PROVERBIOS 1 - Quichua Imbabura 2016

Cai yachachij shimicuna, imapa ali cashcamanda

¹ Yachachij cai shimicunataca, Davidpaj churi, Israelcunata jatun mandaj Salomón rurashcami.

² Cai shimicunaca, aliguta yachajushpa tucuipi aligutapacha ricushpa causangapa yachajunami. Aliguta yarishpa rimanata yachajungapami.

³ Aliguta yarishpa causachun yachachishcata chasquingapami. Alitalla rurashpa, aliguta ricushpa, tucuicunapaj ali cachun ruranata yachachingapami.

⁴ Nara ali yachajushca gentecunaman ali yachaita cungapami. Shinallata, chairalla viñaicunamambash, ali yuyaita, aliguta yarishpa causanata yachachingapami.

⁵ Alipacha yachajushca runa uyashpaca, ashtahuanmi yachajunga. Shinallata, ali yachajushca runapash, ali yuyaita cushcataca chasquingami.

⁶ Yachachij shimicunata uyashpa ashtahuan ali yachajungapa, alipacha yachajushcacuna, na yachai ushanalla shimicunata yachajungapami.

⁷ Alipacha yachajushca cangapaca, Mandaj Diosta manllashpami causana. Juizu illajcunaca, aliguta yachajushpa, aligutapacha ricushpa causanataca yangapimi churan.

Ali yachajushca cachun, yachachishca shimicunami

⁸ Ñuca huahualla, cambaj taita yachachishcataca, cazunami cangui. Cambaj mama yachachishcatapash, ama yangapi churanguichu.

⁹ Cai yachachishcacunaca, juyailla coronata cambaj umapi churashcashnami canga. Juyaillaguta, cungapi huatachishcashnami canga.

¹⁰ Ñuca huahualla, juchata rurajcuna umachingapa munajpica, ama chasquinguichu.

¹¹ Candaca cashnami ninajunga: “Pacalla japishpa huañuchingapa ñucanchihuan jacu. Ima na alitapash na ruraj runata, pacalla japishpa llaquichingapa ñucanchihuan jacu.

¹² Seolman cachanshnami chingachishun. Manllanayai ucucunaman tucui urmanshnami chinganga.

¹³ Tucui ima tiyashcacunata japishpami charijyashun. Ima tiyashcacunata quichushpami, ñucanchi huasicunapi jundachishun.

¹⁴ Cambash ñucanchihuan tandanajuilla. Imata cashpapash tucuillatami chaupirishun” ninajungami.

¹⁵ Ñuca huahualla, paicuna maita rinajujpipash na catinachu cangui. Paicuna maita purinajujtapash, na catinachu cangui.

¹⁶ Paicunaca, na alita rurangapami, calpashpa rinajun. Huañuchingapami ucha rinajun.

¹⁷ Alasyu animalcuna ricujujpica, yangallatami linllita churanga.

¹⁸ Paicunaca, paicunallata llaquita apangapami, chashna ruranajun. Paicunallata llaquita apangapami lazutaca churanajun.

¹⁹ Ñapash charijyangapa munajcunami, chashna tucunajun. Chai charishcallatami, causaita quichunga.

²⁰ Ali yachanaca, ñangunapi caparishpami cayajun. Plazacunapimi ninanda caparijun.

²¹ Jatun tandanajuicunapimi caparijun. Puebloman yaicuna pungucunapimi, cashna nijun:

²² “Nara yachajushca runacuna, ¿ima punllacamanda chashna causagringuichi? Asishpa ricujcuna, ¿ima punllacamanda chashna causagringuichi? Juizu illajcuna, ¿ima punllacamanda ali yachajunata na munashpa causagringuichi?

²³ Ñuca yachachishcataca uyanami canguichi. Cangunamanga, ñuca espiritutami cachamusha. Ñuca shimicunata yachajuchunmi villajusha.

²⁴ Cangunata cayajujpipash, na uyangapa munashpami causarcanguichi. Maquita ricuchijujpipash, na chasquishpami causarcanguichi.

²⁵ Ali yuyaita ñuca cujpipash, yangapimi churarcanguichi. Jarcashpa ñuca rimashcataca, na uyangapa munashpami causarcanguichi.

²⁶ Cangunata jatun llaqui japijpica, asishpami ricusha. Canguna ninanda manllanajushca llaquicuna japijpipash, asishpami ricusha.

²⁷ Canguna ninanda manllashca llaquicunallatami, tucuchinga. Jatun llaquicunaca, jatun acapanashnami chayamunga. Ninanda llaquichij llaquicunami cangunataca japinga.

²⁸ Chai llaquicunahuan cashpa, ñucata cayanajujpica na uyashachu. Ñucataca, tutamandata mascashpapash, na tarihuangachu.

²⁹ Ali yachanata na ricunayachishpa, Mandaj Diosta na manllashcamandami chashna tucunga.

³⁰ Ali yuyaita cujpipash, na uyangapa munarcachu. Jarcashpa rimajpipash, yangapimi churanajurca.

³¹ Paicuna na alita rurashpa causanajushcamandami, llaquita apanajunga. Paicunaca na ali yuyaicuna jundami causanajunga.

³² Na ali yuyaicunallatami, na ali yachajushcacunataca huañuchinga. Juizu illajcuna cushijushpa causashcapash, chingaimanmi apanga.

³³ Ashtahuangarin, Ñucata cazushpa causashpaca, imatallapash na manllashpami causanga. Ima llaqui japinatapash na manllashpa, aligutami causanga” nishpami villajun.