LEVÍTICO 1 - Quichua Imbabura 2016

Diosman animalcunata cushpa tucuillata rupachinamanda

¹ Mandaj Diosca, Paihuan tuparina Jatun carpamanda Moisesta cayashpami cashna nijurca:

² “Israelcunaman cashna nishpa villangui: ‘Maijambash cangunapuramanda, Mandaj Diosman ofrendata apamushpaca, huagrata, na cashpaca llamatami apamuna canguichi.

³ Diosman cushpa tucuillata rupachina cangunapaj jari huagrata cushpaca, ima huaglipash illajta ofrendatami apamuna canguichi. Chaitaca, tucui munaihuan apamushpami, Dioshuan tuparina jatun carpa pungupi, Mandaj Diospaj ñaupajpi cuna canguichi.

⁴ Shinallata, tucuillata rupachina chai animalpaj umapi maquita churashpami, Diosman cuna canguichi. Shina rurajpimi juchata anchuchingapa Diosca chasquinga.

⁵ Chai jipami chai shicutaca, Mandaj Diospaj ñaupajpi cungata cuchushpa huañuchinga. Yahuartaca, Aaronbaj churi sacerdotecunami, Dioshuan tuparina Jatun carpaman yaicunapi tiyaj altar muyundipi, Diosman cushpa tsirapachinajunga.

⁶ Tucuillata rupachina shicuta lluchushpami, aichataca asha asha cuchushpa chaupinga.

⁷ Sacerdote Aaronbaj churicunaca, altarpi ninata japichishpami, chai ninapica yamdata aliguta churanajunga.

⁸ Chai jipami, Aaronbaj churi sacerdotecunaca, fitishca aichacunatapash, umatapash, chunlluli viratapash, altarpi nina rupajuj yamda jahuapi aliguta churanajunga.

⁹ Chunllulicunata, changa aichacunataca yacuhuanmi maillanga. Chaitaca sacerdotemi, Diosman cushpa altarpi tucuillata rupachinga. Shina rupachijpimi, Mandaj Diospaj ñaupajpica mishquilla ashnajun ofrenda canga.

¹⁰ Diosman cushpa tucuillata rupachina animalta cushpaca, llamacunamanda cashpa, chivocunamanda cashpapash, ima huaglipash illaj jari animaltami ofrendata cunga.

¹¹ Chai animaltaca, altarmanda janajmanmi, Mandaj Diospaj ñaupajpi cungata cuchushpa huañuchinga. Chai animalcunapaj yahuartaca, Aaronbaj churi sacerdotecunami, altar muyundipi tsirapachinajunga.

¹² Chai animaltaca, asha asha fitishpami, umandi, chunlluli viracunandi chaupishpa churanga. Chaitaca, sacerdotellatami altarpi nina rupajuj yamda jahuapi aliguta churanga.

¹³ Ucu chunllulicunata, chaquicunataca, yacuhuanmi maillanga. Chaicunataca, sacerdotemi altar jahuapi churashpa rupachijunga. Shina tucuillata rupachishcami, Mandaj Diospaj ñaupajpica, mishquilla ashnajun ofrenda canga.

¹⁴ Mandaj Diosman cushpa tucuillata rupachina alasyu animalcunata apamushpaca, urpicunata, na cashpaca palomacunatami apamunga.

¹⁵ Chaitaca sacerdote apashpami, umata anchuchishpa, Diosman cushpa altarpi rupachinga. Yahuartaca, altar patapimi capinga.

¹⁶ Buchetapash, plumacunatapash anchuchishpami, chaitaca altarman chayanapi, uchufata shitana pushtupi, indi llujshimujman shitanga.

¹⁷ Chai animalcunata chaupishpapash, alascunataca na anchuchingachu. Chaitaca sacerdotemi, altarpi yamda rupajuj jahuapi churashpa rupachinga. Shina cushpa tucuillata rupachijpimi, Mandaj Diospaj ñaupajpica, mishquilla ashnajun ofrenda canga.