Markus 1 - Eastern Tawbuid

Uan Tagfasurung at Foyungan

^1-2 Katatuy at Masine fag Barita sa baliwa tam Fun Isus, tam Diyus at nafili fag Fun. Kanya tam Diyus at Baguwama. At fagsigadan tuy gina in-gurungan taglong Isayas at nariruk sa baliwas Diyus at Baguwama. Ebi Diyus nalong sat Baguwama te, “Sumugu aw ku tagfoyung at gumuna emu laman nanfamasadan am dalan.

³ Ay muro ban sas talun at yud e taw te, ‘Famasadani wan tam Fun at dalan ay fasineuni at fagnanloan.’”

^4-5 Ay Uan Tagfasurung indasug sas talun at yud e taw. Ay ngayuk taw at nananlag anya siginans fulan Erusalem ay siginans fagdaul talun Udiya. Ay kanya gfoyung te, “Ubuni ay ngay asalanan ay asurungi sasad safa sik fagsafulan te, naubun wam fiya ay asalanan, laman Diyus gfalyam wan ay ngay asalanan.” Ay ka fag ngay taw nu naubun wa fiya at ngay asalanan, Uan nasurung wan sasad Safa Urdan.

⁶ At fangawat Uan balukas siginans kamelyu sigyu, ay at ginawang balat balan. Ay at fakonun liyung ay deut at fanginum.

⁷ Ay Uan gfoyung te, “E mdasug ban sik taw glabi yay angku nu madaragang, ay kwe fagmasineun an aw oma gluwas at fansiyuk at sinilas.

⁸ Ay aw, gfasurung aw ayu sasad safa. Ay kanya fag taw nanfasurung yangay ban ayu sa at Masine fag Falad.”

Uan Nafasurung Isus

⁹ Ginanya, Isus indasug sas Safa Urdan siginans Nasaret sis Galiliya fag talun. Ay Uan nafasurung Isus sasad Safa Urdan.

¹⁰ Ay Isus nu nsure wan siginan sad safa, manlag di banwa nluwang. Ay at Masine fag Falad kadaga ay nasubuk sa anya kata sik linatad.

¹¹ Ay ginanya e naelongan siginans banwa te, “O wan ku fakesugun ku baguwama. Guseganan aw dawdaw emu.”

Satanas Igfaskud Isus

¹² Ay at Masine fag Falad nataban way sigad Isus sa sik talun at yud e taw.

¹³ Ay Isus sanya wan 40k menit. Ay Satanas igfaskud anya. Ay ngayu sanya ngay mangimut tagfangagat, ay roro tam Diyus at ngay tagfabarita natarabang Isus.

Isus nu Gfasigad Igfoyung

¹⁴ Uan Tagfasurung nu masungsungan wan, Isus nalo wa sas Galiliya ay nafoyung wa Diyus at Masine fag Barita sanya.

¹⁵ Ay Isus nafoyung sa sangay taw te, “Ebi at ngay taglong at longan katsi in-gurungan wan. Nu katanya, makbang wan Diyus nu gmagurang taw. Ubuni wan ay asalanan, ay afanudi wa sat Masine fag Barita.”

Isus Nafili Ufat Tagfanguyang

¹⁶ Ay gina Isus glo sa sangaba tigyangan Lino Galiliya, nalag sik dugsay, Simun ay Andres, nu kukas at fanggamat uyang sasad lino. Ka fag dugsay sik tagfanguyang.

¹⁷ Ay Isus nalong sas dugsay te, “Aloi angku. Nanfoyung ban aw ayu nu gfaful am ngay taw, kata nu gamat am uyang katsi.”

¹⁸ Ay rodi ka fag dugsay naubun at fanggamat uyang ay naalo wa Isus.

¹⁹ Ay Isus nalo yay sirut sat dayu ay nalag yangay Sebidiyu at baguwama Santiagu ay Uan. Ay ka fag dugsay igfasine at fanggamat uyang sis balutu anway inrasras wan.

²⁰ Ay Isus nagewan ka fag dugsay. Ay dugsay naubun wan at tama anggan at ngay tagfagbulun sis balutu, ay naalo wa Isus.

Sik Ama at ke Mafurat fag Falad

²¹ Ay Isus ay at ngay tagadal indasug sas fulan Kapernaum. Ay gina Fakamatoun fag Menit, Isus nasakbo sa sangay taw Udyu bale fakafulan ay igfoyung yay sanya.

²² Ay at ngay tagdungugan nadulawan Isus at foyungan. Fakatanyaun, teway Isus nu gfoyung madaragang tuwa, ay di kata at ngay tagfoyung Muisis at Suguwan nu gfoyung.

