१ पत्रुस 1 - स्युबा1 येशु ख्रीष्टकीइ प्रेरीत ङाः पत्रुसलाःम्ले पोन्टस, गलातीया, कापाडोकीया, यशीया रा बीथीनीयाला राःङगीइ देशलाःम्ले काःल्दी टाःम्दी तेःक्योक कोन्ज्योइ मीःक्याला दी इःगी प्रुःदेरा एः। 2 आबा कोन्ज्योइ माःङ्बुरा तोःङ्लाःम्ले राःङगीइ योजनालाःम्ले ख्याक्याला राःङगीइ चाङ्मा मीःक्या जोजेला दाम्क्योक इःङे। येशु ख्रीष्टकीइ ठालाःम्ले चाङ्मा काःल्ज्युक लाःती ओःले खुङगीइ आज्ञाक्या ङीःन्जे खुज्युक लाःती कोन्ज्योइ ख्याक्याला चाङ्मा लालाःम्ले राःङगीइदी जोसी। कोन्ज्योइ ख्याक्याला अनुग्रह ओःले खाम्साङ्बु तेर्च्युक। नाःमाङ मीसीगेन मीःजीइ रेःवा 3 उःइ प्रभु येशु ख्रीष्टकीइ आबा कोन्ज्योला थुजीछे। कोन्ज्योइ येशु ख्रीष्टला सीक्योकलाःम्ले सोम्बो लोदी खुङगीइ उःला सेम्बा मीःली तेर्ती उःक्याला छ्योम्बो अनुग्रह पेःसी। ओः सोङ्गारा, उःक्या थाम्जेर छ्योम्बो रेःवा पेःदी तेःती एः। 4 नाःम्खालीङला कोन्ज्योइ ख्याक्याइ लागी साँचतीदी ज्याक्योक उत्तराधीकार नाःमाङ सीःङ्दा चेती मेःन्डोगेन एः, नाःमाङ मेःनोङेन एः ओःले नाःमाङ मेतोर्केन एः। 5 ख्याक्याइ कोन्ज्योला सेमल्हुक लुक्योक सोङ्गारा ख्याक्या थार्चे माःज्योर्थुप खुङगीइ ल्हेइ ख्याक्याला रक्षा पेःदी ज्यादी एः। ओः थार्पा दी ख्याक्याइ लागी तयार पेःदी एः ओःले ओःखो तीङगीइ ङीःमाला थोङेन एः। 6 इःङ्जे नी ताःसे ख्याक्याइ चीङ ङीःमाइ लागी थाम्जेर खालगीइ तुःक्पुक्या खुर्कोःती एःनाङ, दी तामक्याइ लागी ख्याक्या केःदाङ एः। 7 ओः तुःक्पुक्या ख्याक्याइ चीले खुर्कोक्योक लाःसुना ओः तुःक्पुक्यालाःम्ले ख्याक्याइ कोन्ज्योला लुक्योक सेमल्हुक तेःन्दाम इःङेन दुबा लाःती तेङ्जेइ लागी इःङे। ङीःमा चीग नाश काःल्दी डोगेन सेरला नी मेःला खाराइतीदी चाङ्मा जोउए लाःना, ख्याक्याइ सेमल्हुक नी ओः सेर भन्दाङ माःङ्बु रीःनगीइदी एः। ओः सोङ्गारा, ख्याक्याइ सेमल्हुकला तेःन्दामगीइदी जोजेला जाँचतीउए। ओःले दी तुःक्पुक्याला ख्याक्याइ सेमल्हुक लुदी तेःसी लाःना, येशु ख्रीष्ट ओःङेन ङीःमाला ख्याक्याइ प्रशंसा, महीमा ओःले सेःसा ज्योर्केन एः। 8 ख्याक्याइ येशु ख्रीष्टला नाःमाङ माःथोङ्क्योक एःनाङ ख्याक्याइ खुङला च्याःम्बु पेःउए। खुङला ख्याक्याइ ताःसे थोङ्जे मीःखुए, इःनाङ ख्याक्याइ खुङला सेमल्हुक लुउए। ओःले लाःती लाःचेरा मीःखुगेन छ्योम्बो खाम्साङ्बुइ ख्याक्याइ सेम काःङ्दी एः। 9 चीलेलाःना ख्याक्याइ येशु ख्रीष्टला सेमल्हुक लुक्योक सोङ्गारा ख्याक्याइ लाइ थार्चे ज्योर्ती एः। 10 ख्याक्याइ ज्योर्क्योक दी थार्पाइ बारेला सेजेला कोन्ज्योइ लेःङ्गो तेर्केनक्याइयाङ माःङ्बुरा सेम पेःदी छोल्सी, ओःले खुङक्याइ कोन्ज्योइ ख्याक्याला तेर्चे चाल्क्योक अनुग्रहइ बारेला माःङ्बुरा तोःङ्ला लाःती एःके। 11 ओः कोन्ज्योइ लेःङ्गो तेर्केनक्या नाःङ्ला एःक्योक ख्रीष्टकीइ लाइ ख्रीष्टकीइ खुर्कोःन तुःक्पुक्या ओःले तीङ्ला ओःङेन महीमाइ बारेला तोःङ्लारा खुङक्याला थोङ्च्युसीङ्दी एःके। ओः सोङ्गारा, ओः लेःङ्गो तेर्केनक्याइ दी काःन्डुले ओःले काःला ओःङेन इःम्बा लाःती सेजे छोल्दी एःके। 