1 John 1 - Sümi Tiqhelimi Bible

Aküxüpu Tsa no Ashi Shive Keu

¹ Inahuu abothu lono aküxüpu Tsa khikhi acheghi, ningu no chiluvea, ningu nhethi no ithuluvea, ningu no jupukulu eno khikhi ningu u no buluvea keno hipau vehu lo ningu no asheshu ani.

² Aküxü hu ipeghi ke; eno ningu no tipau ithuluve no thopi shi cheni, eno ningu no nongu lau lhokta küxü hu asheshu acheni, tiye Apù gholo ache no ningu lau ipeghi keu ke.

³ Ningu ye ningu no kiu ithuluvea eno chiluvea keno tipau pesü nongu lau asheshu acheni, tishianguno nongu ghí ningu gholo kuposhulu peniye ke. Eno ninguw kuposhukulu ye Apù gholo eno pa Nu Jisü Khristo gholo ke.

⁴ Ningu no hipau nongu lau yèlu akeu ye ningu lokivi shikupulu niye ke.

Aküvü eno Àküzǘ, Axiné eno Akipimí Qhikütsü

⁵ Hiye pa lau no chilu keu kükütsü tsa ke eno nongu lau shuphe ani: Alhou ye aküvü ke; pa lolo ye àküzǘ kitilamu kühae.

⁶ Ningu no pa sasü kuposhu cheni ipi pükha aghí namu àküzǘ lo xü aye, ningu ye mikí ani eno kuchou shi xülu chemoe.

⁷ Ikemu pa no aküvü lo akeu toi, ningu no aküvü lo xü aye, ningu ye lakhi no lakhi sasü kuposhu ani, eno pa Nu Jisü jì no axiné kümtsü lono ningu shikimthe tsü acheni.

⁸ Tsalá ningu no axiné küha kepi pükha aye, ningu ye nilikhi ningu pishiqhi ani eno kuchou hu ye ningu lolo küha ke.

⁹ Alhou ye pükhübekulu eno achipiu Lhou ke ningu no ni xinéqo piphe aye pa ye ningu xinéqo qhivetsü nani eno amikucho kumo jeli kümtsü lono ningu shikimtheve tsü nani.

¹⁰ Tsalá ningu no axiné shichemo kepi pükha aye, ningu ye pa pesü kimkimi lakhi shive tsü ani eno pa tsa ye ningu lolo kühae.