LUCAS 1 - Quichua Imbabura 2016

Cai librotaca, Teófilo shuti runamanmi quilcashca

¹ Imata rurashcacunata, chashnapacha cashcata ñucanchipurapi yachashcatami, aligutapacha callarimanda quilcashpa saquingapa taucacuna munanajushca.

² Callarimandapacha paicunapaj ñavihuan ricushcacunatami, chaitallata ñucanchiman yachachinajurca. Paicunaca Diospaj Shimita villashpami, Diospajta rurajcuna carca.

³ Ñucapash, ali cana cajpimi, callarimanda imata rurashcacunata aligutapacha tapushpa, ninanda alicachi tucushca Teofiloman quilcashpa cachamuni.

⁴ Canman chaicunata alipacha yachachishca cajpipash, chai yachashcacunaca na llulla cashcata ashtahuan aliguta yachachunmi quilcani.

Bautizaj Juan huacharinata villashcamanda

⁵ Judea llactata jatun mandaj Herodes mandajui punllacunapimi, Zacarías shuti sacerdote causajurca. Paica, ñaupa Abías shuti sacerdotepurami carca. Zacariaspaj huarmica, Elisabetmi carca. Paica, ñaupa sacerdote Aaronbaj miraimi carca.

⁶ Paicunaca, ishcandimi, Taita Diospaj ñaupajpi alitalla rurajcuna carca. Jatun Dios rurachun mandashcacunatapash, tucuita pactachinajujpimi paicunataca, pipash na juchachi ushaj carca.

⁷ Shina cashpapash, paicunaca huahuata na charircachu. Elisabet huarmimi huahuata na tari ushaj carca. Paicunaca, ishcandimi ña rucu payacuna carca.

⁸ Sacerdote Zacarías, paicuna imashna tandanajushcashna,Taita Diospaj ñaupajpi rurana punllami chayashca carca.

⁹ Paicunaca: “¿Imata ruranata ñucapaca urman?” nishpami, pipaj urmajta ricungapa ruraj carca. Chashna ruranajujpimi Zacariaspajca, Jatun Diospaj huasi ucuman yaicushpa, altarpi inciensota cushnichina urmarca.

¹⁰ Inciensota cushnichijujpica, tucuilla gentecunami Diosta canllapi mañanajurca.

¹¹ Chaipica, Jatun Dios cachamushca shuj angelmi, inciensota cushnichina altarmanda ali maquiman ñapash shayarishpa, Zacariasman ricurirca.

¹² Chai angelta Zacarías ricushpaca, ninandami manllarishpa muspayarca.

¹³ Shina manllarijujpimi angelca, cashna nirca: “Zacarías, ama manllarichu. Can mañashcataca, Taita Diosca uyashcami. Cunanga, cambaj huarmi Elisabetca, shuj jari huahuagutami ungunga. Chai huahuagutaca Juanda shutichingui.

¹⁴ Canga, ninandami cushijungui. Chai huahuagu huacharishcamandaca, ashtacacunami ninanda cushijunajunga.

¹⁵ Paimanmi Taita Diosca ninan ushaita caranga. Paica, vinotapash, sidratapash na ufiangachu. Paica mamapaj vijsapi cashpallatami, Jucha Illaj Diospaj Espíritu junda canga.

¹⁶ Shina cashpami ashtaca Israelcuna, paicunata Mandaj Taita Diospajman tigrarichun yachachijunga.

¹⁷ Paica, Eliaspaj ushaihuan, espirituhuanmi Quishpichijpaj pundapi shamunga. Paimi taitacunapaj shungutaca huahuacunata juyachun alichinga. Shinallata, na cazujcunatapash, aligutapacha yarishpa alitalla ruranajuchunmi yachachijunga. Chashna rurashpami, Quishpichij shamujpica, alipacha chasquinalla shuyanajuchun, gentecunataca alichijunga” nircami.

¹⁸ Shina nijpimi Zacariasca, angelta cashna nirca: “Chaitaca, ¿imata ricushpata yachapasha? Ñucapash rucumari cani, ñuca huarmigupash ña payagumari” nirca.

