danyal 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yakuf danyal s‑babil

¹ asggʷas wis kraḍ ġ‑tgldit n‑yahuyaqim agllid n‑yahuda a‑d‑yuška nabuh̬adnaṣr agllid n‑babil s‑urušalim igli‑tt.

² ifk‑as rbbi‑nġ ġ‑ufus‑ns yahuyaqim agllid n‑yahuda ula kra ġ‑irukutn n‑tgmmi n‑rbbi. yawi nabuh̬adnaṣr irukutn‑an s‑tgmmi n‑rbbi‑ns ġ‑tmazirt n‑šinar [babil], ig‑tn‑in ġ‑lh̬zin n‑rbbi‑ns.

³ izayd‑ugllid nabuh̬adnaṣr, yuṣṣa ašfanaz angabal izuzln n‑tgmmi‑ns yini‑as: «awi‑yyi‑d kra ġ‑ayt‑israyil zġ‑tawjja n‑ugllid ula zġ‑tawjjiwin n‑inmġurn n‑tmazirt.

⁴ ad‑gn iɛzrin iban‑gisn‑ufulki bla kra inaqṣn i‑iẓri, gn wid mi iḥarš lɛaql‑nsn ad‑tlmadn taḥkimt ula tawassna, baš ad‑iẓḍarn i‑twuri n‑lqṣr n‑ugllid. tsslmdt‑asn arratn d‑iwaliwn n‑ayt‑babil.»

⁵ yuṣṣa‑fllasn‑ugllid ad‑asn‑ttyawfka lmunt n‑kraygatt ass zġ‑umššu n‑ugllid ula zġ‑waman n‑waḍil iktin lli‑issa. kraḍ isggʷasn a‑rad‑tlmadn, bdun ilmma ar‑tqasan agllid.

⁶ yili kra ġ‑gratsn zġ‑tqbilt n‑yahuda. gan ntni danyal d‑ḥananyah d‑mišayil d‑ɛzaryah.

⁷ ig‑asn‑uriyas n‑tgmmi ismawn yaḍni. danyal iga‑yas ‹balṭašaṣṣar›. ḥananyah iga‑yas ‹šadrah̬›. mišayil iga‑yas ‹mišah̬›. ɛzaryah iga‑yas ‹ɛabd‑nagu›.

danyal izzga ġ‑uwl‑ns

⁸ imma danyal izzga ġ‑uwl‑ns a‑ur‑itndas ih̬f‑ns s‑umššu imimn n‑ugllid ula s‑waman n‑waḍil iktin lli‑issa. iḍalb i‑uriyas n‑tgmmi a‑t‑yadj a‑ur‑itndas ih̬f‑ns.

⁹ danyal, ifka‑yas rbbi rrḍa ula lḥnant ġ‑dar‑uriyas n‑tgmmi,

¹⁰ ijawb‑uriyas n‑tgmmi i‑danyal ġakudan yini‑as: «hati ksuḍġ zġ‑sidi agllid lli‑yuṣṣan f‑umššu‑nun d‑tissi‑nun. iġ‑idda ard iẓr udmawn‑nun ḍɛfn ġ‑gr iɛzrin inggʷan‑nun, is‑ur‑ra‑ibbi ih̬f‑inu f‑ssibt‑nun?»

¹¹ iddu danyal ġakudan isawl s‑uh̬ddam lli‑iẓli‑uriyas n‑tgmmi a‑itqasa danyal d‑ḥananyah d‑mišayil d‑ɛzaryah, yini‑as:

¹² «arm‑aġ a‑sidi mraw‑uwssan, ar‑aġ‑takkat lh̬ʷḍrt ma‑nštta d‑waman ma‑nssa.

¹³ tssmuqqlt ilmma ġ‑lḥalt‑nġ ula lḥalt n‑iɛzrin yaḍni lli‑išttan zġ‑umššu n‑ugllid. tskrt ginġ ġakudan mknna‑yak‑ibann.»

¹⁴ imšaška‑d didsn f‑mayan, yarm‑tn mraw‑uwssan.

¹⁵ lliġ zrin mraw‑uwssan, ar‑tbann‑uwdmawn‑nsn fulkin jjin uggʷar n‑iɛzrin kullutn lli‑išttan zġ‑umššu imimn n‑ugllid.

¹⁶ izayd‑ilmma‑uh̬ddam‑an ar‑asn‑issinif taġamt‑nsn zġ‑umššu imimn d‑waman n‑waḍil iktin, ar‑asn‑yakka ġir lh̬ʷḍrt.

¹⁷ kkuẓ iɛzrin‑an, ifka‑yasn rbbi lɛaql d‑lḥrušiyt ġ‑kullu ma‑igan tiġri ula tah̬kimt. danyal iga nttan afhim ġ‑kraygatt kra igan tawargit ula tawaẓrit.

¹⁸ zrin‑uwssan aylliġ‑di‑tlkm tizi lli‑f‑yuṣṣa‑ugllid a‑n‑šškšmn iɛzrin kullutn s‑dars, yawi‑tn‑uriyas n‑tgmmi s‑lgddam n‑nabuh̬adnaṣr.

¹⁹ lliġ‑didsn‑isawl‑ugllid, ur‑gisn‑yufi ma‑yugʷrn danyal d‑ḥananyah d‑mišayil d‑ɛzaryah. bdun ntni ar‑tqasan agllid.

²⁰ kra igan taḥkimt ula tafhimt nna‑ġ‑tn‑isqsa‑ugllid, yaf‑tn‑in ugʷrn s‑mrawt‑twal kullu išuwwafn d‑imajusiyn lli‑llanin ġ‑tgldit‑ns kullutt.

²¹ izayd danyal ġmkan ar asggʷas amzwaru n‑ugllid kuraš.