NÚMEROS 1 - Quichua Imbabura 2016

Sinaí urcupi Israelcunata yupashcamanda

¹ Mandaj Diosca, Sinaí chaquishca pambapi, Paihuan tuparina jatun carpapimi, Israelcuna Egipto llactamanda llujshimushca ña ishcai huata, ishcai quilla callari punllapi, Moisesman cashna nijurca:

² “Tucuilla tandanajushca Israelcuna mashna cajta yachangapa yupangui. Paicunataca, ayllucunatapash, paicunapaj ñaupa taitacunapaj ayllucunatapash, jaricunatapash shuticunata yupashpa quilcangui.

³ Cambash, Aaronbash, Israelcunataca, ishcai chunga huatata charijmanda vichaimanmi, jatun macanajuiman ri ushana jaricunata yupana canguichi. Paicunataca, macanajungapa rinalla runacunatami, imashna tandanajushcapi churana canguichi.

⁴ Tucui ayllucunapimi shuj pushaj yanapajunga. Paicunaca, punda taitacunapaj mirai ayllucunata mandajcunami canga.

⁵ Cangunata yanapajcunapaj shuticunaca, caicunami canga: Rubén ayllumandaca, Sedeur runapaj churi Elisur shuti runami canga.

⁶ Simeón ayllumandaca, Zurisadai shuti runapaj churi Selumiel shuti runami canga.

⁷ Judá ayllumandaca, Aminadab shuti runapaj churi, Naasón shuti runami canga.

⁸ Isacar ayllumandaca, Zuar shuti runapaj churi, Natanaelmi canga.

⁹ Zabulón ayllumandaca, Helón shuti runapaj churi, Eliab runami canga.

¹⁰ Josepaj ishcai churicunapaj ayllumandaca, caicunami canga: Efraín ayllumandaca, Amiud shuti runapaj churi Elisama shuti runami canga. Josepaj churi Manasés ayllumandaca, Pedasur shuti runapaj churi, Gamalielmi canga.

¹¹ Shinallata, Benjamín ayllumandaca, Gedeoni shuti runapaj churi, Abidán shuti runami canga.

¹² Dan ayllumandaca, Amisadai shuti runapaj churi, Ahiezer shuti runami canga.

¹³ Aser ayllumandaca, Ocrán shuti runapaj churi, Pagiel shuti runami canga.

¹⁴ Gad ayllumandaca, Deuel shuti runapaj churi, Eliasaf runami canga.

¹⁵ Neftalí ayllumandaca, Enán shuti runapaj churi, Ahira shuti runami canga” nijurcami.

¹⁶ Chai runacunami, tandanajushca Israelpuramandaca, paicunapaj punda taitacunapaj mirai ayllucunata mandajcuna carca. Paicunami, chai tucui huaranga huaranga Israel runacunata mandajcuna carca.

¹⁷ Chai mandajcunapaj shuticunata quilcashpa churai tucushca runacunatami, Moiseshuan, Aaronhuan tandachinajurca.

¹⁸ Ishcai quillapaj callari punllapica, tandanajushca tucuilla Israelcunatapashmi tandachinajurca. Paicunapaj ayllucuna, paicunapaj punda taitacunapaj huasi ucupuracuna imashna tandanajushcapi, paicunapaj shuticunata japishpami tandachinajurca. Shinallata, imashna shuj shuj yupashcashnallatami, ishcai chunga huatata charijmanda vichaiman tandachinajurca.

¹⁹ Mandaj Dios imashna Moisesta mandashcashnami, Sinaí chaquishca pambapi paicunataca yupanajurca.

²⁰ Taita Israelpaj rucu churi Rubenbaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

²¹ Rubenbaj ayllucunata yupajpica, 46.500 runacunami carca.

²² Simeonbaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

²³ Simeonbaj ayllucunata yupajpica, 59.300 runacunami carca.

²⁴ Gad runapaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

²⁵ Gad runapaj ayllucunata yupajpica, 45.650 runacunami carca.