¹⁹ Shina nijpimi angelca, cashna nishpa tigrachirca: “Ñucami, Taita Diospaj ñaupajpi shayaj Gabriel cani. Paimi, cai juyailla mushuj shimicunata canman villachun cachamuhuarca.

²⁰ Cunanga, ñuca villashcata na crishcamandami, cai villashca pactangacaman upa tigrashpa na rimai ushashpa saquiringui. Chaicunaca, pactana punllapimi pactanga” nircami.

²¹ Zacariasta canllapi shuyanajuj gentecunaca, Diospaj huasi ucumandaca, na ucha llujshimujpimi ninanda manllarinajurca.

²² Ashtahuangarin ucumanda llujshimushpaca, na rimai usharcachu. Chaimandami Diospaj huasi ucupi imatapash muscuipishnalla ricushcata yachanajurca. Chashna upa cashpami, maquihuan ricuchishpalla villajurca.

²³ Diospajta rurana punllacuna tucurijpica, Zacariasca huasiman tigrarcallami.

²⁴ Chai punllacuna jipami, paipaj huarmi Elisabetca, vijsayuj tucurca. Chai huarmica, picha quillacaman huasi ucupilla tiyajushpami, cashna nirca:

²⁵ “Pipash ama ashtahuan na alicachishpa ricuhuachunmi, Jatun Diosca cunanbira llaquishpa, chashna carahuashca” nircami.

Jesús huacharimunata villashcamanda

²⁶ Sucta quillapimi ángel Gabrieltaca, Galilea llactapi tiyaj Nazaret puebloman, Taita Diosca cachamurca.

²⁷ Jarihuan nara tacarishca María shuti cuitsaguman villangapami shamurca. Chai cuitsaguca, ñaupa taita Davidpaj mirai Josehuanmi, cazarangapa ari nirishcalla carca.

²⁸ María causajuj huasi ucuman yaicushpaca, angelca cashnami nirca: “¡Cushijui, Diosmi candaca ninanda juyajun! Jatun Diosca canhuanmi. Canga huarmipurapica, alicachi tucushcami cangui” nircami.

²⁹ Ashtahuangarin Mariaca, angelta ricushpami: “¿Imashpashi cashna nihuan?” yashpa, ninanda manllarirca.

³⁰ Chaimi angelca cashna nirca: “María, ama manllarichu. Canga, Taita Dios ninanda juyashcami cangui.

³¹ Cunanga, vijsayuj tucushpami, shuj jari huahuaguta ungugringui. Chai huahuagutaca, JESÚS shutita shutichingui.

³² Paica, ninan ushaitami charinga. Paitaca: ‘Jahua pachapi causaj Diospaj Churimi cangui’ ninajungami. Mandaj Taita Diosmi, Paipaj ñaupa taita David mandashpa tiyajushcata paiman cunga.

³³ Paimi, Jacobpaj miraicunataca, causaita causaicaman mandajunga. Pai mandajunaca napacha tucuringachu” nircami.

³⁴ Shina nijpimi angeltaca, Mariaca cashna nirca: “¿Imashnata chashnaca cangayari? Nara maijan jarihuambash canichu” nirca.

³⁵ Shina nijpimi angelca cashna nirca: “Jucha illaj Diospaj Espiritumi cambajman shamunga. Jahua pachapi causaj Diospaj ninan ushaihuanmi candaca fuyushna llandunga. Shinamandami, Jucha Illaj Huahuagu huacharijpica: ‘Taita Diospaj Churimi cangui’ ninajunga.

³⁶ Ricui, cambaj ayllupura Elisabetpash, ña payapimi, jari huahuaguta ña sucta quillata vijsayuj tucushca. Paitaca: ‘Huahuata na tarinata yachaj huarmimi’ ninajujmi carca.

³⁷ Taita Diospaca, imata na rurai ushanallapash na tiyanllu” nircami.

