Apostolmi 25 - BAIBEL (BSI)

Paul no Rom Kukau Zulo Wu

¹ Festa ye pano ayehpeni keualo ighikeu atsala kuthu thiu Kaisaria lono Jerusalem lo iqho.

² Tile achinetomi eno Judami sakiphemino Paul shou atsakugha akeu pa lau peighi. Eno panonguno Festa vilo qhuiniju keuno,

³ panongu pulou shitsu ghi Jerusalem lo Paul puqhotsu lepi, tishianguno Paul no alalo chekelono miqe-ano pa pithivenike akukughu shipe ae.

⁴ Festa no ishi khochile: “Paul ye Kaisaria lo akughu shipe puani, eno niampino tilau itheno ideiqiveni cheni.

⁵ Ike nongu gholo amipemi shichekeqo igholono iqighi pelo eno timi huno kiuala mla-pusa puaghi aye pa nguku pelo.”

⁶ Festa no atsala toku chighi-a kutolo panoqo gholo ngove puzu Kaisaria lo ideiqive. Tishiwo thoghiu, pano kughaki khachelo iku iqano Paul sasu iloghilo pi ahza tsu.

⁷ Kughou Paul no ighi keno, Jerusalem lono Judami iqighi keqono pa suhope puthugholuve eno pa shou shishe ngukukeu kutomo pithuve, ikemu panonguye tike-hike pi chixechileyi pikulupu kiumu kuhake.

⁸ Paul no pa likhi pa shokhakeu tsa hitoi pi: “Judami yezah shou mu, Achineki shou mu, Rom kukau Kaisar shou mu niye kiumu akumou shipe puamoe.”

⁹ Festo no Judami pulou shitsunishi kelauno Paul vilo pi, “Noye Jerusalem lo iqho puzu hi onguku akeu izulono xathanishi anima?”

¹⁰ Ikemu Paul no pi, “Niye Rom kuka wu kughaki zulo puthugho ani, eno tileno ishou xatha kuzupuke, ikemu Judamiqo shou niye kiumu pimi puamoe, tiye noampino akivishi ithi ani.

¹¹ Ino ayezah hephove puaghi eno thive kuzupushi mla puaghi aye, niye tipau lono poluvepe nikeu khuamoe. Ikemu panonguno ingukube akeulo kuchou kumo shi aghiaye, timi khumu ikughape panoqo ulo suvetsumlae. Niye Rom kukau Kaisar launo xathanikeu khuani.”

¹² Tileno Festa no pa lau akukumsu tsuchekemi sasu kuptsakile kethiuno ishi khochile, “Nono Rom kukau Kaisar launo xathanikeu khu ani, ikehu Rom kukau Kaisar lau noye wuniae.”

Agripa ngo Bernika zulo Pi

¹³ Ado kushuwa kumolo akukau Agripa ngo Bernika pamaye Festa ikhikulu shinike ghenguno Kaisaria lo ighi.

¹⁴ Pamano tile atsala kutomo ngove kethiu, Festa no akukau vilo Paul tsakukugha akeu vehu pesu ishi pi: “Hile timi lakhi Feliks no akughushipe puaghikemi ani.

¹⁵ Ike kughou ino Jerusalem lo wukeno Judami gholo achinetomi ngo muchomiqono pa nguku akeu vehu pesu ilau ighi, eno ivilo pa shou kughathabeve tsulopi iniju.

¹⁶ Ikemu ino panoqo vilo pivekeuno Rommi khuayeh lono timi khuu nguku ani keno tipauno pa ngukuakeqo sasu kinheqhi kusho puzu kiu ghenguno pa nguku anikeno tipaulo pa likhi pa shokhajupe mokeloye kutami ulo phesuve chemoe ipive.

¹⁷ Kughou panonguno kumtsa hile ighikeno niye kumu ado kumnutsu moe, ikemu tishiwo thoghiuye kughaki khachelo ngo puzu timi hu sailoghi lopi ahza tsu.

¹⁸ Pa nguku akeqono puthugholuve, ikemu panonguye kiuala ghiqhi- heqhikeu lhoksa ghenguno pa nguku puaghi nani kepi ino kumsu akeu lakhimu pesu nguku moe.

¹⁹ Ikeuloye panonguno pa sasu kutsala kilekeuno pano pu-asu tsa hami ghenguno eno thivekeu Jisu ipikeu ghenguno shiaghi, ike Paul no pichekeuno Jisu ye xuaphi kepi tsatsayi pi achenike.

²⁰ Ike hipau vehu kiu gholauno phukide kudaju kepu keno niye xathamla kepu shive kehu ino Paul vilo paye Jerusalem lo iqhono hi pa nguku akeu ghenguno tilano kughathanike pulo anima pi iniju.

²¹ Ikemu Paul no kughathatsulepi khukeuno pa khepe qhipuaghino Rom kukau Kaisar pelo pa tsakugha xathatsu pelo pi. Ike ino Rom kukau Kaisar lau pa puwu moke kuto akheuno pa khe ghi aghipenikeu shi ahza tsuvae.”

²² Agripa no Festa vilo pi, “Ni ampino timi tipauno kiu piani keno chilunishi anie.” “Noye thoghiu pa tsa initsukepu shilu nani” ipi Festa no khochile.

²³ Thoghiu Agripa ngo Bernika pamaye ananuno qhivutsuni susu pepuno ghushimi atomi ngo aphughilo sakiphemiqo ishi sasu akhache lo ikue. Festa no ahza tsukeulo Paul sasu iloghi.

²⁴ Festa no pi, “Akukau Agripa, eno hile khijehino ningu sasu ani keno, nonguno timi hipau ithulu ani ike Judami Jerusalem lo akeqo ngo hile akeqo kumtsuno pa shou muchho akeu ilau peighi. Panonguno asheshu ighakeuno timi hipauye khilemu xuape kepu kumoe pi.

²⁵ Ikemu ino phujukelo paye pithive kuzupu kiumu shipe puamoe. Rom kukau Kaisar pelo pa tsa xathatsupelo pi pa ampino khuke ghenguno pa puwunikeu ino xathave tsuae.

²⁶ Ikemu niye Rom kukau Kaisar lau pa vehu mutsumisheikeu kiumu ye kepu kuhano ani. Ikehu hile nongu zulo ino pa saighi ani, eno akhotoshi Akukau Agripa zulo saighi ani, tishianguno pa tsakugha akivishi phukide kudajuve kethiuno kiuala likhimu ino yepuwu kulupu shini mala yeke.

²⁷ Kughengu akughumi lakhi shou kiu ghenguno atsa kugha anikeno mutsuqhei shitsumo puzu puwunikeuye isheloye tiye achipi kumoe.”