2 PETER 1 - Thukhun Thak NT (BSI)

Chibai bukna

¹ Simon Peter, Jesu Krist sila leh sawltak in, Pasian leh i hundampa Jesu Krist diktatna jal a ginna manpha itanbang tangte kiang ah:

² Pasian leh i Toupa Jesu Krist theihna jiakin na tung uah hehpihna leh khamuanna sukpung in omta hen.

Pasian sapna leh telna

³ Amah thupina leh hoihna a ei hungsampa theihna jiakin a Pasian silbawltheihna bangin, hinna leh Pasian ngaihsakna lam thu ah sil jousiah ahung pia hi.

⁴ Tuajiakin thuchiam manpha leh thupi mahmahte ahung pia hi, tualeh hihte jiak a, utna jiak a leitung a siatna ompen taikhiatsan in, Pasian hinna kikoppihte nung hitheita ding uhi.

⁵ Hinanleh hihte jiak mah in, thanop suah unla, na ginna uah hoihna hel unla, na hoihna uah theihna hel unla;

⁶ na theihna uah mahni kithununna hel unla, mahni kithununna ah thuak-hatna hel unla, tualeh na thuak-hatna uah Pasian ngaihsakna hel unla;

⁷ na Pasian ngaihsakna uah sanggamte itna hel unla, sanggamte itna ah itna hel un.

⁸ Ajiak hih silte noua ahih a akhanjel leh, i Toupa theihna lam ah chiing leh gahlou in na omkei ding uhi.

⁹ Ajiak kuahileh hih silte tasam pen mittaw ahi a gamlapi a mutheikei a, tualeh a nidanglai khialhnate a pat a silsianga a omna zong a manghilhta hi.

¹⁰ Tuajiakin, unaute aw, nou hung kisapna leh telna chiansak dingin kuhkal un, ajiak pen hihte na bawl uleh na pukngai mawng mawng kei ding uhi.

¹¹ Tuachi`n Jesu Krist i Toupa leh hundampa kumtawn gam a lutna nou ahung kipia talua thamtham ding hi.

¹² Hih silte jiakin leh hihte theiin, thutak na kiang ua om a na kipna uah hua silte pen hung theisak gige dingin ngaihsaklou in ka om mawng mawng kei ding hi.

¹³ Ahi, hih puan inn a ka omsung teng, nou hung theisak in hung tok-halh gige hoih kasa hi.

¹⁴ I Toupa Jesu Krist in ahung etsaktak mahbang in, hih ka puan inn koihmangna a hungtung pai ding chih ka thei hi.

¹⁵ Tuathamlou in, ka sihnung chiang a hih silte na theihjingna ding un pilvang in theihtawp ka suah ding hi.

Krist thupina mitmuh ngeia theihpihna

¹⁶ Ajiak pen i Toupa Jesu Krist sil bawltheihna leh ahung paikikna thu kungtheihsak laiun tangthu piltak a ngaihtuah khia a juite ka hikei ua, hinanleh athupina mit a mute ka hijaw uhi.

¹⁷ Ajiak pen aman Pa Pasian kiang a kipat in pahtawina leh thupina amu a; huachihlai in thupina nasatak a pat in hichibang aw a kiang ah a hungtung a, “Hih ka Tapa ittak, ka kipahna mahmah ahi!”

¹⁸ Tualeh mualsiangthou a akiang a ka omlai un hih aw pen van a kipan a hungpawt, koumah ngeiin zong kaja uhi.

¹⁹ Tualeh genkholhna thu kipjawsem zong inei uhi. Khua ahungvak a na lungtangte ua jingsol aksi ahung suah masiah, munmial a vak om a ngaihsak bang ua na hih uleh na bawlhoih ding uhi.

²⁰ Laisiangthou a genkholhna thu himhim kuaman ama thu a alehkhiat ding ahikei, chih theimasa un.

²¹ Ajiak pen genkholhna thu himhim mihing deihdan a pawt ahikei a, Pasian misiangthouten Khasiangthou phut ahih bangjel un anagen uh ahijaw hi.