JUAN 1 - Quichua Imbabura 2016

Dios Rimashca Shimimi Aichayuj tucushca

¹ Callaripica, Dios Rimashca Shimimi ña tiyarca. Chai Rimashca Shimica, Taita Dioshuanmi carca. Chai Rimashca Shimica, Diosllatami carca.

² Callaripica, Paica ñami Dioshuan carca.

³ Tucui ima tiyachumbash, Paillatami rurashca, shinallata, tucui imata rurashcapash, Paihuanllata rurashcami tiyajun.

⁴ Paipimi causanaca tiyarca. Chai causaimi gentecunata punchayachij micha carca.

⁵ Chai michami, yana yana tutacunataca punchayachijun. Chai yana yana tutacunaca, michataca na mishai usharcachu.

⁶ Taita Diosca shuj runatami cachamurca, paipaj shutica Juanmi carca.

⁷ Paimi chai michamanda villashpa ricuchingapa shamurca. Chai michataca tucuicuna crichunmi villajurca.

⁸ Juanga na chai michachu carca, ashtahuangarin, paitaca michamanda villachun cachamushcami carca.

⁹ Chai punchayachij michapachami, tucui gentecunata punchayachingapa cai pachaman chayamurca.

¹⁰ Paica, cai pachapimi carca. Cai pachapash Paillata rurashcami carca. Ashtahuangarin, cai pachapi causajcunaca Paitaca na rijsircachu.

¹¹ Paipaj gentecunapajmanmi shamurca. Shina cajpipash, paicunaca na chasquircachu.

¹² Shinamandami, Paita chasquishpa, Paipaj shutita crijcunaman, Taita Diospaj huahuacuna cachun ushaita cararca.

¹³ Paicunaca, yahuarmanda, aichamanda, runapaj munaimandaca na huacharishcachu. Ashtahuangarin, Diosmandami huacharirca.

¹⁴ Chai Rimashca Shimimi, runa aichayuj tucushpa ñucanchihuan causajurca. (Taita Diospaj shujlla Churipaj punchapamba ninan ushaihuan cajtami Paitaca ricurcanchi). Paica, ninanda juyaj, napacha llullajmi carca.

¹⁵ Juanga, Jesusmandami caparishpa cashna nishpa villajurca: “Paimandami cashna nijurcani: ‘Ñucapaj jipa shamujca, ñucapaj pundallatami causajurca. Paica ñucapaj pundami carca’ nircanimi” nishpami villajurca.

¹⁶ Pai tucuita charishcamandami, tucuicuna japircanchi. Paipaj juyaitaca ashtahuan, ashtahuanmi chasquircanchi.

¹⁷ Diosca mandashca shimicunataca ñucanchiman yachachichunmi Moisesman curca. Ashtahuangarin, Diospaj juyaipash, na llullaj shimipash, Jesucristomandami shamurca.

¹⁸ Taita Diostaca pipash napacha ricushcachu. Taita Diospaj Shujlla Churillami, Diosllata cashpa, Dioshuan causajushpa, ñucanchiman rijsichirca.

Bautizaj Juanmi villajushca

¹⁹ Juanmi, paimandallata caitaca villashca. Mandaj judiocunami, Jerusalenmanda sacerdotecunata, levitacunata tapuchun cacharca, paicunaca: “¿Canga pita cangui?” nishpami tapunajurca.

²⁰ Paica, na pacashpa villashpami: “Ñucaca, na Cristochu cani” nishpa villajurca.

²¹ Paicunaca, cashna nishpami tapunajurca: “¿Pita cangui? ¿Canga Eliaschu cangui?” nijpimi. “Na chaichu cani” nirca. Paicuna cutin tapushpaca: “¿Dios cachamusha nishca profetachu cangui?” ninajujpimi. “Na chaichu cani” nishpa tigrachirca.

²² Shina nijpica paicunaca: “¿Shinaca pita canguiyari? Ñucanchita cachamujcunaman villagringapami tapunajunchi, ¿pipachata canguiyari?” ninajurcami.

²³ Shina nijpimi Juanga: “Ñucaca, jichushca pambapi caparishpa villaj runami cani. ‘Jatun Diosman ñanda alichipaichi’ nishpa Profeta Isaías villashcashna villajmi cani” nijurca.

²⁴ Tapuchun cachajpi rishcacunaca, fariseopurami carca.

²⁵ Paicunami Juandaca, cashna nishpa tapunajurca: “Canga, Cristopash, Eliaspash, Dios cachamushca profetapash na cashpaca ¿imashpata bautizajungui?” nishpami tapunajurca.

²⁶ Juanga, cashnami nirca: “Ñucaca yacupillami bautizajuni. Ashtahuangarin, canguna na rijsishca shuj runagumi cangunapurapi causajun.

²⁷ Paica, ñucapaj jipa shamushca cashpapash, ñucapaj pundami causashca. Shinamandami, Paipaj chaquipi churajushpa huatarishcata pascangapallapash na ushana cani” nijurcami.

²⁸ Jordán yacu rijuj indi llujshimujman tiyaj, Betábara shuti pueblopimi, caicunaca cashna tucurca. Chaipimi Juanga bautizajurca.

Taita Diospaj Llamagumandami villajun

²⁹ Chai cayandi punllami, Jesús paipajman shamujujta ricushpa Juanga cashna nirca: “Ricuichi, Taita Diospaj Llamaguca caipimi. Paimi, cai pachapi causajcunapaj juchacunataca anchuchinga.

