यहुदा 1 - स्युबा1 ङाः येशु ख्रीष्टकीइ लाबु ओःले याकुबकीइ नोः यहुदा इःङे। कोन्ज्योइ दाम्दी च्याःम्बु पेःक्योक ओःले येशु ख्रीष्टकीइ लागी रक्षा पेःदी ज्याक्योक्याला ङाः दी इःगी प्रुःदेरा एः। 2 कोन्ज्योइ ख्याक्याला माःङ्बु भन्दा माःङ्बु कृपा ओःले खाम्साङ्बु तेर्च्युक ओःले च्याःम्बु पेःज्युक। स्योप क्युःर्केन लोबेनक्या 3 ङाःइ च्याःम्बु पेःक्योक रोःक्या, उः थाम्जेरकीइ ज्योर्क्योक थार्पाइ बारेला ख्याक्याला दी इःगी प्रुःजेला ङाःला याःबु नेती एःके। इःनाङ ताःसे ओःखोइ सट्टला कोन्ज्योइ राःङगीइ चाङ्मा मीःक्याला तेन्दुइ लागी खेप चीग उःक्याला डीक्पु नेती तेर्क्योक सेमल्हुकला थार्च्युदी ज्यो लाःती उत्साह तेर्ती दी इःगी प्रुःजेला याःबु नेसी। 4 चीलेलाःना दण्ड ज्योर्केन एः लाःती कोन्ज्योइ पेज्याला माःङ्बुरा तोःङ्ला प्रुःदी एःक्योक चीङ मीःक्या खाजुम्बाले ख्याक्याइ कील्ला स्युःसीङ्दी एः। खुङक्याइ कोन्ज्योला सेःसा मेःबेए, ओःले उःक्याइ कोन्ज्योइ अनुग्रहला माःताक्पा लेःगाक्या पेःजे ओःङ्गुए लाःती खुङक्याइ लाःकुए ओःले उःइ चीग्रा चीग ताःक्पु रा प्रभु, येशु ख्रीष्टला इन्कार पेःउए। 5 प्रभुइ राःङगीइ मीःक्याला मीश्र देशलाःम्ले थार्च्युदी ख्योःङ्सी, इःनाङ तीङ्ला खुङला सेमल्हुक मीलुगेनक्याला खुङगीइ सीःङ्दा चेसी। ख्याक्याइ दी थाम्जेर तामक्या तोःङ्लारा सेदी एःके, इःनाङ ङाः ख्याक्याला दी तामक्या टेःम्बा साल्च्युगे। 6 ङाः ख्याक्याला स्वर्गदुतक्याइ बारेला टेःम्बा साल्च्युगे, खुङक्या कोन्ज्योइ आङ्ज्या नाःङ्ला तेःचे माःखु इःनाङ राःङ तेःकेन ठाउँला पोःर्ती काःल्सी। कोन्ज्योइ खुङक्याला ठीम पेःगेन ओः छ्योम्बो ङीःमाथुपकीइ लागी खुङक्याला नाःमाङ स्योर्चे मीःखुगेन पेदी च्याल्दाइ ताःम्दी ज्यादी एः। 7 सदोम, गमोरा ओःले ओः सुःर साःरकीइ क्याःसाक्याइ मीःक्याइ काःन्डुबा दण्ड ज्योर्ती एःके ओः ताम टेःम्बा साल्दो। खुङक्याइ व्यभीचार पेःसी ओःले राःङ्सा क्युक टोःजे च्योःङ्रा जुबुइ लेःगाक्या ओःले। माःताक्पा मीःक्याला कोन्ज्योइ काःन्डुले नाःमाङ मीसीगेन मेःइ दण्ड तेर्कुए लाःती चेतवानी तेर्चेला कोन्ज्योइ खुङक्याला उदाहरण च्योःङ्रा जोतेर्सी। 8 एःन्डुरा पेःदी दी मीःक्याइ मीलामला थोङ्दी राःङगीइ जुबुला चीबु जोउए, कोन्ज्योइ आङ्ज्याला इन्कार पेःउए, ओःले नाःम्खालीङला एःकेनक्याइ बारेला माःताक्पा लाःकुए। 9 इःनाङ गोछेस्यो स्वर्गदुत मीखाएलगीइयाङ मोशाइ फुम्बुइ बारेला शैतान ङीमु टाःटे पेःगासुना खुङगीइ शैतानला बेइज्जत पेःदी माःताक्पा च्याःङ्जेला आ क्याःप्चे माःखु, बरु “ख्योला प्रभुइ केताङ्गुए!” लाःती लाःसी। 10 इःनाङ दी मीःक्याइ खुङक्याइ मासेक्योक तामक्याइ बारेलाङ माःताक्पा लाःकुए। ओःले खुङक्याइ नावारा म्याःक्योक रीःदाकक्याइ च्योःङ्रारा राःङला ची ची सेम थेपा ओःन्डुबारा पेःगेन्दी सोङ्गारा दी तामगीइरा खुङक्या सीःङ्दाक डोगेन एः। 11 खुङक्याइ तेःन्दामरा दण्ड ज्योर्केन एः! चीलेलाःना खुङक्याइ कयीनगीइ च्योःङ्रारा लाःयो पेःदी एः। नोःरकीइ लागी बालामगीइ पेःक्योक च्योःङ्रारा खुङक्याइयाङ माःइबा लेःगाक्या पेःदी एः। खुङक्याइ कोरहइ च्योःङ्रा वीरोध पेःदी एः, ओःले खुङक्या कोरह च्योःङ्रारा सीःङ्दाक डोउए। 