2 Corinth 1 - Pathen Thutheng BU (BSI)

Lemna

¹ Pathen lungcham tah-a Jesu Christa solchah-a pang Paul leh, sopi Timothy'in Corinth-a um Pathen houbung te, chule Achaia gam sunga um mithengte jouse henga,

² i-Pau Pathen le Pakai Jesu Christa-a konin, lungsetnale lungmonna chun umpiuvin.

Paul'in Pathen Athangvah

³ Pathen, I-Pakaiyu Jesu Christa Pa chu vahchoijin umhen, Ama lungsetnaho Pa leh lungmonna jouse Pathen ahi.

⁴ Keihon Pathen'a kona lungmonna kaneiju, hiche lungmon na-a chu hesoh gentheija umteho kalungmonsah theina dingun, hesoh gentheina lah-a jong aman eilung monsah jingjiuve.

⁵ Ajehchu Christa thohgimna chengse keiho-a adimset bangin, Christa vangin lungmon na-a kadimset jingui.

⁶ Ahin keihon hesoh genthei kathoh-u aumle, hichu nangho lungmonna dingle huhhing-a naumna dingu ahi; lungmonga kaumu jongle, hichu nangho lungmonna dingle huhhing-a naumna dingu ahi; hichu keiho thohjiho tobang hesoh gentheina lungneng tah-a nathoh naova kona nahetdoh-u ahi.

⁷ Chule nanghon hesoh genthei thohna lama chan naneiju banga, lungmonna lama jong chan nanei jingu chu kahen, kakineppi nau adet jinge.

⁸ Sopite, Asia gama kachunguva hesoh genthei chua chu nahet lou dingu kanompoi, thohjouhoi hilou kathauvin ajo kalvalin nasatah-a eidelpha jengu ahin, hing dinga jong kakihol louvu ahitan ahi.

⁹ Ahin keihon kalung sungun, keihole keiho-a kitahsan louva athiho kaithouva Pathen chu katahsan johna dingun, kathina dingu ahung lhunge, katiu ahitai.

¹⁰ Ama chun chutobanga len thina-a kona chu eina huhdoh-u ahin, chujongle eihuhdoh dingu ahi; ama chun tu-a jong eihuhdoh dingu ahinalaije, tia ama-a chu kakinepnao phutdet kahiuve.

¹¹ Mi tamtah vanga lungsetna thilpeh eikipeh jeh uva hi, mi tamtah-in keiho chungchanga athangvah theina dinga, nangho jong nataonaova eikithopia nahiuve.

Paul Thilgon Kikhel

¹² Ijeh-inem itile kakisonnao chu hiche hi ahi, kalung sunguva ase apha hetnan eihettohsah-u chu, vannoi mite hengah, chule atamjo cheh-a nangho lamah, tahsaphe lam chihna hilouva, Pathen lungset vanga Pathen thenna le kitahna-a kanachon jingu ahi.

¹³ Nanghon sim jong nasim uva, het jong nahetchet sao thu tailou chu keihon nangho henga thu dang ima kasunpouve. Chule akhon ni geijin heuvin nate tin kakineme.

¹⁴ Nanghon keiho neihet phot thimu banga chu, Pakai Jesu nikho nileh nangho kisonna ding keiho kahiu banga, nangho jong keiho keisonna ding nahiuve.

¹⁵ Chule hiche tahsanna-a hi, nivei phatchomna nanei theina dinguvin, nangho henga hung masaleng kati ahi;

¹⁶ Macedonia kacheteng nangho kom hin hopangting, Macedonia'a konin nangho henga hungkit ingting, chule nanghon Juda gam lama neithah leuchun kati.

¹⁷ Hijeh-a chu, hitia lung kaput hi, thil neocha dana kalahham? ahiloule kalunggot chengse hi, tahsaphe dungjuija, ahile ahi, ahi loule ahilou, tia kahim?

¹⁸ Ahinla Pathen athutah bangin, nangho lama kathu-u chu, ahile ahi, ahi loule ahilou, ahipoi.

¹⁹ Ajeh iham itile nalah uva keihon, keimatah le Silvanus chule Timothy'n, kalhangsap leu Pathen Chapa Jesu Christa-a chun, ahi leh ahilou, aumpoi, ama-a chun Ahi aumbouve.

²⁰ Ajeh chu Pathen thutep jouse chu Ama-a chu Ahi chu uma ahi; hijeh-a chu keiho-a kona Pathen loupina dinga, ama vanga Amen hijia ahi.

²¹ Chule Christa-a nang hotoh eiphutdoh, chule thao einua chu Pathen ahi.

²² Ama chun namdet einam khumuva, chule ilung sunguva Lhagao khamgah na-a eipeh-u ahi.

²³ Nangho hoidohna dinga tu geija Corinth-a hung louva kahitai, hiche thua hin kahinna chunga ahetoh dingin Pathen kakouvin ahi.

²⁴ Keiho nangho tahsanna chunga vaipo-a kahipouve, nakipanao chu hujoa kahibovui. Ijeh-inem itile nangho tahsana-a nading detnaove.