³⁰ Paimanda villajushpami, cashna nijurcani: ‘Ñucapaj jipaca, shuj runagumi shamunga. Paica, ñucapaj ñaupariyajmi, Paica ñucapaj pundallatami ña causajurca’ nijurcanimi.

³¹ Paitaca, Dios cachamushca cashcataca na yacharcanichu. Ashtahuangarin, Israelcuna rijsinajuchunmi, yacupi bautizangapa shamurcani” nircami.

³² Shinallata Juanga, cashna nishpami villajurca: “Jahua pachamanda Diospaj Espíritu, palomagushna urai shamushpa, Paipaj umapi tiyarishpa saquirijta ricurcani.

³³ Ñucapash, Paitaca Dios cachamushca cashcataca na yacharcanichu. Ashtahuangarin, yacupi bautizajuchun ñucata cachamuj Taita Diosmi, cashna nihuarca: ‘Ñucapaj Espíritu urai shamushpa, umapi tiyarijpica, jucha illaj Espirituhuan Pai bautizana cajtami yachangui’ nihuarcami.

³⁴ Chaitaca ñucami ricurcani. Shina cajpimi: ‘Caimi, Diospaj Churi’ nishpa villajuni” nircami.

Callari yachajujcunamandami villajun

³⁵ Chai cayandi punllami Juanga, paipaj ishcai yachajujcunahuan cutin chaipillata shayajurca.

³⁶ Jesús chaita yalijujta ricushpami Juanga: “Ricuichi, Paimi Taita Dios cachamushca Llamagu” nijurca.

³⁷ Shina nijta uyashpami, chai ishcai yachajujcunaca, Jesusta catishpa rinajurca.

³⁸ Paicuna catishpa rinajujpi, Jesús tigrarishpa ricushpami: “¿Imatata mascanguichi?” nirca. Shina nijpimi paicunaca: “Rabí, ¿maipita causajungui?” ninajurca. (Rabí nishpaca: Yachachij nijunmi).

³⁹ Shina tapujpimi Jesusca: “Shamuichi ricunguichi” nirca. Shina nijpi rishpami, Pai maipi causajujtaca rijsinajurca. Paicunaca chai punllapica ña chishi cajpimi, Jesushuan chaipi saquirirca.

⁴⁰ Chai ishcaipuramanda shujca, Simón Pedropaj huauqui Andresmi carca. Paicunami, Juan chashna villajujta uyashpa, Jesusta catishpa rinajushca carca.

⁴¹ Paimi, paipaj huauqui Simonda punda tuparishpaca cashna nirca: “Mesiashuanga ñami tuparircanchi” nircami. (Mesías nishpaca, Cristo nijunmi).

⁴² Andresca, paipaj huauquita tuparishpaca, Jesuspajmanmi pushamurca. Jesús paita ricushpami, cashna nirca: “Canga, Jonaspaj churi Simonmi cangui. Cunanmandaca, Cefas shutimi cangui” nircami. (Cefas nishpaca, Pedro nijunmi).

Felipetapash, Natanaeltapash Jesús cayashcamanda

⁴³ Chai cayandi punllami Jesusca, Galilea llactaman ringapa munarca. Felipeta tuparishpaca: “Ñucata catihuai” nircami.

⁴⁴ Felipeca, Betsaida pueblomandami carca. Andrespash, Pedropash chai pueblomandallatami carca.

⁴⁵ Natanaelca, Felipeta tuparishpami cashna nirca: “Moisés mandashpa quilcashcapi, profetacuna quilcashcapi nishcashnami tuparishcanchi. Paica: Nazaret pueblomanda Josepaj churi Jesusmi” nijurcami.

⁴⁶ Shina nijpimi Natanaelca cashna nirca: “Nazaret pueblomandaca, ¿ima alipash llujshingachu?” nijpimi, Felipeca: “Shamui ricungui” nirca.

⁴⁷ Jesusca, Natanael Paipajman shamujujta ricushpami: “Ricuichi cai runaca, Israelpacha cashpami, umachinataca na yachan” nijurca.

⁴⁸ Shina nijpimi, Natanaelca: “¿Ñucataca maipita rijsihuarcangui?” nirca. Shina nijpimi Jesusca, cashna nishpa tigrachirca: “Felipepash canda nara jacu nijpillatami, higo yura ucupi tiyajujta candaca ricurcani” nircami.

⁴⁹ Shina nijpimi Natanaelca, cashna nirca: “Rabí, canga Taita Diospaj Churimi capangui. Canga, Israelcunata Jatun Mandajmi capangui” nijurcami.

⁵⁰ Shina nijpimi Jesusca, cashna nirca: “Candaca: ‘Higo yura ucupi tiyajujtami ricurcani’ ¿nijpillachu crihuangui? Na caitalla ricunguichu, ashtahuan caitapash yali imata rurajtapash ricunguirami.

⁵¹ Napacha llullashpami, cangunataca cashna nini: Cunanmandapachami, jahua pacha pascarishcata ricunguichi. Shinallata, Runa Aichayuj tucushca Ñucapaj jahuapi, Taita Diospaj angelcuna jahuaman rinajujta, uraiman shamunajundapashmi ricunguichi” nijurcami.