1 JOHAN 1 - Thukhun Thak NT (BSI)

Thu a Hinna

¹ Achil a pat a om, ka jaksa uh, ka mit ua ka muhsa uh, ka-etsa uh, tualeh ka khut ua ka khoihsa uh hua hinna thu pen.

² Hua hinna thu pen a kilangta a, huapen ka muta ua, ka theihpih uh, tualeh hua tangtawn hinna Pa kiang a om, ka kiang ua suklat a om pen na kiang uah kung hilh uhi.

³ Hua ka muhsa uleh ka jaksa uh pen na kiang uah kung hilh uhi nou zong nung kipawlkhawmpih theihna ding un; tualeh a taktak koute kipawlkhawmna pen Pa tawh tualeh Tapa Jesu Krist tawh ahi.

⁴ Tualeh na kipakna uh a bukim theihna dingin hih thute na kiang uah kung gelh uh ahi.

Pasian hih vak ahi

⁵ Hih pen akiang a pat a ka jak uh tualeh na kiang ua kung hilhsawn uh thupuak ahi, Pasian pen vak ahi a, amah ah mialna mawng mawng aom kei hi.

⁶ Amah tawh ka kipawlkhawm ichih ua miallak a ivak leh, juaugen ihi ua tualeh thutak zong ijuikei uhi.

⁷ Hinanleh amah vak a aom mah bang a ei zong vak a i om leh, khat leh khat kipawlkhawmna inei a, tualeh a Tapa Jesu Krist sisan in khialhna jousiah a pat ahung silsiang hi.

⁸ Khialhna ka neikei ichih uleh, eimah leh eimah kikhem ihi ua, tualeh thutak eiah aom kei hi.

⁹ I khialhnate i phuankhiat nak leh pen, i khialhnate ngaidam ding leh diktatlouhna jousiah a pat hung silsiang dingin amah pen agin om a, adiktat hi.

¹⁰ Ka khialkhakei ichihleh pen amah juaugen isuah ua, tualeh athu zong eimah ah aom kei hi.