Jesu nu Mari tawh, Jesu sanggamte tawh mun khat ah omkhawm in lungsim munkhat a phattuam ngaitakin a thum thum ua.

¹⁵ Tualeh huani in Peter nungjuite laiah ading a, aun un za leh sawmnih bang ahi ua.

¹⁶ “Sanggamte aw, Khasiangthou in David kam a, Jesu mante lamkaipa Juda thu ana genkholh, hua Pasian Laisiangthou pen ahung tung ding mawng ahi.

¹⁷ Ajiak amah eite lak a simtel ahi a, hih nasepna ah tan anei hi.”

¹⁸ Tualeh hihpan a khialhna man in mun a lei a, abungbu in akia a, alai ah apokkek a agil jousiah alawt khiata hi.

¹⁹ Tualeh hihthu Jerusalem khua a tengte jousiahin athei ua, tualeh huamun pen amauh ham in Akeldama, achi ua, tuapen “Sisan mun” chihna ahi.

²⁰ “Psam Laibu ah hihthu gelh ahi: ‘A tenna mun sukgam in om henla, Asung ah kuamah tengkei hen.’ Hichi`n zong akigelh hi, ‘Tualeh a lamkai hihna midang in tang hen,’ chih.”

²¹ Tuajiakin, “Toupa Jesu ilak ua lutjel pawtjel a aom sung a,

²² Johan baptisma a kipan, alak ua kipan van a laktouha a omni tanpha ahung na kithuahpihte lak a mikhat, thohkikna hung theihpihtu dingin aom ngeingei ding ahi,” achi hi.

²³ Tuachi`n minih aguat ua, khat ahihleh Joseph Barsabbas, (amin khem Justa achih uh,) tualeh khat ahih leh Matthia ahi.

²⁴ Tualeh thumna anei ua, “Nang, aw Toupa mihing jousiah lungtang theitu, hih nihte lak a kuapen ahia natel, hung theisak in.

²⁵ Juda in amah omna a pai dingin hih nasep leh sawltak hihna khialhna a apuksan mun luah dingin,” achi ua

²⁶ Tualeh ai asansak ua, a aisan uh Matthia tungah atu a; tuachi`n amah sawltak sawm leh khat tetawh simkhawm ahita hi.