Jona 2 - Sudest

Jona le naŋgo

¹ Maya borogiko e ŋgamoiye tɨne, Jona i naŋgo weya Giya le Loi.

² Iŋa: “Mbaŋa inaŋgu vuyowo laghɨye e tɨne, na ya una Giya idan, kaero u thalavuŋgo. Bode moli ramaremare e ghambanji, ya una idan thalavu kaiwae, na u loŋwa ghalɨŋaŋgu.

³ U duutuŋgo e ŋambuwoko tɨne bode moli, njighɨ i vaghɨliyaŋgo, len bagodu laghɨlaghɨye thɨ bebe e vwataŋgu.

⁴ Lo renuwaŋa yaŋaeŋge kaero mendava u kitenɨyathuŋgo e ghen ko tembene ya thuweva len Ŋgolo Boboma.

⁵ Mbwa i wovululuŋgo na i wovoŋguŋgo; na njighɨ i garubu riwaŋguke laghɨye, na njighɨko wolewaniye i ghavwa umbalɨŋgu.

⁶ Ya nja e ŋambuwokote e ououko rɨgherɨghenji e valɨvaŋgake iya ghathɨnɨmbako ma mbaŋa regha i mavu. Ko iyemaeŋge ghen, wo Giya, lo Loi, u vaŋgunjoghaŋgo e yawayawaliŋgu bode moli e ŋambuwoko tɨne.

⁷ Mbaŋa ya ghamɨno yawaliŋgu kaero ne iko, amba ya renuwaŋakikiŋge na ya naŋgo e ghen, o Giya na e len Ŋgolo Bobomana e tɨne u loŋwa ghalɨŋaŋgu.

⁸ Thavala thɨ goruweya vatavatadɨŋgi na ma e ghanji thovuye, kaero thɨ roiteteŋge na gharen ma i nja weŋgi.

⁹ Ko iyemaeŋge ne ya wothu taraweŋge; ne ya vakatha vowo na i voro e ghen na ya vakatha ŋgoreiya va lo dagerawe e ghen. Vamoru i mena weya Giya!”

¹⁰ Amba Giya i vakatha borogima na i thegharaŋgiya Jona e njighɨko ghadidiye.