NAHUM 1 - Quichua Imbabura 2016

Taita Dios fiñarishpa llaquichinamanda

¹ Nínive shuti pueblota llaquichinatami villashca. Elcos shuti pueblomanda Nahum runa, muscuipishna ricushcata quilcashcacunami.

² Mandaj Diosca, Paipajlla cachun munaj Taita Diosmi. Imashna llaquichishcashna randi llaquichij Diosmi. Mandaj Diosca, ninanda fiñarishpa, Paita na ricunayachijcunatapash, imashna llaquichishcashna randi llaquichijmi. Paita fiñajcunataca, llaquichingapachami.

³ Mandaj Diosca na ñapash fiñarij, ninan ushaita charij Diosmi. Na alita ruraj runataca, llaquichingapachami. Mandaj Diosca ninan huairahuan tamiapi, jatun acapanapimi purin. Fuyupash, Pai purina ñutu alpashnami.

⁴ Paica, mama cucha yacutapash rimashpa chaquichinllami. Chaimandami jatun rijuj yacucunapash, tucuilla chaquinlla. Basán llactapash, Carmelo shuti, Líbano shuti urcucunapi tiyaj sisacunapashmi tucuchi tucurca.

⁵ Paipaj ñaupajpica, urcucunapash ninanda chujchunmi, lomacunapash yacuyanmi. Pai ricurijpica, alpapash ninandami manllarin. Cai pachapash, tucui causajcunapash tucuillami ninanda manllarin.

⁶ Pai ninanda fiñarijpica, ¿pita Paipaj ñaupapi shayari ushangayari? Ninandapacha fiñarishpa llaquichijujpica, ¿pita quishpiri ushangayari? Pai ninanda fiñarishcapash, rupajuj ninashnami talirijun. Chaimandami, jatun jaca rumicunapash faquirishpa chaupirin.

⁷ Mandaj Diosca tucuicunahuan alimi. Paica, ninan llaqui punllapipash shinllichishpami huacaichin. Paitalla yariashpa causajcunataca alimi rijsin.

⁸ Ashtahuangarin Paita na ricunayachijcunataca, manllanayai yacuta jundachimujshnami tucuchinga. Paita fiñajcunataca, yana yana tutami catiriyashpa llaquichinga.

⁹ ¿Cangunaca, imatata Mandaj Diostaca fiñashpa, na alita yanajunguichi? Paica cangunataca tucuchingami. Paita fiñajcunataca, shujta llaquichishpallatami tucuchinga.

¹⁰ Huatarishpa viñashca cashacunashna shinlli cashpapash, vinota ufiashpa machashcacuna cashpapash, alipacha chaquishca fangashnami tucuchi tucunga.

¹¹ Ninive pueblomandami, Mandaj Diosta fiñashpa na alita yarij runaca llujshirca. Paica, jatun na ali yuyaita cuj runami.

¹² Chaimandami Mandaj Diosca, cashna nin: “Paicunaca, ali causaita charishpapash, ashtaca ashtacacuna cashpapash, llaquichi tucungami. Paicunaca tucuillami tucuringa. Jerusalen pueblolla, candaca ninandapachami ña llaquichircani, na ashtahuan llaquichishachu.

¹³ Cunanga, paicuna yuguhuan huatashcashna llaquichinajujtaca faquishpami saquisha. Canda huatashcashna llaquichijuj caracunatapash fitishami” ninmi.

¹⁴ Ashtahuangarin Mandaj Diosca, Ninive pueblomandaca, paipaj shutita yarinallapash ama tiyachunmi cashna mandanga: “Cambaj diospaj huasipi tiyajuj llagllashpa rurashca diostapash, yacuyachishpa rurashca diostapash tucuchishami. Cambash na ali cashcamandami, chaipillata pambai tucungui” ninmi.

Nínive shuti pueblota llaquichinata villashcamanda

¹⁵ Quishpirinamanda ali villanata villajmari, jahua urcucunata shamujun. Judá llactalla, canga cushijuna punllata rurailla. Can imatapash Diosman carasha nishcataca pactachinguilla. Chai na alita ruraj runaca, cutinga na ashtahuan llaquichingachu, paica ñami tucuilla tucuchi tucurca.