3 JOHAN 1 - Thukhun Thak NT (BSI)

Chibai bukna

¹ Upa in—- Ka it mahmah Gaia, thutak a ka it kiangah.

² Ka ittak, na kha a khantouhjel bang a sil jousiah a na khantouh ding leh na damtheihna dingin ka thumjel hi.

³ Ajiak pen unaute hungpai a thutak a na omdan bang a nangmah a thutak om ahung theihsak tak un ka kipak mahmah hi.

⁴ Ka tate thutak ah aom chih kajak kan a kipahna lianjaw ka neikei hi.

Gaia pahtat a omna

⁵ Ka ittak, unaute tung leh mikhualte tung a nabawl taphot gin-omtak in na bawljel in.

⁶ Huate`n ahihleh na itna saptuamte maiah a phuangta uhi. A khualjinna ua Pasianmi bangtak a na makaihjel leh na bawlhoih hi.

⁷ Ama min a pawtkhia ahihjiak un Jentelte kiang a bangmah a lakei uhi.

⁸ Tuajiakin thutak a semkhawmte ihihtheihna dingin huachibang mi pen ingaih ding ahi.

Diotrephe leh Demetria

⁹ Saptuamte kiangah kagelh a; hinanleh alak ua tungtuan utpa Diotrephes in, kou ahung kipahpih kei hi.

¹⁰ Tuajiakin kungpaileh pen, a silbawlte leh: Ka tung ua thugilou gen a a kamtam dan ka phuangjak ding hi! Tualeh hua a zong lungkimlou in amah mah in a unaute ana vaitunnuam kei a, tualeh a tungsaknuamte zong a kham a, saptuam sung a pat a notkhia hi!

¹¹ Ka ittak, sil gilou chingkenla hinanleh silhoih chingjaw in. Silhoih bawl mi pen Pasian a kipan ahi; hinanleh silgilou bawl mi in Pasian a mukei hi.

¹² Demetria in mi jousiah a pat leh, thutak a pat pahtat alawh a. Tualeh kou zong ka theihpih ua, tualeh ka theihpihna uh pen adik ahi chih nathei uhi.

Mangpha khakna

¹³ Gelh ding tampi kanei a, hinanleh laipuan leh laituiin na kiang uah ka gelh kei ding hi;

¹⁴ hinanleh sawtlou nung chiangin kung muding a, kimaituah in thu igen ding chih ka kinem hi.

¹⁵ Khamuanna natung uah om hen. I lawmten chibai ahung buk uhi. I lawmte minlawh chiat in, chibai hung na buksak in.