१ तीमोथी 1 - स्युबा1 उःला थार्च्युगेन्दी कोन्ज्यो ओःले रेःवा तेर्केन्दी येशु ख्रीष्टकीइ आज्ञा अनुसार येशु ख्रीष्टला प्रेरीत काःल्क्योक ङाः पावलगीइ दी इःगी 2 सेमल्हुकला ङाःइ तेःन्दामगीइ पुः तीमोथीला प्रुःदेरा एः। आबा कोन्ज्यो ओःले उःइ प्रभु येशु ख्रीष्टकीइ ख्योला अनुग्रह तेर्च्युक, नीङ च्योःज्युक ओःले खाम्साङ्बु तेर्च्युक। स्योप क्युःर्केन शीक्षालाःम्ले च्यागाताःक्पु पेःदो 3 ङाः माकेडोनीयाला डोदेरा पेःगासुना, स्योप क्युःर्ती लोप्केन मीःक्याला स्योप क्युःर्केन तामक्या लोप्चेलाःम्ले काज्युक लाःती ङाःइ ख्योला एफीससलारा तेः लाःती लाःसी 4 ख्योइ खुङक्याला ओः ताःङ्बुइ पेदामक्याला ओःले फाफामुक्याइ मीःनक्याला जोल्दी तेःचे मातेर चीलेलाःना ओःन्डुबा तामक्याइ नी मीःक्याला ठुक्पा चीग्रा ख्योङ्गुए ओःले सेमल्हुकलाःम्ले सेगेन कोन्ज्योइ तेःदामगीइ लेःगाक्याला पाःकेन चीग्रा ख्योङ्गुए। 5 उःइ तेर्क्योक दी शीक्षादी चाङ्मा सेम, याःबु नावा ओःले तेःन्दामगीइ सेमल्हुकलाःम्ले थेङेन च्याःम्बुला माःङ्बु जोजे इःङे। 6 काःजे मीःक्यादी दी तामला पोःर्ती लेःगा म्याःक्योक तामक्याला जोल्देरा एः। 7 खुङक्या छ्येइ ठीमगीइ लोबेनक्या ओःङ्जे छोल्गुए, इःनाङ खुङक्याइ लाःक्योक तामक्या राःङगीइ सेउए लाःती ठीवा साल्नाङ खुङक्याइ लाःक्योक तामक्या खुङक्या राःङगीइरा मेसेए। 8 उःला टेःम्बा एः, डीक्पु पेःदी चलाइतीसी लाःना छ्येइ ठीम माःङ्बुरा याःबु ताम इःङे। 9 तेःन्दामरा दी ताम उःइ सेकोःउए, छ्येइ ठीम याःबु मीःक्याइ लागी जोक्योक मीःङे इःनाङ छ्येइ ठीम मीःङीङेनक्याइ लागी, लाःक्योक ताम मीःङीङेनक्याइ लागी, कोन्ज्योला सेःसा मेःबेगेनक्याइ लागी, लाःयो पेःगेनक्याइ लागी, चाङ्मा म्याःक्योकक्याइ लागी, कोन्ज्योला मीःङीङेनक्याइ लागी, राःङगीइ आबा आमाला सेकेनक्याइ लागी, मीः सेकेनक्याइ लागी, 10 व्यभीचार पेःगेनक्याइ लागी, ख्य्वापीःजा ङीमु व्यभीचार पेःगेन ख्य्वापीःजाक्याइ लागी ओःले पेःन्पीःजाक्या ङीमु व्यभीचार पेःगेन पेःन्पीःजाक्याइ लागी, अपहरण पेःगेनक्याइ लागी, स्योप क्युःर्केनक्याइ लागी, स्योप क्युःर्ती पाङ्बु तेर्केनक्याइ लागी ओःले तेःन्दामगीइ शीक्षाला वीरोध पेःगेनक्याइ लागी जोक्योक इःङे। 