²³ Ay ginanya, sik ama at ke mafurat fag falad guro te,

²⁴ “Isus, sik taw Nasaret, taw ro am fagstiyeun? Go am fagstiyeun nanfalyam wa ro o em fagmadaragangun? Nasaful akwa emu te, go sinu o. O wan at Malayun sat Masine tagsiginans Diyus.”

²⁵ Ay roro Isus nasalag ka fag mafurat fag falad te, “Lag gelongan. Alfasi wan sanya ginan fag ama!”

²⁶ Ay ka fag mafurat fag falad igfafanggong ka fag ama, ay guro dawdaw, ay nalfas wan sanya ginan fag ama.

²⁷ Ay at ngay tagdungugan nu nalag, nadulawan dawdaw, ay gfangintoanan te, “Taw fakatanyaun at foyungan? Go kanya sik foyungan yay bagu? Madyay e fagmadaragangun tuwa nu gsugu at mafurat fag falad ay gfaning wa fiya anya.”

²⁸ Ay mafali nu kadungug Isus at madaragang fag fagbulun sas fagdaul talun Galiliya.

Isus Nafafiya Simun at Nugangina

²⁹ Ay Isus ay at ngay tagadal nalaklo wan siginan sangay taw Udyu at bale fakafulan, ay natunglus wa sas Simun ay Andres at bale. Ay Santiagu ay Uan gufud yangay.

³⁰ Ay ginanya, Simun at nugangina matagilid way sisad igyan, anway e lagnat. Ay at tiba nananfoyung sas Isus.

³¹ Ay Isus inkakbang sanya fag mangena, ay nated at daluwap ay nafalunggung anya. Ay ginanya infiya wa daw at lagnat, ay kanya tuwa takamasadan Isus ay at ngay ufud fakonun.

³² Ginanya fag fafun, gina menit bagu nfalyu, sik ngay taw nataban yay sas Isus fagayu at ke daylan fag ngay taw ay manga at ke mafurat fag falad fag ngay taw.

³³ Ay sanya fag fulan at taw fagayu maful sisad sakbawan bale.

³⁴ Ay ngayuk taw Isus at nafafiya, nus nga setaw at daylan. Ay naayan ngayuk mafurat fag ngay falad. Ay nasalag yangay at mafurat fag ngay falad nu gelongan. Fakatanyaun, at mafurat fag falad nasaful wa te, katanya fagalay Isus.

Isus Nadarangin

³⁵ Balabag di sdaga kamenit, Isus infulo ay nalo sas talun at yud e taw, ay nadarangin sanya.

³⁶ Ay Simun ay anggan at ngay ufud nasarap Isus.

³⁷ Ay nu nalag wan, nalong sas Isus te, “Fagayu taw gsarap emu.”

³⁸ Ay Isus nalong te, “Bastam, glo watam sat fadogan fag ngay fulan, laman nanfoyung aw sanya fag ngay taw. Katanya at masuwad ku fagindasugun ste swa daga.”

³⁹ Ay Isus nalo wan sa sangay fulan sas fagdaul Galiliya, ay kamoyung sa sangay taw Udyu at ngay bale fakafulan ay gayan at ngay mafurat fag falad.

Isus Nafafiya sik Ama at ke Daylan sit Balat

⁴⁰ Ay sik taw at ke mason fag daylan sit balat inkakbang ay inlub sas Isus at akbang, ay matvngvd nu gfafanyuwan sas Isus te, “Ku Fun, nu kaumsig o, fafiyai yap nangus angku laman tumap yangay angku te, masine aw kata em fagfaningun fag ugali.”

⁴¹ Ay Isus infanyu ay nated ka fag ama, ay glong te, “Kin, kaumsig aw. Afiyai wan.”

⁴² Ay rodi tv infiya wan at daylan ay insine wan.

⁴³ Ay Isus bagu nafalo, matvngvd nu gsalag anya te,

⁴⁴ “Lag kamansulit sa tibak taw. Loi way fagtvngvd ay falagi am bilug sas taganyun. Ay foni tuwa am famanyun kata ebi Muisis at suguwan, am famasaful sa sangay taw te, insine wo.”

⁴⁵ Ay ka fag ama nu nalo wan sanya ginan, kamansulit wa ngap karo. Ay katanya wayay, Isus wa masakbo sa sangay fulan, sa ways talun at yud e taw. Ay dewa katanya, ngayuk taw indasug sas Isus nus ngandaginan wa fag fulan.