१ युहन्ना 1 - स्युबामीःली तेर्केन ताम 1 तोःङमीःजीकरा काःल्क्योक, ङीःक्याइरा कोःक्योक, ङीःक्याइ मीइरा थोङ्क्योक, ङीःक्याइरा ताक्योक ओःले ङीःक्याइ लाःक्पाइरा देक्योक मीःली तेर्केन तामगीइ बारेला ङीःक्या प्रुःदेरा एः। 2 ओः मीःली ओःङ्सी, ओःले ङीःक्याइ ओःखो थोङ्सी ओःले ङीःक्याइ ओःखोइ बारेला लाःकुए। ताः ङीःक्या नाःमाङ मीसीगेन मीःजीइ बारेला ख्याक्याला लाःतेरा एः, ओः मीःली आबा ङीमु एःके ओःले ङीःक्यासाःला थोङ्दी एः। 3 ओःले ख्याक्याइयाङ ङीःक्या ङीमुरा संगती पेःज्युक लाःती ङीःक्याइ ची थोङ्बा ओःले कोःबा, ओःखो ख्याक्याला ताःतेर्के। ङीःक्याइ संगतीदी आबा कोन्ज्यो ङीमु ओःले खुङगीइ पुः येशु ख्रीष्ट ङीमु एः। 4 उःक्याइ खाम्साङ्बु छाङ्ज्युक लाःती ङीःक्याइ दी ताम प्रुःदेरा एः। कोन्ज्यो ज्योती इःङे 5 ताः ङीःक्याइ कोन्ज्योइ पुःलाःम्ले कोःक्योक लेःङ्गो ओःले ताःसे ख्याक्याला प्रचार पेःक्योक दीखोरा इःङे– कोन्ज्योरा ज्योती इःङे, ओःले खुङला तीबी चीगकाङ नाक्जुक म्याः। 6 उःक्या कोन्ज्यो ङीमु संगती पेःउए लाःती लाःकुए, इःनाङ उःक्या नाक्जुकलारा डोदेरा तेःसी लाःना नी उःक्याइ स्योप क्युःर्क्योक ओःङ्गुए ओःले उःक्याइ तेःन्दामगीइ मीःली अनुसार सेन्क्योक मेःयोङ्ए। 7 इःनाङ कोन्ज्यो ज्योतीला एःक्योक च्योःङ्रारा उःक्याङ ज्योतीला एः लाःना उःक्या चीगकीइ राःङ्सा ङीमु संगती ओःङ्गुए ओःले खुङगीइ पुः येशुइ ठाइ उःक्या थाम्जेरकीइ लाःयोक्याला चाङ्मा जोउए। 8 उःक्याइ राःङला लाःयो चीगकाङ म्याः लाःती लाःसी लाःना राःङगीइ राःङलारा स्योप क्युःर्कुए, ओःले उःक्याइ तेःन्दामगीइ ताम मेसेए। 9 उःक्याइ राःङगीइ पेःक्योक लाःयोक्या कोन्ज्योइ तोःङ्ला ङीःन्सी लाःना खुङगीइ उःक्याइ लाःयोक्या क्षमा पेःतेर्कुए, ओःले उःक्याइ पेःक्योक थाम्जेर माःताक्पाक्यालाःम्ले खुङगीइ चाङ्मा जोतेर्कुए, चीलेलाःना खुङ सेमल्हुक लुजेला डीक्पु एः ओःले खुङ ताःक्पा एः। 10 उःक्याइ लाःयो पेःदी म्याः लाःती लाःकुए लाःना नी उःक्याइ कोन्ज्योला स्योप्केरे जोउए, ओःले उःक्या ङीमु कोन्ज्योइ ताम मेःयोङ्ए। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.