³⁸ Shina nijpimi Mariaca cashna nirca: “Ricui, Jatun Diospajta ruraj huarmica, caipimi capani. Can villashcashna, Diosca ñucaman carahuachunlla” nircami. Shina nijpimi angelca, paipaj ñaupajmanda anchurishpa rirca.

Elisabetta, María ricungapa rishcamanda

³⁹ Chai punllacunallata, María jatarishpaca, Judá llacta urcupi tiyaj shuj pueblomanmi ucha rijurca.

⁴⁰ Chaiman chayashpaca, Zacariaspaj huasiman yaicushpami, Elisabettaca: “¿Alillachu capangui?” nirca.

⁴¹ Chaipimi cashna tucurca: Elisabetta, María: “¿Alillachu capangui?” nijta uyashcandimi, Elisabetpaj vijsa ucupi huahuaguca cuyurirca. Elisabetca, Jucha Illaj Diospaj Espíritu jundami carca.

⁴² Shina cashpami shinllita rimashpa, cashna nirca: “Canga, tucui huarmipuramanda ashtahuan yali bendiciai tucushcami cangui. Cambaj vijsa ucupi huahuagupash bendiciai tucushcami canga.

⁴³ Ñucata Mandajpaj mamaca, ¿imashpata ñucatara ricungapa shamuhuangui?

⁴⁴ Can ‘¿alillachu capangui?’ nijta uyashcandimi, ñuca vijsa ucupi huahuaguca cushijushpa cuyurirca.

⁴⁵ Canman villachun Jatun Dios cachamushcataca, pactachinata crishcamandami, ninanda cushijuna cangui” nircami.

⁴⁶ Shina nijpimi Mariaca, cashna nirca: “Jatun Diostaca tucui almahuanmi, ninanda jatunyachijuni.

⁴⁷ Ñuca espiritupash, ñucata Quishpichij Taita Dioshuanmi ninanda cushijun.

⁴⁸ Paipajta ruraj ñucataca, ninandami llaquihuashca. Cunanmandapachami ñucataca, tucui jipa miraicunapash, ‘alicachi tucushcami cangui’ ninajuhuanga.

⁴⁹ Tucui ushaita charij Diosmi, ñucapica cashna ninan alicunata rurashca. Paipaj shutica, jucha illajmi.

⁵⁰ Diosca Paita manllajcunataca, causaita causaicamanmi juyajunga.

⁵¹ Paipaj ninan ushaihuanmi, pipash na rurai ushanallata rurashca. Jatun tucushpa jariyashcamandami, paicunapaj shungupi yarinajushcatapash chingachishca.

⁵² Ninan ushaita charijcunataca, paicuna mandashpa tiyajujmanda anchuchishpami, na jariyashpa causajcunatara jatumbi churashca.

⁵³ Yarjachishpa causajcunamambash, imagutapash ashtacatapachami carashca. Ashtahuangarin ninan charijcunataca, imapash illajtami cachashca.

⁵⁴ Paipajta ruraj Israelcunataca, paicunata llaquishpa juyaj cashcata yarishpami yanaparca.

⁵⁵ Taita Abrahamda, paipaj miraicunatapash causaita causaicaman chashna juyanatami, ñucanchi ñaupa taitacunaman villajushca” nircami.

⁵⁶ Mariaca, quimsa quillatashnami, Elisabetpaj huasipi causajurca. Chai jipami, paipaj huasiman tigrarca.

Bautizaj Juan huacharishcamanda

⁵⁷ Ña unguna punlla pactajpimi Elisabetca, shuj jari huahuaguta ungurca.

⁵⁸ Taita Diosca paita jatunyachishpa, ninanda llaquishpa juyashcata yachashpami, quimirialla causajcunapash, ayllucunapash, Elisabethuan ninanda cushijunajurca.

⁵⁹ Ña pusaj punlla tucujpimi, Huahuagutaca circuncisionda rurangapami apashpa shamunajurca. Shina apamushpami: “Cai huahuagutaca, paipaj taitapaj shutitallata Zacariasta shutichishun” ninajurca.