²⁶ Judapaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

²⁷ Judapaj ayllucunata yupajpica, 74.600 runacunami carca.

²⁸ Isacarpaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

²⁹ Isacar ayllucunata yupajpica, 54.400 runacunami carca.

³⁰ Zabulón runapaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

³¹ Zabulón runapaj ayllucunata yupajpica, 57.400 runacunami carca.

³² Josepaj churicunamanda, Efrainbaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

³³ Efrainbaj ayllucunata yupajpica, 40.500 runacunami carca.

³⁴ Manasespaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

³⁵ Manasespaj ayllucunata yupajpica, 32.200 runacunami carca.

³⁶ Benjaminbaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

³⁷ Benjaminbaj ayllucunata yupajpica, 35.400 runacunami carca.

³⁸ Dan runapaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

³⁹ Dan runapaj ayllucunata yupajpica, 62.700 runacunami carca.

⁴⁰ Aser runapaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

⁴¹ Aser runapaj ayllucunata yupajpica, 41.500 runacunami carca.

⁴² Neftalí runapaj miraicunataca, paicunapaj ayllucuna, ñaupa taitacunapaj huasi ucupuracuna imashna tandanajushcapi, paicunapaj shuticunata imashna yupashcashnami yupanajurca. Paicunataca, ishcai chunga huatata charijmanda callarishpami, macanajuiman ri ushanacunataca, tucuilla jaricunata yupanajurca.

⁴³ Neftalí runapaj ayllucunata yupajpica, 53.400 runacunami carca.

⁴⁴ Chai tucuicunatami, Moiseshuan, Aaronhuan, Israelcunata mandaj chunga ishcai runacunahuan yupanajurca. Paicunaca, ñaupa taitacunapaj huasi ucupuramanda, shuj shujlla agllai tucushcami carca.

⁴⁵ Macanajuiman ri ushana Israelcunataca, ishcai chunga huatata charijmanda callarishpami, paicunapaj ñaupa taitacunapaj huasi ucupuracuna imashna tandanajushcapi yupanajurca.

⁴⁶ Tucuillata yupajpica, 603.550 runacunami carca.

Levitacunata churashcamanda

⁴⁷ Levitacunaca, paicunapaj punda taitacunapaj ayllucuna imashna tandanajushca cashpapash, Israelpurapica na yupai tucushcachu carca.

⁴⁸ Mandaj Diosca, Moisestaca cashnami nishca carca:

⁴⁹ “Leví runapaj ayllucunatallami na yupana cangui. Israelcunata yupanajushpapash, paicunataca na yupanachu cangui.

⁵⁰ Ashtahuangarin, levitacunataca, Ñucahuan tuparina carpapi, tucui imalla tiyajcunatapash ricunajuchun churangui. Paicunami, Ñucahuan tuparina jatun carpatapash, chaipi tucui imalla tiyashcatapash apashpa rinajunga. Chai carpapillatami Ñucapajta rurajunga. Paicunaca, Ñucahuan tuparina carpa muyundipimi causanajunga.

⁵¹ Ñucapaj jatun carpata shujman apana cajpipash, levitacunami pascashpa apanajunga. Chai carpata maipi shayachina cajpipash, levitacunami shayachinajunga. Na levita cashpata, chai carpaman quimirishpaca huañungami.

⁵² Israelcunaca tucuicunami, paicuna imashna tandanajushcapi, paicunapaj banderacunahuan, carpacunata shayachishpa causanajunga.

⁵³ Ashtahuangarin, levitacunaca, Ñucahuan tuparina carpa muyundipimi, carpacunata shayachishpa causanajunga. Ñuca fiñarishpa, Israelcunata ama llaquichijuchunmi chashna ruranajunga. Levitacunami, Ñucahuan tuparina carpataca huacaichinajunga” nijurcami.

⁵⁴ Mandaj Dios imashna Moisesta mandashcashnami Israelcunaca, tucui imatapash chashnatapacha rurashpa pactachinajurca.