KUKAMI AKINIU 4 - BAIBEL (BSI)

Elisha no Achimeu Kuphutsu

¹ Tungkupumi gholo milakhi nipu achimeu no Elisha lau wuno pi, “Akijeu, ikimi thivae! Nono ithi anike paye Alhou sukumsami lakhi ikemu pano timi lakhi pih puakeu huno ighipuzu ikimi pih tsumla aye inu hipama aqemi shipenike sawuvetsuni pi ani.”

² Pano iniju, “Oghenguno niye kiu shitsulopi kya? Ivilo pilo. Noye akilo kiu anikeno?” “Kiumu kuhae, ayibo lo oliv teli kitila akeu likhie,” ipi lino khochile.

³ Elisha no li vilo pi, “Okisughumi lau wuno tolukivi thaqhulo abohu khu kikepe qhilo.

⁴ Tishive kethiu onu nokuthu aki sholokuu ilono aki khavelo eno teli pesu ti abohu qolo lesu thulo. Chhive kemtsa tipaqo kutashi qhive ghi shilo,”

⁵ Ike atopuuno li nu pama sasu aki sholokuu ilo, ahukikha khave eno ali aghulo lo oliv teli akeu ikhiluno li nuno ali sughikeuqo lo lesuthu.

⁶ Kughou ali sughikeu kumtsu chhiwove keno, ali kutau ye anikeo kuhavea kyapi lino iniju. “Tino ashekhau shivae,” pi li nuli gholo milakhiuno khochile. Ikeulo olive teli huye qoipeghimove.

⁷ Lino Elisha tungkupuu lau wuke lono pano ishipi, “Wupuzu teli jeno opih ashe kumtsu lovelo. Achili aghikeu pisa pesu onuli pama sasu ililai xulu nani.”

Elisha ngo Shunem lo Atopuu

⁸ Ghulo lakhi Elisha ye topumi kinimi lakhino achekeu phu Shunem lo wu. Lino alibe chu penike pa-kusu, tinguno tilauye paye Shunem lo wuke kumtsulo li kilo wuno alibe chuche.

⁹ Lino li kimi vilo pi, “Timi hipau khuu alhokuthu hilehi ighicheni keno akimthemi pi niye thebei ithi ani.

¹⁰ Nikujo kunguu kudau abo aghulo lakhi kuto tsuno azua lakhi, akibepu lakhi, iqakepu lakhi eno akulubo ishi kutope qhitsunie eno kugho kughomu pano ni xuju ighikelo tilehi ngopenie.”

¹¹ Ghulo lakhi Elisha no Shunem lo ide ighino abo shitsukeulo akulho qhi-a.

¹² Pano pa qeu Gehazi kuno atopuu ku sasu ighilo ipi. Kughou lino ighikeno

¹³ pano Gehazi vilo pi, “Li vilo lino nikujono avehupu shi akeu kumtsu kutokughoi pe qhitsukeu lame niye li ghenguno kiu shitsu penishi anikela inijujulo. Liye ipelo akukau momu ghushimi shou Akijeu lau wuno atsakivi li ghenguno pitsupe nishi animala inijulo.” Lino khochile, “Ino avehupu shi akeu kumtsu hile iwu timiqo gholono anie.”

¹⁴ Elisha no Gehazi iniju, “Tishiaye niye li ghenguno kiu mlatsupe nishi ani kya?” Pano khochile, “Tishiaye, liye anu kuhae eno li kimiye muchomi shiva.”

¹⁵ Tileno “Li vilo ideighilo” pi Elisha no ahza tsu. Lino idechile ghino ahukikha kulaghilo puthugho

¹⁶ akelono Elisha no li vilo pi, “Toku hipa ghulokilo noye o-u lo anu lakhi khape kepushilu nani.” Lino akichiqhi pi, “O Alhou wu timio, oqeliu pishiqhi tsu kevilo.”

¹⁷ Ikemu Elisha no piketoi tokuu tipa ghulokilo liye kiptimi lakhi punuluve.

¹⁸ Ampe hami thiu, ghile tusholo anu ye inaqhe papuno ghilemi sasu alulo hu akeu juniye hu.

¹⁹ Zulekhavi lono pano igha papu vilo pi, “Ikutsu suanie, Ikutsu su anie!” Apuno aqemi lakhi vilo ishipi, “Anu xapusu paza lau wolo.”

²⁰ Aqemi huno anu xapusu paza lau ighi, ike pazano li lukobolo khapesu ngo akelono anu ye puchouno thive.

²¹ Lino pa xapusu Elisha zuabolo ilono alipalo qhive eno ahukikha khave no ipeve.

²² Tithiu lino li kimi ku puzu ishi pa vilo pi, “Aqemi lakhi pelono gadaha lakhi sasu hile ighi pelo. Niye tungkupuu Elisha lau wumasavea. Tolukivi thaqhulo niye kighithe ide ighini.”

