Jude 1 - Sümi Tiqhelimi Bible

¹ Jude, Jisü Khristo qeu eno James thiküzüu lakhi, Khunoqo kulùvea, khunoqo no Apù Alhou vechewo kimiye cheni eno Jisü Khristo ghenguno ghüpe qhivea keno tipaqo lau yèlu ani:

² Kimiyekini, alokughuno eno kikimiye kupukuno shi nonguw shilu peniu.

Alhou Kümthamiqo Xiné eno Aküxü Shekha

³ Kimiye chekemi shompamiqo, ni ye nongu lau ningu no xakulu küsaje akeu ghili yè nishiqhiyi akemu, ni ye nongu lau Alhou’w akimthe timiqo lau ghuthukhavi ghenguno aküpülü pichetsü keu vehu lo yè eno nongu pelo tipau kütsala penike hakite ani.

⁴ Kughengu püzüu timi khami kiléqhive keu ghili yèpüa keu ye nongu dolo tuqhou no küzü-kugho shi iloghivae. Panongu ye alhou kümthamiqo ke, panongu ye xüküpsa kümlà shini keu ghenguno ashepe pesü ningu Lhou’w küpükini lakha cheni ke eno ninguw Akughushuu eno Ampeu lakhi likhi akeu Jisü Khristo mili acheni ke.

⁵ Nongu ye hipau kümtsü ithi ani kemu ni ye ghuthu lakhi pikithe nishi ani, ike tiye Ampeu no ghuthu lakhi Egypt lono paw timiqo xaphelu ke, ikemu kutou ye khunoqo no pülümo keno tipaqo kütsave ke.

⁶ Eno kungumi khipaqo no panonguw kükagha-a pe müla püzü panonguw achipi kungo-a qhive cheni keno—pa no hipaqo àküzǘ lo qhive ke, tipaqo ye lhokta yikichhe pesü küghakütha Tsalá kijè ghenguno tshüve cheni.

⁷ Tipau ghola lono, Sodom ngò Gomorrah eno tipau sükümxa lo mishiphuqo ye kipito xüküpsa ngò kimthe kumo lau panongu likhi panongu pesü tsüke. Panongu vechewo no lhokta miyizü ghime kütsüw kiche-kipiye lakhi shitsü ke.

⁸ Tipau tho lono, alhou kümthami hipaqo ye panongu samoqo kumto pükhü pesü panongu likhi panongu phimpi shikuchube, kükagha milive eno kungugha lo küamiqo shou pipütha puku cheni.

⁹ Ikemu kungumi gholo atou Michael kutólo kughou pa no Moses sükumo ghenguno tüghami sasü kütsala akeno, pa ye tüghami no pipütha ke ghenguno pa likhi pa kiléqhi nikeu akumto shimoe ikemu, “Ampeu no O lomipi nani!” ipi ke.

¹⁰ Ikemu timi hipaqo ye panongu no vethamla keu kümtsü lo shipütha cheni, eno panongu ye kiqiphekümla lhoxü toi akutoshikighithi vechewo panongu no vethamla keu thime hipaqo no panongu kütsakungove nani.

¹¹ Panongu ghengu ye ahaküsapu ke! Panongu ye Cain laghi lo checheni ke; panongu ye mighisü alá shini ke ghenguno Balaamw shikipimi shivae; panongu ye Korah’w hekibide lono kütsakungovae.

¹² Timi hipaqo ye nonguw kikimiye ghulhuqo lo tichetighepuqo ke, panongu ye kitilamu kujomo no nongu gholo chu cheni—panongu ye ambe khemi khipaqo no panongu likhi panongu lojí cheni keno tipaqo ke. Panongu ye tsütsüghu ghuqhi chemo keu khüngküsü ke, tiye amlhü gholo no fupe wuve cheni; panongu ye tixi süboqo ke, tiye axathi pithímo no nhüve cheni—eno akiniù thi ideve ketoi ke.

¹³ Panongu ye azüghi zü fukukucho kighide toi panongu kukujopu mülaghubei ipeghi cheni; panongu ye itsükiche yepuqo toi ke, alhokupuju ghenguno panongu sala àküzǘ kuthò ghüpe püani.

¹⁴ Enoch khuu Adam lono tiqheli akütsüniu keno, pa no panongu ghili tungkupu tsa kütüghü pe püake: “Julo, Ampeu ye pa gholo paw akimthemi qhethonhe no qhethonhe küghüsü sasü

¹⁵ kümtsü shou küghathabe niye cheni, tiye panongu lhou kümtha vechewo alhou kümtha kümlà küxü ghenguno panongu kümtsü akipimí tsü niye, eno alhou mtha kemi axinemiqo no pa lau lakichile tsa pikeu ghenguno ke.”

¹⁶ Timi hipaqo ye nhenheshi chekemi eno akipimí phu chekemiqo ke; panongu ye panongu likhi panonguw küsakügha kükümsüqo pape cheni ke; panongu ye pano likhi pano jupe qheza cheni eno panongu ye pano kivipu ghenguno kütamiqo sheqhe cheni.

Tsükhoi shipe nike Ghutu keu

¹⁷ Ikemu kimiye chekemi shompamiqo, ningu Mpeu Jisü Khristo’w apostolmiqo no azüu no kiu pipüa keno kümsülulo.

¹⁸ Panongu no nongu vilo ishi pi, “Ashekha ghuloki lo timi jukünatha chekemi khunoqo no pano likhi panonguw alhou sümo keu kükümsüqo pape cheni keno tipaqo ipeghi nani.”

¹⁹ Timi hipaqo ye nongu dolo kijetha tsü chekeqo ke, panongu ye aje no alhoaye lo akutoshikighithi pape cheni eno Aghungu küha ke.

²⁰ Ikemu nongu I no kimiye chekemi shompamiqo, nongu ye nongu küpülü shishe akimtheu shou qhi keu eno Aghungu Kimthe lono inikhu keu vechewo nongu küxü shiqhepuku lo,

²¹ eno nongu no ningu Mpeu Jisü Khristo no nongu lau lhokta küxü süghi niye akeu huqhe ake dolo nongu likhi nongu pesü Alhou’w kimiyekini qholo qhilo.

²² Khunoqo no lipi cheni keno panongu lau kimiyeqhiyi shilo;

²³ ami lono kütami sünhephe no panongu xalulo; kütami lau kimiyekini pìyelo ikemu kutokupuyi shi püzü panongu xiné no shikuchubeve keu phimini eno aphimpi kutólo jukuchube lo.

Shikimthi Le

²⁴ Itehi ye pa khuu nongu pelo veqhive pemo no nongu süsho kulupu ani eno nongu pesü pa juküvü zülo akipimí küha no alokiqi kijè lono süghi küpülü akeu lau—

²⁵ ningu Mpeu Jisü Khristo vechewo ningu Lhou ningu Xakuluu lau ajekipi, akughushu, aküka eno ayekipe, wove keu tiqheli kümtsü züu, itehi eno alhokupuju kutólo apeniu! Amen.