Usea 1 - Eastern Tawbuid

¹ Katatuy Yawi at foyungan sas Beri baguwama Usea, ebi gina Usiya, ay Yutam, ay Akas, ay Esekiya nu gsugfunanan gmagurang sis talun Uda. Ginanya tagmagurang sis talun Israel Yuas baguwama Yerubuam.

Usea at Mangena ay at ngay Unga

² Katatuy Yawi taguna at longan sas Usea: “Adaduwai sa sik takamayun fag mangena, ay ay ngay unga ban tibak taw ngumayan anya te, ‘Sik takamayun fag mangena at unga.’ Sik fafaskudanan te, ku ngay taw kata sik takamayun fag mangena teway gseg sas tibak fagsegan.”

³ Nu katanya, Usea ndaduwa sas Diblaim baguyna Gumer. Ay Gumer gfafiyon wan. Ay kanya fag daduwa at unga sik ama.

⁴ Ay Yawi nalong sas Usea te, “Fangayani am unga te, ‘Esreel,’ teway wa ban glugo nanfaurianan aw talun Israel at fun anway at aguyangan Yeu ngayu at nafate sas fulan Esreel. Gfatabu kwan talun Israel at fagmagurangan.

⁵ Ginanya ban fag lungud, gfabayan kwan talun Israel at ngay sundalu nu gababawan sas Datag Esreel.”

⁶ Ay Gumer gdog yay fiya gfafiyon ay nafasalug sik ina. Ay Yawi nalong sas Usea te, “Fangayani am unga te, ‘Lu-Rukama,’ teway kwa gfalyam taw Israel at ngay asalanan ay kwa kafanyu.

⁷ Ay roro kafanyu aktuwa taw Uda. Aw wan Yawi, at fagsegan fag Diyus, at tagfalangfe anya teway madaragang aktuwa, bunwa siginans busuy, ay fiso, ay ngay kabayu, ay ate ngay tagkabayuwan.”

⁸ Ay Gumer nu nafatuwas wan nu gfasusu Lu-Rukama, kanya gdog yay fiya gfafiyon ay nafasalug sik ama.

⁹ Ay Yawi nalong sas Usea te, “Fangayani am unga te, ‘Lu-Ami,’ teway taw Israel bunwa ku taw, ay aw, bunakwa at Diyus.

¹⁰ Ay roro umdasug ban sik lungud umfanyu aw ay mamanyun anya, ay umkayu kayus lagnas sis tigyangan dagat, ay we manga tap. Katsi nafangayan aw anya te, ‘Bunwa ku taw,’ ay bandi nanfangayan akyangay anya te, ‘Tagleleg fag Diyus at ngay unga.’

¹¹ Ay taw Uda ay taw Israel gdog yay fiya umsadi, ay gfili ban at fun. Ay gdog yay umkayu at fakonun. Ay ginanya ban fag lungud taw Esreel guseganan tuwa.