⁶⁰ Shina ninajujpimi, paipaj mamaca: “Na, paica Juan shutimi canga” nirca.

⁶¹ Shina nijpimi, paicunaca: “¿Imashpa chai shutita shutichisha ningui nishpa? Cangunapurapica chai shutica na tiyanllu” ninajurca.

⁶² Paicunaca maquihuan ricuchishpami: “¿Ima shutitata munangui?” nishpa, paipaj taitata tapunajurca.

⁶³ Shina tapujpimi, tablaguta mañashpa: “Paipaj shutica Juanmi capan” nishpa, quilcashpa ricuchirca. Chaita ricushpaca, tucuillami ninanda manllarinajurca.

⁶⁴ Chai jipallami Zacariasca, shimi pascarijpi cutin rimai ushashpa, Taita Diosta alicachijurca.

⁶⁵ Paipaj quimiriallapi causajcunapash, tucuillami ninandapacha manllarinajurca. Chashna tucushcataca, Judea llactapi tiyaj tucuilla urcucunapimi, tucuicunaman parlanajurca.

⁶⁶ Chaita tucui uyajcunami, paicunapaj shungupi na cungashpa: “Chai huahuaguca, ¿pita cangayari?” nishpa, tapurinajurca. Jatun Diosca, Paipaj ushaihuanmi, chai huahuagutaca huacaichijurca.

Dios ima nishcatami Zacariasca villashca

⁶⁷ Juanbaj taita Zacariasca, Jucha Illaj Diospaj Espíritu junda cashpami, Dios ima nishcata cashna nishpa villajurca:

⁶⁸ “Israelcunata Mandaj Taita Diostaca, ‘ninanda alicachi tucushcami cangui’ nishunchi. Paimi, Pai agllashcacunata ricungapa shamushpa quishpichishca.

⁶⁹ Paipajta ruraj Davidpaj miraipuramandami, ninan ushaita charij Quishpichijtaca, ñucanchipajman cachamushca.

⁷⁰ Diospajlla causanajuj profetacunahuan callarimandapacha villashcashnami cachamushca.

⁷¹ Ñucanchita fiñajcunamanda, ñucanchita millanayachij, tucui gentecunapaj maquimandapashmi quishpichishca.

⁷² Ñucanchi ñaupa taitacunata llaquishpa juyashpami, ari nirishcata na cungashpa pactachingapa quishpichishca.

⁷³ Ñucanchi ñaupa taita Abrahamman juramentushcataca, cunanbi ñucanchiman pactachingapami, cashna rurashca.

⁷⁴ Imatapash na manllashpa Paipajta ruranajuchunmi, ñucanchita fiñajcunapaj maquimanda quishpichishca.

⁷⁵ Ñucanchi causanajui tucui punllacunapica, Diospajlla causachun, shinallata alitalla rurashpa, Paipaj ñaupajpi causachunmi cashna rurashca.

⁷⁶ Can huahuaguca: ‘Jatun Diospaj profetami cangui’ nijpimi causangui. Canmi, Jatun Diosta ñaupashpa ñanda alichingui.

⁷⁷ Pai agllashcacunapaj juchacunata anchuchishpa, quishpichinata yachachunmi chashna ñaupashpa ringui.

⁷⁸ Ñucanchi Taita Diosca, ninandapacha llaquishpa juyashpami, indi punchapamba llujshimujshna, jahua pachamanda ñucanchita ricungapa shamushca.

⁷⁹ Huañunata manllashpa, yana yanapishna causajcunata, michashna punchayachingapami, Paica shamushca. Shungupi llaqui illaj causaita ñucanchi charichumbash, chai ñanda purichun ricuchingapami, Paica shamushca” nijurcami.

⁸⁰ Chai huahuaguca, Diosmanda aliguta yachajushpami viñajurca. Israelcunaman villangapa llujshina punlla chayangacamanmi, jichushca pambacunapi Paica causajurca.