Zechariah 1 - Pathen Thutheng BU (BSI)

Pakaiyin Amite Ahenga Hungkile Kit Dinga Akou

¹ Darius lengchan kal kum nina, lhaget lhina-in, Iddo themgao chapa Berechiah chapa Zechariah themgao henga Pakai thu ahung lhungin, aseije:

² Pakai chu napu napateu chunga chun alungnom mo lheh jengin ahi.

³ Hijeh chun nangman ahenguva, Janel Pakaiyin hitin aseije; keima lam hin ngauvin tin janel Pakaiyin aseije, chutileh kenjong nangho lam kahin ngat ding ahi, tin janel Pakaiyin aseije.

⁴ Napu napateu toh banghih-un, amaho henga chun themgao masahon anasamuvin, Janel Pakaiyin hitin aseije; lamdih louva kon le natoh phalouva konin hung kiheijun, tin aseijun ahi: ahinla amahon angai pouvin, kathu jong alapouve tin, Pakaiyin aseije.

⁵ Napu napateu hoiba hitam? chule themgaoho chu tonsotna hinguvam?

⁶ Ahinla kasoh themgaoho kana thupeh, kathule kadan kisunho chun napu napateu chu atuhtang louham? Chule amaho ahung kileuvin, janel Pakaiyin ichunguva bolding agot bangin, ilampiu dungjuile, itoh-u dungjuijin ichunguva atong chaitai atiuve.

Themgaopan Gaothilmu-a Sakol ho Amu

⁷ Darius lengchan kal kum nina, lha somlekhat channa, hichu Sebat lha ahin, nisomni le nili nin, Iddo chapa Berechiah chapa Zechariah themgao henga, Pakai thu ahung lhungin, aseije:

⁸ Keiman jan-in, sakol san chunga mikhat touva, amachu noilama huisum thing lah-a adina; anunga sakol sanho, apolchetchut, chule akang aum kamun ahi.

⁹ Chuin keiman, Vo Ka Pakai, hichehohi ipiham? kati. Hichun vantil eikihoupi chun kahenga, hichehohi ipi ahiu vetsah inge, ati.

¹⁰ Chuin huisum thing lah-a ding mipa chun adonbutnin aseije, hicheho hi leiset pumpi suhle tunga chonle dinga Pakaiyin ahinsol ho ahiuve ati.

¹¹ Chuin amahon thingphung lah-a ding Pakai vantil chun adonbutnun, keihon leiset hi suhle tungin kachonun, veuvin, lei pumpi chu atouthip beh-in, akicholdon ahi, atiuve.

¹² Chujouvin Pakai vantil chun adonbutnin aseije, Vo janel Pakai, kum somsagi jen adouna-a nalunghan khum Jerusalem le Judah khopiho chunga itihchan hepina beija naum ding hitam?

¹³ Chuin Pakaiyin eikihoupi vantil chu thupha le lhamona thun adonbutnin ahi.

¹⁴ Chuti chun kajah-a thusei vantil chun kahenga, hitihin samphongin, janel Pakaiyin hitin aseije; keima Jerusalem le Zion din thangthipna lentah in kathang thipmin ahi.

¹⁵ Chule nomtah-a uma Pathen hephalou ho chunga kalung phamolheh jengin ahi: ajehchu keima themkhat bou kalung phamo ahin, ahinla amahon suhgimna chu amasot uvin ahi.

¹⁶ Hijeh chun Pakaiyin hitin aseije; keima Jerusalem henga hepina toh kahungkile kit tai: asunga chu ka-in kisading ahi, tin janel Pakaiyin aseije, chule Jerusalem chunga tetohna khao kijan ding ahi.

¹⁷ Samphong nalaijin, Janel Pakaiyin hitin aseije tin aseijin; kakhopiho phattheina vanga kikehbe nalai ding; Pakaiyin Zion alhamon nalaiding, chule Jerusalem adeilhen nahlai ding ahi.

Themgaopan Gaothilmu-a Sakiho Amu

¹⁸ Chujouvin kakhodah-in ahile, veuvin saki li kamun ahi.

¹⁹ Chuin keima eikihoupi vantil jah-a chun, hihohi ipi tina ham? kati. Hichun aman, hichehohi Judah, Israel chule Jerusalem thecheh-ah aki li neiho chu ahi tin eidonbutne.

²⁰ Chuin Pakaiyin thingthem bol mili eimusah-in ahi.

²¹ Chuin keiman, hichehohi ipi bol dinga hung hiuvam? kati. Hichun aman, hiche ki li hohi Judah thecheh-a, koimacha alu dahdoh ngamlou hela lhaho chu ahiuve: ahinla hiche thingthem bol hohi amaho jamsah dingle, akithecheh na dinguva Judah gam chunga aki-u domsanga chidang namdangho ki hochu suhlhahpeh dinga hunga ahiuve, tin aseije.