12 खुङक्याइ राःङगीइ लागी मीःङे, इःनाङ ख्याक्याला मेःबा पेःदी एःके खुङक्याला दी तामक्या थोङ्च्युदी एःके। दी ताम नाःम्खालीङलाःम्ले ताःङ्क्योक चाङ्मा लालाःम्ले ख्याक्याला प्रचार पेःक्योक याःबु लेःङ्गो लाःकेनक्याइरा ताःसे ख्याक्याला प्रचार पेःदी एः। दी तामक्या स्वर्गदुतक्याइयाङ ताजेला छ्योम्बो सेम पेःदी एः। चाङ्मा ओःङ्को 13 ओः सोङ्गारा, लेःगा पेःजेइ लागी ख्याक्या तयार पेःदो ओःले साङ्बु पेःदी ठीवा साल्दो। येशु ख्रीष्ट ओःङ्गासुना कोन्ज्योइ ख्याक्याला तेर्केन अनुग्रहखाला थाम्जेर रेःवा ज्यो। 14 ख्याक्या कोन्ज्योइ आज्ञाक्या ङीःङेन पुःपोःमोक्या काःल्क्योक सोङ्गारा, तोःङ्ला मासेबा माःइबा लेःगाक्या पेःदी काःल्क्योक लाःमक्याला ताः माःन्डो। 15 ख्याक्याला केक्याःप्केन कोन्ज्यो चाङ्मा एः, ओः सोङ्गारा, ख्याक्याइ राःङगीइ पेःगेन थाम्जेर तामक्याला चाङ्मा ज्यो। 16 चीलेलाःना छ्येइ पेज्याला एःन्डुबा प्रुःदी एः, “ख्याक्या चाङ्मा पेःदो, चीलेलाःना ङाः चाङ्मा एः।” 17 सुलाङ ओलापाङ्दे माःबेबा मीःक्याइ लेःगा अनुसार ठीम पेःगेन्दीला आबा कोन्ज्यो लाःती प्रार्थना पेःउए लाःना, दी साजाम्बुलीङला तेःकाथुप राःङगीइ मीःजी एःथुप कोन्ज्योइ जीबा खुर्ती मीःजी सेन्दो। 18 ख्याक्याला ख्याक्याइ फाफामुक्याइ लोप्ती ताङ्क्योक लेःगा म्याःक्योक रीमठीमक्यालाःम्ले कोन्ज्योइ ची रीःन च्याःल्दी थार्च्युदी एःके ओःखो ख्याक्याइ सेदी एः। ख्याक्याला सीःङ्दी डोगेन सेर ओःले ङुलक्या च्योःङ्रा तामक्याइ रीःन च्याल्दी थार्च्युदी ख्योङ्क्योक मीःङे। 19 इःनाङ चीङ लाःयो माःबेक्योक ओःले खोट म्याःक्योक लुःककीइ रीःउ च्योःङ्रा ख्रीष्टकीइ रीःन छ्योम्बो एःक्योक ठालाःम्ले ख्याक्याला थार्च्युदी एः। 20 कोन्ज्योइ जाम्बुलीङ जोजे तोङ्लारा ख्रीष्टकीइ उःक्याला थार्च्युजेला दाम्दी एःके, इःनाङ ख्याक्याइ लागी दी तीङगीइ ङीःमाला खुङ ओःङ्सी। 21 खुङलाःम्लेरा ख्याक्याइ कोन्ज्योला सेमल्हुक लुउए, चीलेलाःना कोन्ज्योइ खुङला सीक्योकलाःम्ले सोम्बो लोसी ओःले खुङला महीमा तेर्सी, ओः सोङ्गारा, ख्याक्याइ कोन्ज्योला सेमल्हुक लुउए ओःले रेःवा पेःउए। 22 तेःन्दामगीइ वचनला ङीःन्दी ख्याक्याइ राःङला चाङ्मा जोक्योक ओःले ख्याक्याइ राःङगीइ आतानोःक्याला तेःन्दामरा च्याःम्बु पेःक्योक सोङ्गारा, चीगकीइ राःङ्साला सेम नाःङ मीःजीकरा च्याःम्बु पेःदो। 23 कोन्ज्योइ सोम्बो ओःले मीसीगेन वचनलाःम्ले ख्याक्या फीर्च्या सेम्बा पेःदी केदी एः। ख्याक्या सीःङ्दा चेती डोगेनक्याइ छार्क्युफुर्क्यु मीःङे, इःनाङ ख्याक्या नी नाःमाङ मीसीगेन्दीइ छार्क्युफुर्क्युक्या इःङे। 24 चीलेलाःना छ्येइ पेज्याला प्रुःदी एः, “थाम्जेर मीःक्या थाङगीइ चा च्योःङ्रा इःङे ओःले खुङक्याइ महीमा रीःइ मेःन्दोक्या च्योःङ्रा इःङे। चा काम्दी डोउए ओःले मेन्दोक्या प्रुःप्ती डोउए। 25 इःनाङ प्रभुइ वचन नी तेन्दुरा तेःकुए।” ओःले दीखो लेःङ्गोरा ख्याक्याला प्रचार पेःक्योक याःबु लेःङ्गो इःङे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.