MARCOS 1 - Quichua Imbabura 2016

Bautizaj Juanmi villajushca

¹ Diospaj Churi Jesucristomanda ali villanataca cashnami callarishca.

² Profeta Isaías quilcashcapica cashnami nijun: “Ñucamanda villajtami canda ñaupashpa richun cachani. Paimi, cambaj punda rishpa, can purina ñandaca alichijunga.

³ Jichushca pambapi caparijuj runaca: ‘Jatun Diosman ñanda alichipaichi. Pai rina ñambica, ima jarcapash ama tiyachun alichipaichiyari’ nijunmi” nijurcami.

⁴ Juanga, jichushca pambapimi, bautizajurca. Paica: “Juchayu cashcamanda llaquirishpa Diospajman tigrarishpa, bautizarichi. Shina rurajpimi Diosca, cangunapaj juchacunata perdonanga” nishpami villajurca.

⁵ Shina villajujpimi, Judea llactapi causajcunapash, Jerusalenbi causajcunapash, Juanbajman shamunajurca. Paicunataca, paicunapaj juchacunata villajpimi Juanga, Jordán jatun rijuj yacupi bautizajurca.

⁶ Juanga, camello milmata rurashpa churajushca, cara chumbita chumbilirishcami carca. Shinallata, langosta jurucunata, sacha balun mishquitami micuj carca.

⁷ Paica, cashna nishpami villajurca: “Ñucapaj jipa shamujmi, ñucata yali ninan ushaita charin. Shina cajpimi ñucaca urai cumurishpa, Paipaj chaquipi churajushpa huatarishcata pascachitallapash na ushana cani.

⁸ Ñucaca, yacuhuanllami cangunataca bautizashcani. Ashtahuangarin Paica, jucha illaj Espirituhuanmi cangunataca bautizanga” nircami.

Jesusta bautizashcamanda

⁹ Chai punllacunapimi Jesusca, Galilea llactapi tiyajuj Nazaret pueblomanda shamurca. Chaipimi Juanga Jordán jatun yacupi bautizarca.

¹⁰ Yacumanda Jesús llujshijushpaca, jahua pacha pascarijtami ricurca. Shinallata, Diospaj Espiritutapash, palomagushna Paipaj uma jahuaman urai shamujtami ricurca.

¹¹ Jahua pachamandapash: “Canga, Ñuca juyashca Churigumi cangui. Canmandami ninanda cushijuni” nijujmi uyarimurca.

Jesustami, diabloca pandachingapa munashca

¹² Chai jipaca, Diospaj Espiritumi jichushca pambaman pusharca.

¹³ Chai jichushca pambapi, chuscu chunga punllacaman, millai animalcunapaj chaupipi causajujpimi, Satanasca, Jesusman na ali yuyaita cushpa, pandachingapa munarca. Shina cajpimi Jesustaca, angelcuna ricurianajurca.

Jesusca, Diospajta rurai callarishcamanda

¹⁴ Juanda prezu churashca jipami, jahua pachamanda Dios mandana chayamushca ali villanata villashpandi Jesusca Galilea llactaman shamujurca.

¹⁵ Paica cashnami nijurca: “Chai punllacunaca ñami pactamushca. Taita Dios mandajpi causanami pactamushca. Juchayu cashcamanda ninanda llaquirishpami, quishpirinamanda cai ali villanataca crina canguichi” nijurcami.

Jesusca, pijita japinajuj chuscu runacunatami cayashca

¹⁶ Jesusca, Galilea cucha manñata yalijushpami, Simondaca, paipaj huauqui Andreshuan pijita linllihuan japinajujta ricurca.

¹⁷ Paicunatami Jesusca cashna nirca: “Ñucata catihuaichi. Pijita japijshna gentecunata tandachimuchunmi, cangunataca yachachisha” nircami.

¹⁸ Shina nijpimi, linllicunata saquishpa, Jesusta catishpa rinajurca.

¹⁹ Jesusca, chaimanda ashaguta rishpallami Zebedeopaj churi Jacobotaca, paipaj huauqui Juanhuan barcopi linllicunata huatanajujta ricurca.

²⁰ Jesús cayajpimi, paicunapaj taita Zebedeotaca, pijita japishpa yanapajcunahuan barcopi saquishpa, catishpa rinajurca.

Mapa aya jundashca runamandami villajun

²¹ Jesusca, Capernaúm puebloman chayashpami samana punllapica, sinagogaman yaicushpa yachachijurca.

²² Jesusca, imatalla pactachishpa causanata alipacha yachachijujpimi manllarishpa uyanajurca. Paica mandana ushaita charishpami, mandashca Shimita yachachijcunashnaca na yachachijurca.