²³ Li kimino iniju, “Kushiye ishino noye wumasakepu shive anikya? Hiye sabat pinye mu kumo Aqhi kithe pinye mu kumoe.” Lino khochile, “Kumu kumoe”

²⁴ Tishino lino gadaha shou iku iqaluveno aqeu ishi ahza tsu, “Gadaha no pokulupu thaqhu mighisu wulo eno ino ovilo pimoke loye asheshi kevilo.”

²⁵ Ike tishi susu Karmel tolo khile Elisha no akeno tipa alo wuve. Lino putou chephi lono Elisha no li ithuluve, ikehu pa qeu Gehazi vilo pi, “Julo, Shunem lono atopuu hu chenie!

²⁶ Li lau posu huno likimi eno li nu ye kumu shilusa mono animala iniju sughilo.” Lino Gehazi vilo thwokha kumtsu akivishi aniepi

²⁷ ikemu kughou lino Elisha tolukeno pa zulo pishiqho eno pa pukhu butsu. Ike Gehazi ye atopuu hachileveni shiae ikemu Elisha no pi, “Li lokutolo. Liye ighono amlo sa susu ighi akeu noye ithulu amokeshea? AMPEU ye hipau ghili ivilo kumu pipuamoe.”

²⁸ Atopuuno pa vilo pi, “Akijeu, niye ovilo anu lakhi khumoe? Niye ovilo ipishi qhitsu kevilo ipike kumo kesha?”

²⁹ Elisha no Gehazi lau ideghino pi, “Mtazulo, ikusu ikhiluno polo. Alalo khumu sasu kuptsanike ngo kevilo eno tsala khamino oputsa namu kumu khochile kevilo. Ikemu vejoi akilo poilono ikusu pesu anu shou bepesu ngolo.”

³⁰ Atopuuno Elisha vilo pi, “Xukuau MPEU ino huthuchekeu oje lono eno ozu lono pi anike niye ophemoe!” Ike pano ithughino li sasu woe.

³¹ Gehazi no azuuno pohuno Elisha kusu pesu anu shou bepesu ngoju ikemu kumu shimo eno atuthu mu shemoe. Tighenguno paye idechilesu Elisha lau ighino pi, “Anu ye ithughimoe.”

³² Kughou Elisha no ighikeno, pa likhi azuabolo ilo eno anu ye alipalo thiaghikeu ithulu.

³³ Pano akikha khave eno AMPEU vilo inikhu.

³⁴ Tishino pano alipalo ikuno anu shou zu, pa kichi ngo anhethi ngo au ngo ishi pesu anu kichi, nhethi eno aulo kitheghi kuvape ihozu. Tishi akelauye anu phi luvuyi ipeghive.

³⁵ Elisha no ithughino azuabolo iqhoiqiju ano itaghi anu vapesu ihozu. Ikelaye anu ghuthu tsuni hachhi shi ithughino anhethi tsukholuve.

³⁶ Elisha no Gehazi kuno anu paza kusaghilo pi. Kughou lino iloghikeno, pano li vilo pi, “Onu hi salulo.”

³⁷ Lino Elisha pukhu philo ayeghi di ghi itsaqitsu; tishiveno lino li nu sawuve.

Akumzapu Kini

³⁸ Ghuthu lakhilo, ayeghi kumtsu lo puqumiyekeu ighike lono Elisha ye Gilgal lo idewove. Kughou pano tungkupumi aloji lakhi shika akeno pano pa qeu vilo ali kije lakhi amilo pepukuno akulhozu shipesu panongu piyelo ipi.

³⁹ Panongu gholo milakhino wuno aghatsuni sughinike wu. Pano agha tsuni sughi eno apoxi kutomo pano pukulu thaqhu xopusu ighi. Pano tipaqo sughino yethapiniyi shino akulhozulo su, paye tipaqoye kiu keno mthano ae.

⁴⁰ Akulhozu lephe pesu timiqo pelo yepeniye sutsu, ikemu panonguno micheju kelauye akichiqhi Elisha vilo pi, “Hiye tughuke, hiye khilemu chusumlae.”

⁴¹ Elisha no alibe hami khuno pesu alilo su eno pi, “Akulhozu alau lesuno panongu tsulo.” Tishikelaye kumu shipusakeu shimove.

⁴² Ado kutau lakhilo, Baal-Shalisha ipikeu lono ighikemi lakhino asho thi kitheno shikeu sho apa muku eno khalakithi kughunu ishi pesu Elisha tsu ighi. Elisha no tipau pesu tungkupumi lojilo ipi pa qeu vilo pi,

⁴³ ikemu pano khochile, “Hiye timi 100 ghenguno kughomo nanipi kumsu anike sha?” Elisha no khochile, “Panongu pelo chukepushi tsulo, kughengu AMPEU no pi anike panonguno chue pinamu itaghi achili kutomo qhive nani,” ipi.

⁴⁴ Ikehu aqeuno panongu zulo achuqupu kutopesu qhitsu eno AMPEU no pipuaketoi, panongu kumtsu no chuamu chukhamono achili shi pesu qhive.