HAGAYI 2 - BAIBEL (BSI)

Achineki Akitheu Jukivi

¹ Darus no akukatou shikeu ampe akiniulo aqhi akutsuniu, atsala muku lakhi shiakelo, AMPEU no itaghi tungkupu Hagayi vechewo pipuwu.

² AMPEU no Hagayi vilo Juda lo ahng Zerubabel ngo Achinetou Joshua eno timiqo vilo ishi pilopike,

³ “Nongu gholo khualano Achinekiye kiutoi jukighilepu shi achekeno itaghi kumsuchilelu nani ma? Itehi tipauye kiutoi ani keno nonguye kishi ithulu ani kya? Hiye kiumu kumo kughashi kumsu aghiluvi.

⁴ Ikemu nongu gholo khuumu itehiye aghuthi suve kevilo. Akumla shilo kughengu ino nongu sasu anike.

⁵ Nonguno Ijip lono ipeghikelo niye pulhapuju nongu sasu anani kepi tushoqhike. Niye nongu sasu aphike ghenguno musa kevilo.

⁶ “Kushuwa womono ino atsutsu ngo ayeghi, azughi eno ayeghi sukini nani.

⁷ Ino ashiayehqo kumtsu kusuleve nani eno panoqo wu kinikuluye hile peighi nani eno Achinekiye akinino chhitoive nani.

⁸ Ayeghiqhalo shunayi eno tsandiyi akeu kumtsu iwuke.

⁹ Achineki akitheuye aqau nguno alau jukighilepu shi nani eno tilehino ino iwu timiqo pelo kinikulu eno alokughuno shipe nani.” Aqokitikhi MPEU no piqhivae.

Achinemi sasu Kuptsakile

¹⁰ Darus no akukatou shikeu ampe akiniulo aqhi atokuu atsala muku abidiulo Aqokitikhi MPEU no itaghi tungkupu Hagayi putsa.

¹¹ Pano pi, “Achinemi vilo hipau kishi xatha nani keno inijulo.

¹² Kumsujukelo aghashikeu lono ashi leqhi lakhi timi lakhino ikhi pesu pano miniakeu phi lono ghopusu ani eno pa phiminino asho momu lhopuakeu chuqupu ngo aji ngo oliv teli momu achuqupu kiu kiumu dive aye tipaqo ghi shikimithevea kesha?” Hipau pesu achinemi inijukelo panoqono khochile, “Moe” ipi.

¹³ Tileno Hagayi no iniju, “Kumsuju kelo timi lakhino akithi kumo diluni eno achine kitiqeveni, tithiu pano achuqupu hupaqo dilu aye tipaqo ghi achine kitiqeve akesha?” Achinemiqono khochile pi, “Tishie.”

¹⁴ Tileno Hagayi no pi, “AMPEU no pianike timi hipaqo eno hipano shiayeh ghi izulo tipaphike eno panonguno kiu mlaqhini keno tishive anie; ike panonguno akumlla kiptialo mllakeu kumtsu kitiqevae.”

AMPEU no Kukumgha Piqhi

¹⁵ AMPEU no pi, “Nongu shou kiu shive keno ithumla kesha? Nonguno Achineki shikithe puku mphilo

¹⁶ nonguno athi pekutsu puakeulo wuke eno tipaulo athi kilogram 200 aghi nani kepi lajuake ikemu 100 likhi aghive. Nonguno atu tughukolo atsayiji liter 100 sholuniaye wuke ikemu liter lhobidi likhi aghi cheni.

¹⁷ Nonguno pukaputsa puzu mlapheakeu kumtsu shipusave tsunike pughaqhikeu mulhu ngo apughu ino puwuke, ikeghi nonguye xachile ighi moke.

¹⁸ Ishi tsalaye Achineki boqha shikhaluve keu hi aqhi atokuu eno atsala muku abidiu tsalanike. Hinguno hilau kiu shi nani keno jualo.

¹⁹ Itehiye athi kuhavea eno atsayibolo, khughuthibolo, khaghatubolo eno oliv subolo alothi pithimphi kemu itehi nguno hilauno ino nongu kumghatsu nani.”

Zerubabel vilo Piqhi

²⁰ Tipa tsalani, aqhi atokuu atsala muku abidiulo AMPEU no atsape akiniu Hagayi tsu,

²¹ tiye Juda lo ahng Zerubabel ghenguno tsuke. “Niye atsutsu ngo ayeghi sukini nicheni

²² eno akukaqhaqo xaleveno panoqo kuka kishekhave tsuni. Ino khurkulu ngo tipau sakicheu tukidevetsu nani; khurshi qoye thive nani eno tipaqo shou ikuchekemiqoye lakhino lakhi pithikileve nani.

²³ Tipa tsalalo ino iqeu Zerubabel salu puzu ije lono ayehpe penike ino pa susu nani. Ino kishelukeuye Zerubabel ke.” Aqokitikhi MPEU no piqhivae.