²³ Ashtahuangarin chai sinagogapica, mapata rurachij aya jundashca shuj runami tiyajurca. Paimi ninanda caparishpa,

²⁴ cashna nijurca: “¡Aij! Nazaret pueblomanda Jesús, Canga ñucanchihuanga ¿imatata ricunata charinguiyari? ¿Ñucanchita tucuchingapachu shamurcangui? Candaca, Pi cajta rijsinimi. Canga, Taita Dios cachamushca Jucha Illajmari cangui” nijurcami.

²⁵ Shina nijpimi Jesusca chai ayataca: “¡Upallai, cai runamanda llujshi!” nishpa, shinllita rimarca.

²⁶ Shina nijpimi chai mapa ayaca, ninanda chujchuchishpa, shinllita caparichishpa, chai runamandaca llujshirca.

²⁷ Shinamandami, tucuicuna ninanda manllarishpa, paipura cashna nirinajurca: “¿Caica imatayari? ¿Cai mushuj Paipaj yachachinaca imatayari?. Mapa ayacunatapash ninan ushaihuan rimajpica, ¿cazunllachu imatayari?” ninajurca.

²⁸ Jesús chashna rurashcataca, tucui Galilea llacta muyundipimi ñapash yachanajurca.

Pedropaj suegratami, Jesusca alichishca

²⁹ Sinagogamanda llujshishpaca Jacobotapash, Juandapash pushashpami Jesusca, Simonbash, Andrespash causaj huasiman shamurca.

³⁰ Chaipica, Simonbaj suegra, tabardillo ungüihuan sirijujtami, Jesús chayamunhuan villanajurca.

³¹ Shina villajpi Jesús chayashpa, maquimanda aisashpa jatarichijpimi, tabardillo ungüica ñapash yalirca. Ali tucushpaca, paicunaman micunata cararcallami.

Indi ña huashajujujpimi, ashtaca huañunajujcunata alichishca

³² Indi huashajushpa ña tutayajpimi, huañunajuj gentecunata, aya jundashca gentecunatapash, Jesuspajman apamunajurca.

³³ Chai pueblopi causajcunaca, tucuicunami pungupi jundamurca.

³⁴ Chaipimi, shuj shuj ungüicunahuan huañunajujcunata Jesusca alichijurca. Shinallata, ashtaca ayacunatapashmi llujchijurca. Jesusta rijsijpimi, ayacuna rimachunga na saquirca.

Galilea llactapimi, Jesusca villashpa purijushca

³⁵ Jesusca, nara ali punllayajpillata tutamandata jatarishpami, jichushca pambaman llujshishpa rirca. Chaipimi Diosta mañajurca.

³⁶ Ashtahuangarin Simonga, paipaj cumbacunandimi Jesusta mascajurca.

³⁷ Paita tuparishpaca: “Tucuicunami Candaca mascanajun” ninajurca.

³⁸ Shina villajpimi Jesusca, paicunataca: “Caishuj pueblocunaman jacuchi, chaicunapipash villanami cani. Chaipajmi shamurcani” nirca.

³⁹ Tucui Galilea llactapi purijushpami, sinagogacunapi Jesusca villajurca. Shinallata, ayacunatapashmi llujchishpa cachajurca.

Lepra ungüihuan runatami, Jesusca alichishca

⁴⁰ Lepra ungüihuan shuj runa, Jesuspajman shamushpa cungurishpami: “¿Nacha ñucata alichihuanguiman?” nishpa ninanda mañajurca.

⁴¹ Shina nijujpimi, Jesusca chai runata ninanda llaquishpa, maquita chutashpa tacarishpaca: “Alichingapa munanimi, ali tucuilla” nirca.

⁴² Shina nijhuan, lepra ungüi anchurijpimi, chai runaca mapa illaj saquirirca.

⁴³ Chai runataca Jesús cayacaman nishpaca, shinllitapachami cashna nijurca:

⁴⁴ “Ricui, pimambash imatallapash ama villanguichu. Ashtahuangarin sacerdotepajman rishpa can ali tucushcata ricuchigri. Shinallata, Moisés mandashcashna, tucuicuna yachachun ofrendacunata apashpa ringui” nijurcami.

⁴⁵ Ashtahuangarin chai runa rishca jipaca, paita imashna alichishcataca, tucuicunamanmi ninanda villai callarirca. Shinamandami Jesusca, tucuicuna ricujta puebloman yaicuitaca na ushashpa, jichushca pambacunapilla purijurca. Ashtahuangarin tucui llactacunamandami, Jesuspajman shamunajurca.