12 ख्याक्याइ च्याःम्बुइ डेनला दी मीःक्या माःइबा दागक्या च्योःङ्रा इःङे, चीलेलाःना खुङक्या राःङ्सा मीःक्याला वास्तारा माःबेबा राःङ चीग्रा साःजे थुङ्जे पेःउए। खुङक्या नी ल्हाबाइ उर्ती खेर्केन्दी नाम म्याःक्योक मुक्पाक्या च्योःङ्रा ओःले ब्रुम्दो मेःकोङेन पुःङक्या च्योःङ्रा इःङे। खुङक्या नी चार्ङेमीःजीकरा पोक्योक पुःङक्या च्योःङ्रा इःङे ओःले खुङक्या तेःन्दामरा सीसीःङ्क्योक ओःङ्गुए। 13 खुङक्या नी चाङ्बुइ जीबा लाःङ्जेराःरा छालक्या च्योःङ्रा इःङे ओःले चाङ्बुइ प्वाः तेङ्क्योक च्योःङ्रा पेःदी खुङक्याइ राःङगीइ क्युक टोःजे च्योःङ्रा तामक्या तेङ्गुए। खुङक्या काःनाथेते कोर्ती डोगेन नाःम्खाइ कार्माक्या च्योःङ्रा इःङे, खुङक्याइ लागी नी कोन्ज्योइ तेन्दुइ लागी जीबा लाःङ्जेइ नाक्जुक ठाउँ ज्यादी एः। 14 आदमगीइदी पुस्ता तीःनला केक्योक हनोकीइयाङ दी मीःक्याइ बारेला तोःङ्लारा एःन्डु लाःती एःके, “तादो, प्रभु राःङगीइ टाःङ्रा मीःखुगेन चाङ्मा स्वर्गदुतक्या ङीमु ओःङेन एः, 15 खुङगीइ थाम्जेर मीःक्याला ठीम पेःगेन एः ओःले खुङगीइ लाःयो पेःगेनक्याइ पेःक्योक थाम्जेर खालगीइ माःइबा लेःगाक्या ओःले खुङगीइ वीरुद्धला लाःक्योक थाम्जेर माःताक्पा तामक्याइ लागी दण्ड तेर्केन एः।” 16 दी मीःक्या नाःमाङ गणगण पेःदी तेःकुए ओःले राःङ्साला माःताक्पा च्याःङ्दी तेःकुए। खुङक्या राःङगीइ माःताक्पा सेमगीइ तीङ्ला डोउए, राःङगीइ राःङलारा छ्योम्बो चाउए, ओःले राःङगीइ खेइ लागी राःङ्सा मीःक्या ङीमु डेपु पेःउए। सेमल्हुक लुदी तेः 17 ङाःइ च्याःम्बु रोःक्या, तोःङ्लारा उःइ प्रभु येशु ख्रीष्टकीइ प्रेरीतक्याइ ख्याक्याला लाःक्योक तामक्या टेःम्बा साल्दो। 18 खुङक्याइ ख्याक्याला एःन्डु लाःती एःके, “तीङगीइ ङीःमाक्याला ख्याक्याला ङ्याप्च्युक पेःगेन मीःक्या ओःङेन एः। खुङक्याइ कोन्ज्योला मेःबा मेःबेगेन एः ओःले राःङला ची पेःजे सेम थेपा ओःखोरा पेःदेरा डोगेन एः।” 19 दी मीःक्याइरा ख्याक्या नाःङ्ला खाफ्याच्युउए। खुङक्याइ दी जाम्बुलीङगीइ तामक्याला चीग्रा सेम तेर्कुए ओःले खुङक्या ङीमु चाङ्मा ला मेःयोङ्ए। 20 इःनाङ ङाःइ च्याःम्बु रोःक्या, ख्याक्यादी चाङ्मा सेमल्हुकला छार्तेरा सुङ ओःले चाङ्मा लाइ ल्हेलाःम्ले प्रार्थना पेःदो। 21 ख्याक्याला नाःमाङ मीसीगेन मीःली तेर्केन उःइ प्रभु येशुइ कृपाला कुःदी तेःकासुना ख्याक्या राःङला कोन्ज्योइ च्याःम्बुला ज्यो। 22 ओःले सेमल्हुक लुजेला पाःकेन पेःगेन मीःक्याला कृपा पेःदो। 23 ङ्याल्वाइ मेःला लेप्चे चाल्क्योक राःङ्सा मीःक्याला टीःती तेङ्दी सेन्च्युदो। राःङ्सा मीःक्याला नीङ च्योःगासुना च्यागाताःक्पु पेःदो, ओःले खुङक्याइ मीःलीला एःक्योक खुङक्याइ पेःक्योक लाःयोक्याला घृणा पेःदो। 24 ताः कोन्ज्योइरा ख्याक्याला लाःयोला लेप्चेलाःम्ले थार्च्युजे खुउए, ओःले खुङगीइरा ख्याक्याला नीर्दोष जोदी ओःले खाम्साङ्बुइ काङ्दी खुङगीइ महीमाला ख्योङ्जे खुउए। 25 खुङ चीग्रा तेःन्दामगीइ कोन्ज्यो इःङे, ओःले उःइ प्रभु येशु ख्रीष्टकीइ पेःक्योक लेःगालाःम्ले उःक्याला थार्च्युगेन्दी कोन्ज्यो खुङरा इःङे। कोन्ज्योलारा थाम्जेर महीमा, सेःसा, ल्हे ओःले आङ्ज्या तीःनाम तीःनाम तोःङ्मीःजीक ताःसेथुप ओःले तेन्दुइ लागी काःल्ज्युक। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.