३ युहन्‍ना 1 - स्युबा

¹ ङाःइ च्याःम्बु रोः गायस, ङाः कोःम्साइ एल्डरकीइ ख्योला दी इःगी प्रुःदेरा एः, ङाःइ ख्योला तेःन्दामरा च्याःम्बु पेःदी एः।

² ए ङाःइ च्याःम्बु रोः, ख्यो थाम्जेर तामला याःबु ओःङ्जे खुज्युक, ओःले ख्योइ ला च्योःङ्‍रारा जुबुलाङ नाःजा म्याःक्योक ओःङ्‍खुज्युक लाःती ङाः कोन्ज्यो ङीमु प्रार्थना पेःगे।

³ ख्यो तेःन्दामगीइ लाःमला काःल्दी राःङगीइ चेपाक्या याःबु जोदी एः लाःकेन ताम कोन्ज्योला सेमल्हुक लुगेन चीङ मीःक्या ङाःसाःला ओःङ्दी ख्याइ बारेला लाःती एः। दी ताम कोःगासुना ङाः माःङ्बुरा केःदाङ काःल्सी।

⁴ राःङगीइ पुःपुःमोक्या तेःन्दामगीइ लाःमला काःल्दी एः लाःक्योक ताम कोःजे ज्योर्कासु च्योःङ्‍रा खाम्साङा राःङ्सा ची ओःङ्जे खुउबा ले?

⁵ ए ङाःइ च्याःम्बु रोः, ख्योइ माःङ्बुरा तामक्या पेःदी प्रभुला सेमल्हुक लुगेन ङीःक्याइ नोःक्याला रोः पेःदी एः। ख्योइ ङोःमासेक्योक मीःक्यालाङ ख्योइ रोः पेःसी। दी तामगीइ ख्या ख्रीष्टला ब्य्राःङेन इमान्दार मीः इःङे लाःती तेङ्तेर्कुए।

⁶ खुङक्याइ कोःम्साइ तोःङ्ला ख्योइ खुङक्याला तेङ्क्योक च्याःम्बुइ बारेला लाःती एः। खुङक्या राःङ्सा ठाउँक्याला डोगासुना खुङक्याला ची कोःती एःपा ओःखोक्या तेर्ती रोः पेःतेर्सी लाःना ख्योइ याःबु पेःउए, चीलेलाःना एःन्डुबा पेःक्योकरा कोन्ज्योला सेम थेकुए।

⁷ चीलेलाःना खुङक्या ख्रीष्टकीइ मीःनला याःबु लेःङ्‍गो टाःम्जेलारा लाःमला थेङ्क्योक इःङे ओःले खुङक्याइ प्रभुला सेमल्हुक मीलुगेन मीःक्यालाःम्‍ले चीङ लेःङ्दी म्याः।

⁸ ओः सोङ्‍गारा, उः कोन्ज्योला सेमल्हुक लुगेन मीःक्याइ ओःन्डुबा मीःक्याला रोः पेःको। एःन्डु पेःदी खुङक्याइ कोन्ज्योइ तेःन्दामला फेल्गेन लेःगाला उःङ सहभागी ओःङ्जे खुउए।

⁹ ङाःइ दीखोइ बारेला कोःम्साला इःगी प्रुःदी एःके, इःनाङ खुङक्याइ कील्‍ला राःङगीइ राःङला ङाःरा इःम्बा चागेन डीयोत्रीफसकीइ ङाःइ लाःक्योक तामला वास्तारा पेःदी म्याः।

¹⁰ ङाः ओःला ओःङ्‍गासुना ख्याक्या थाम्जेरला ओःखोइ ङाःइ वीरुद्धला ची पेःबा, काःन्डुबा माःइबा तामक्या लाःपा, ओःखो थाम्जेर ख्याक्याला लाःके। ओःजे चीग्रा मीःङे, खुङगीइ कोन्ज्योइ लेःगा पेःगेन उःक्याइ रोःक्याला टाःलाङ पेःउए, ओःले खुङक्याला तोःङ्ज्याङ मेःबेए, ओःले खुङक्याला तोःङ्ज्याङ पेःजे छोल्गेन मीःक्यालाङ पेःजे मेतेरए ओःले खुङक्याला कोःम्सालाःम्‍ले तेङ्तेर्कोए।

¹¹ ए ङाःइ च्याःम्बु रोः, राःङ्साक्याइ पेःगेन माःइबा ताम पेःरामाःबे, इःनाङ याःबु ताम चीग्रा पेःदो। काःखोइ याःबु पेःउबा, ओःखो कोन्ज्योइदी इःङे। ओःले काःखोइ माःइबा पेःउबा, ओःखोइ कोन्ज्योला ङोःमासेक्योक ओःङ्‍गुए।

¹² डेमेत्रीयसकीइ बारेला मीःक्याइ याःबु लाःकुए ओःले खुङगीइ थाम्जेर चेपाला कोन्ज्योला सेम थेकेन लेःगा पेःउए ओःले ओःलाःम्‍ले खुङ याःबु मीः इःङे लाःकेन ताम थोङ्‍गुए। ङीःइ खुङगीइ बारेला याःबु लाःकुए ओःले ङीःइ लाःक्योक ताम तेःन्दामरा इःङे लाःती ख्योक्याइ छोर्ती एः।

¹³ ङाःइ ख्योला लाःकोन ताम नी माःङ्बुरा एः इःनाङ सीउ रा कालमलाःम्‍ले चीग्रा मीःङे,

¹⁴ ताः ङाः ख्यो ङीमु गेबुरा फ्रेके ओःले उःक्या थाम्जेर तामक्या लाःके लाःती रेःवा ज्यादी एः।

¹⁵ ख्योला खाम्साङ्बु काःल्ज्युक! दीला एःक्योक ख्याइ थाम्जेर रोःक्याइ ख्योला टासीदेले लाःती ताङ्दी एः। ओःले ओःला एःक्योक ङीःक्याइ रोःक्याला तासीदेले लाःतेर।