11 उःक्याइ लोप्क्योक दी तामक्या उःला मोलाम तेर्केन महीमीत कोन्ज्योइ याःबु लेःङ्गोइ पेज्याला ज्योर्कुए। ओःले ओः याःबु लेःङ्गो फेल्जेला कोन्ज्योइ ङाःला दाम्दी एः। कोन्ज्योइ नीङ च्योःक्योककीइ लागी थुजीछे 12 ङाःइ लेःगाला ङाःला ल्हे तेर्केन्दी उःइ प्रभु येशु ख्रीष्टला ङाः थुजीछे तेर्के। खुङगीइ ङाःला सेमल्हुक लुदीरा खुङगीइ राःङगीइ लेःगा पेःजेला दाम्सी। 13 ङाःइ तोःङ्ला खुङगीइ बारेला माःताक्पा लाःसी, खुङगीइ मीःक्याला तुःक्पु तेर्सी ओःले खुङक्याला अपमान पेःसी। इःनाङ ओः तेःकासु ङाःइ प्रभु येशुला सेमल्हुक लुदी म्याःके ओःले ओः थाम्जेर तामक्या ङाःइ मासेबारा पेःक्योक सोङ्गारा खुङगीइ ङाःला नीङ च्योःसी, 14 ओःले प्रभु येशुइ ङाःला कोःकेन भन्दा माःङ्बु अनुग्रह तेर्सी। ओःले कोन्ज्योइ ङाःला येशु ख्रीष्टलाःम्ले ओःङेन सेमल्हुक ओःले च्याःम्बुइ काङ्तेर्सी। 15 येशु ख्रीष्ट लाःयो पेःगेनक्यालारा थार्च्युजेला दी जाम्बुलीङला ओःङ्क्योक इःङे, दी थाम्जेरकीइ ङीःन्कोःन तेःन्दामगीइ ताम इःङे। ओःले ओः लाःयो पेःगेनक्या नाःङ्ला थाम्जेर भन्दा माःङ्बु लाःयो पेःगेन्दी इःङे। 16 इःनाङ ओःखोइ पेःगासुना ख्रीष्टकीइ ङाःला नीङ च्योःसी। ओःले लाःयो पेःगेनक्या नाःङ्ला थाम्जेर भन्दा छ्योम्बो ङाः एःनाङ ङाःलाःम्ले येशु ख्रीष्टकीइ राःङगीइ नाःमाङ मीःसीःङेन धैर्य तेङ्तेर्चेला खुङगीइ ङाःला उदाहरण जोतेर्सी। दी उदाहरण येशुखाला तीङ्ला सेमल्हुक लुगेनक्या ओःले नाःमाङ मीसीगेन मीःजी जोर्केनक्याइ लागी इःङे। 17 नाःमाङ मीसीगेन्दी ओःले थोङ्जे मीःखुगेन्दी तेन्दुइ क्याःल्बुला तेन्दुरा महीमा काःल्ज्युक। खुङ चीग्रा चीग कोन्ज्यो इःङे। आमेन। 18 ङाःइ पुः, तीमोथी, तोःङमीःजीकरा कोन्ज्योलाःम्ले ख्योइ बारेला लाःक्योक ताम अनुसार ख्योला दी आज्ञाक्या तेर्तेरा एः। ख्योइ दी तामक्या टेःम्बा साल्सी लाःना, ख्योइ याःबुले माक क्याःप्खुउए। 19 ओःले ख्योइ राःङगीइ सेमल्हुक ओःले याःबु नावा माःपोःर। नावाइ लाःक्योक माःङीन्गासुना चीङ मीःक्याइ नी सेमल्हुक लुजेरा पोःर्सी। 20 खुङक्या नाःङ्ला हुमेनीयस ओःले अलेक्जेन्डर इःङे। कोन्ज्योइ बारेला खुङगीइ माःताक्पा तामक्या लाःचे पोःर्च्युक लाःती खुङक्याला ङाःइ शैतानगीइ लाःक्पाला तेर्ती एः। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.