Titus 1 - Sümi Tiqhelimi Bible

¹ Paul, Alhou qeu eno Jisü Khristo’w apostol lakhi, Alhou no kisheve kemi küpülü pekho eno Alhou sükümsa lo sawu chekeu kuchou kighithi—

² lhokta küxü lo lajupu akeu, khikhi mikí chemo keu Lhou no mulho ghuloki lono piqhipüa keno,

³ eno khikhi itehi, Alhou no püghüpe qhi keu süchedo lono, ninguw xakuluu eno Alhou zakütsü tsü keu vechewo akükütsü I pichetsü keu hu pa no aküvü lo pephe tsüke.

⁴ Titus lau yè ani, nikujo aküpülü lono lakhi shi akeu vechewo no ye I nu kuchou ke: Apù Alhou eno Khristo Jisü, ni Xakuluu lau no ighi keu küpükini eno aloino keu ow shilu peniu.

Akivi Kimiye chekemi Kichimiqo Süküsü Shilu keu.

⁵ I no Crete lo O qhive keu kimiji ye O pelo püzüu shikha müla no qhive keqo akikithi kivi shive no mishiphu kümtsü lo I no O vilo kichetsü keu toi kichimiqo süküsü shive peniye ke.

⁶ Kichimi lakhi ye tukutiye küha kemi, pa nipu lau amikucho shi chekemi shi aghí moayesa, pa nuliqo ye küpülümi shi aghí moayesa eno ghasü kümlà momu aghokulu kumomi shikepu kumoe.

⁷ Akukuho lo sakiphemi lakhi ye Alhou kibo jukütsü ani kehu, pa ye tukutiye küha kemi shi aghí moayesa, amlo-idekalo kemi shimoni, aji shokümzümi shimoni, mutomushu kemi shimoni momu amikucho kumo lono alá shive niye phu kemi shimoni.

⁸ Ikemu, pa ye inami sasükinimi shi aghí moayesa, kiu no alo keno kimiye chekemi, alikhi aghasü kulumi, amikuchomi, akimthe eno aghokulumi shi aghí moayesae.

⁹ Pükhükulu kükütsü tsa shikave keu hu pa ye tipau mutotoi pelu aghí moayesa, tishianguno pa pelo mütsümishei keu külü pesü timi kütamiqo shikumto tsü eno tipau lachile kemi ghasülu peniye ke.

Akümlà Kivi Shimlave Keqo Lomipi Keu

¹⁰ Kughengu hebide chekemi kutomo ani, ameküha keu küküpütsa eno pishikiqhi no chhitoi akemi, tiye akhotoshi aphighüyiko-küghá mqo lo akemiqo ke.

¹¹ Panongu ghasüve moayesa ani, kughengu panongu no akibo kümtsü lo ilo no shikamo kepu thimeqo pesü shika no kübangüve tsü ani—eno ti ghí amikucho kumo lono alá shini keu ghenguno ke.

¹² Hipau vehu lo Crete lo küami tungkupumi lakhi no ishi pipüani: “Cretemiqo ye alhoaye lono kimkimi, küsakügha tüghashiqo, eno akipichimi mihemüzai keqo ke.”

¹³ Küghakiche hipau ye kuchou ke. Tighenguno panongu vilo mükamüghai alomipi lo, tishianguno panongu pelo panongu küpülü lo thebeilu pe

¹⁴ eno Jewmi’w küghakicheqo momu kuchou milive chekeu timi zakütsüqo lo amlo tsümoni.

¹⁵ Amlo kimthemi ghengu ye thowkha kümtsü akimthe ke, ikemu shikuchubeve kemiqo ngò pülümo kemiqo ghengu ye kiumu akimthe kühae. Kuchou no, panongu kükümsü ngò alolo kighithi kinikujo shikuchubevea.

¹⁶ Panongu ye Alhou ithi ani ipi pükha cheni, ikemu panongu kümlà vechewo Alhou milive acheni. Panongu ye aphikümqhüpu, agholumo kemi eno akivi shini keu lo kiumu aküzüpu kumoe.