२ तीमोथी 1 - स्युबा1 कोन्ज्योइ सेम पेःक्योक सोङ्गारा येशु ख्रीष्ट ङीमु एःक्योक मीःलीइ ताःम्ज्याइ बारेला लाःचेला ङाः पावल येशु ख्रीष्टकीइ प्रेरीत काःल्क्योक इःङे। 2 ङाःइ च्याःम्बु पुः तीमोथी, ख्योला दी इःगी प्रुःदेरा एः। आबा कोन्ज्यो ओःले उःइ प्रभु येशु ख्रीष्टकीइ ख्योला अनुग्रह तेर्च्युक, नीङ च्योःज्युक, ओःले खाम्साङ्बु तेर्च्युक। सेमल्हुकला राःम्बु जोदी ज्याजेला उत्साह 3 ङाःइ फाफामुक्याइ पेःक्योक च्योःङ्रारा ङाः राःङगीइ चाङ्मा नावाइ कोन्ज्योइ लेःगा पेःउए। ख्याला टेःम्बा साल्देरा कुःङ्मु ङीःमाला प्रार्थना पेःगासुना ङाः ओःखोरा कोन्ज्योला ख्याइ लागी थुजीछे तेर्कुए। 4 उःक्या खाफ्यादी डोगेन तीःजीला ख्योइ मीज्यु पाप्क्योक टेःम्बा साल्सुना ख्योला फ्रेकेन छ्योम्बो सेम ओःङ्गुए। फ्रेचे ज्योर्ना नी ङाः काःजे केःदाङ ओःङ्जे एःके। 5 ङाःला ख्योइ तेःन्दामगीइ सेमल्हुक टेःम्बा एः। ओः सेमल्हुक तोःङ्ला ख्योइ इबी लोइस ङीमु ओःले ख्योइ आःमा युनीस ङीमुङ एःके, ओःले ताःसे ख्योइ ङीमुङ ओःन्डुबारा सेमल्हुक एः लाःती ङाःला टेःम्बा एः। 6 ओः सोङ्गारा, ङाः ख्योला तोःङगीइ तामक्या टेःम्बा साल्देरा लाःके, ङाःइ ख्योखाला लाःक्पा ज्यागासुना ख्योला कोन्ज्योइ तेर्क्योक वरदानला जोगाइतीदी ज्यो। 7 चीलेलाःना कोन्ज्योइ उःला जीबाइ ला मीःङे इःनाङ ल्हे, च्याःम्बु ओःले राःङला वशला ज्यागेन ला तेर्ती एः। 8 ओः सोङ्गारा, ख्योक्या उःइ प्रभुइ बारेला राःङ्साक्याला लाःचेला ङोःछा माःबे ओःले ङाः ख्रीष्टकीइ लागी कैदी काःल्क्योक थोङ्दीङ ख्योक्या ङोःछा माःबे, बरु ख्योङ कोन्ज्योइ ल्हेइ याःबु लेःङ्गो लाःचेला तुःक्पु खुर्तो। 9 कोन्ज्योइरा उःक्याला थार्च्युसी, ओःले उःक्याला राःङगीइ मीःक्या जोजेला केक्याःप्सी। उःक्याइ पेःक्योक लेःगाइ पेःगासुना मीःङे इःनाङ खुङ राःङगीइ सेमगीइ ओःले अनुग्रहइ पेःगासुना खुङगीइ दीखो पेःसी। दी अनुग्रह खुङगीइ उःक्याला येशु ख्रीष्टलाःम्ले तीःनाम छुजेतोःङलारा तेर्ती एःके। 10 ओःले ओःखो अनुग्रह उःक्याला थार्च्युगेन येशु ख्रीष्ट ओःङ्मीःजीक ताःसे थोङ्दी एः। खुङगीइरा सीबुइ ल्हेला नाश पेःसी ओःले याःबु लेःङ्गो लाःती उःक्या नाःमाङ मीसीगेन मीःलीला सेन्जे ज्योर्केन लाःम तेङ्तेर्सी। 11 दीखोरा याःबु लेःङ्गो टाःम्जेला ओःले लोप्चेला कोन्ज्योइ ङाःला प्रेरीत जोसी। 12 ओः सोङ्गारा, ङाः दी तामक्याला तुःक्पु खुर्तेरा एः। इःनाङ दीखोइ लागी ङाः ङोःछा मेःबे चीलेलाःना ङाःइ सु खाला सेमल्हुक लुदी एःपा, ओःखो ङाःइ याःबुले छोर्ती एः। कोन्ज्योइ ङाःला तेर्क्योक तामक्या खुङगीइरा ख्रीष्ट ओःङेन ओः ङीःमाथुपकीइ लागी जोगाइतीदी ज्यागेन एः। दी तामला ङाः ढुक्का एः। 13 ङाःइ ख्योला लोप्तेर्क्योक तेःन्दामगीइ तामक्याइ नमुनाला ङीःन्दो, ओःले येशु ख्रीष्टखाला एःक्योक ख्योइ सेमल्हुक ओःले च्याःम्बु पेःदीरा ज्यो। 14 ख्योला क्याप च्योल्क्योक तेःन्दामगीइ तामक्या उः नाःङ्ला तेःकेन चाङ्मा लाइ ल्हेला याःबु पेःदी ज्यो। 15 एशीयाला एःकेनक्या थाम्जेर ङाःलाःम्ले क्योदी काःल्क्योक नी ख्योइयाङ छोर्तीरा एः, ओः नाःङ्लाङ फुगेलस ओःले हर्मोगेनस इःङे। 16 प्रभुइ ओनेसीफरसकीइ खीम फेबेला नीङ च्योःज्युक, चीलेलाःना खुङगीइ ङाःला उत्साह तेर्कुके ओःले ङाः चेङाङला एःकासुना खुङ ङाःला फ्रेकाला ओःङ्जेला ङोःछा मेःबेके। 17 इःनाङ खुङ रोमला ओःङ्मीःजीक, खुङगीइ ङाःला माःफ्रेथुप छोल्दीरा तेःसी। 18 ठीम पेःगेन ङीःमाला प्रभुइ खुङला अनुग्रह पेःज्युक। ङाः एफीससला एःकासुना खुङगीइ ङाःला माःङ्बुरा मेःबा पेःदी एःके लाःकेन ताम ख्योइ याःबुले छोर्तीरा एः। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.