irmiyah 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aẓlay n‑irmiyah

¹ iwaliwn n‑nnabi irmiyah yus n‑ḥilqiyah lli‑igan yan ġ‑imsakmurn n‑rbbi ġ‑tmdint n‑ɛanatut ġ‑wakal n‑bnyamin.

² ar‑d‑ittaški‑wawal n‑sidi rbbi i‑irmiyah ġ‑usggʷas wis kraḍ d‑mraw (13) n‑tgldit n‑yušiyah yus n‑amun agllid n‑yahuda.

³ ar‑as‑d‑sul‑ittaški ġ‑uwssan n‑yahuyaqim yus n‑yušiyah agllid n‑yahuda, ar asggʷas wis yan d‑mraw (11) ġ‑tgldit n‑ṣidqiyah yus n‑yušiyah agllid n‑yahuda, ar akud lliġ akufn imzdġn n‑urušalim [s‑babil] ġ‑wayyur wis smmus.

⁴ yuška‑yyi‑d‑wawal n‑sidi rbbi yini‑yyi:

⁵ «ur‑ta‑k‑skirġ ġ‑waḥlig n‑innak, a‑k‑ssnġ. ur‑ta‑tlult, a‑k‑giġ d‑winu, ẓliġ‑k a‑tgt nnabi i‑ayt‑tmizar n‑ddunit.»

⁶ imma nkki rurġ‑as: «aḥḥ a‑sidi rbbi‑nu, ur‑ssinġ mamnk ad‑sawalġ ašku ġir afruh̬ ad‑giġ.»

⁷ walaynni inna‑yyi‑d sidi rbbi: «ad‑ur‑ttinit ‹ġir afruh̬ ad‑giġ›, ašku kullu wanna‑s‑k‑uznġ, ra‑dars‑tddut, ar‑tsawalt s‑kullu ma‑f‑k‑uṣṣaġ.

⁸ a‑ur‑tn‑tiksaḍt, ašku lliġ bdda dik a‑k‑jjnjamġ. inna‑t rbbi da‑bdda‑illan.»

⁹ imdi‑d ilmma sidi rbbi afus‑ns, iggr‑d i‑imi‑nu yini‑yyi: «hati giġ awal‑inu ġ‑imi‑nk.

¹⁰ ẓr ġassad giġ‑k f‑tmizar ula tiglday, a‑tssukuft ar‑tssknukit, ar‑trẓẓat ar‑th̬llut, ar‑ttẓẓut ar‑tbnnut.»

¹¹ yašk‑iyi‑d‑wawal n‑sidi rbbi isqsa‑yyi: «ma‑tẓrit, a‑irmiyah?» iniġ‑as: «ẓriġ yan‑uṣṭṭa n‑lluz.»

¹² yini‑yyi‑d sidi rbbi: «tʷġẓant, ašku iwzġ f‑wawal‑inu a‑t‑ssafuġ.»

¹³ isawl‑iyi‑d daġ sidi rbbi isqsa‑yyi: «ma‑tẓrit?» iniġ‑as: «ẓriġ yan ikin ar‑isyas, hatin imiyyl‑d zġ‑ššamal.»

¹⁴ yini‑yyi‑d sidi rbbi ġakudan: «ra‑d‑iffi ššrr zġ‑ššamal f‑kullu imzdġn n‑wakal‑ad.

¹⁵ ašku ha‑yyi ra‑n‑ġrġ ġilad i‑kullu tiqbilin n‑tglday n‑ššamal. inna‑t rbbi da‑bdda‑illan. imikk rad‑d‑aškin, ssbiddn kullu lɛruš‑nsn ġ‑imawn n‑urušalim, sutln i‑igudar n‑tmdint ula kullu timdinin n‑yahuda.

¹⁶ rad‑utġ lḥukm f‑mddn‑inu, ašku ʷh̬šnn sri bahra. fln‑iyi ar‑tbh̬h̬arn i‑id‑rbbi iġribn, ar‑tɛbadn ġaylli ɛdln ifassn‑nsn.

¹⁷ «imma kiyi, ass taggʷst‑nk tnkrt, tinit‑asn kullu ma‑f‑k‑uṣṣaġ. a‑ur‑zġ‑gisn‑tḥššmt a‑ur‑imil ssḥššmġ‑k ġ‑darsn.

¹⁸ ha‑yyi giġ‑k ġassad d‑tmdint ilan agadir, d‑uɛmud n‑uwzzal, d‑uġʷrab n‑wanas, baš a‑tbiddt tzgat ġ‑wammas n‑tmazirt‑ad kullutt, ġ‑lgddam n‑igldan n‑yahuda d‑iriyasn d‑imsakmurn n‑tgmmi tamẓlayt ula kullu imzdġn n‑tmazirt.

¹⁹ rad‑dik‑mmaġn walaynni ur‑ra‑k‑nrun, ašku lliġ bdda dik a‑k‑jjnjamġ. inna‑t rbbi da‑bdda‑illan.»