JOSUÉ 1 - Quichua Imbabura 2016

Llactata quichungapa alichirishcamanda

¹ Mandaj Diospajta ruraj Moisés huañushca jipami, Mandaj Diosca, Moisesta yanapaj, Nun shuti runapaj churi Josuetaca cashna nirca:

² “Ñucapajta ruraj Moisesca, ñami huañurca. Cunanga, Israelcunaman Ñuca carashca llactaman, Jordán yacuta chimbashpa tucui cai gentecunandi, richilla.

³ Ñucami, canguna maitalla purina tucuilla llactataca, Moisesman villashcashnallata cararcani.

⁴ Chaquishca pambamanda callarishpa, Líbano shuti urcuta yalishpa, Éufrates jatun yacucamanmi cangunapaj alpa canga. Shinallata, heteo gentecunapaj llactamanda callarishpaca, indi huashajun mama cuchacamanmi cangunapaj alpa canga.

⁵ Canhuanga, cambaj tucui causai punllacunapimi, pipash na shayari ushanga. Moisesta yanapashcashnami, candapash yanapasha. Candaca, napacha jichushpa saquishachu.

⁶ Na manllashpa, shinllipachami cana cangui. Cangunapaj ñaupa taitacunaman carashapachami nishpa juramentushca llactataca, canmi chaupishpa cai gentecunaman cungui.

⁷ Ñucapajta ruraj Moisés mandashcata pactachingapaca, na manllashpa, shinllipachami cana cangui. Tucui imatalla can rurangapa munashca ali llujshichunga, chai mandashcamandaca, alimambash, lluquimambash, na anchurinachu cangui.

⁸ Cai libropi mandashcata quilcacatinataca, napacha saquinachu cangui. Chai mandashcapi tucui imalla quilcashca tiyajujtaca tucuita pactachingapami, punllapash, tutapash yachajushpa catina cangui. Cambaj causaipipash chashna aliguta causajpimi, tucui imatalla rurashcapash ali llujshinga.

⁹ Ama manllashpa, shinlli tucungui nishpami mandani. Na manllashpa, na shaijunachu cangui. Canda Mandaj Taita Diosca, can maita rijpipash, canhuanmi casha” nijurcami.

¹⁰ Josueca, Israelcunata mandajcunataca cashna nishpami mandarca:

¹¹ “Carpacunata shayachishca chaupiman rishpa, tucui gentecunata cashna nigrichi: ‘Quimsa punlla jipaca, cangunata Mandaj Taita Dios carashca alpata japingapa, Jordán yacuta chimbana cashpami, cucabita yanuna canguichi’ nishpa mandaichi.” nircami.

¹² Josueca, Rubenbaj, Gadpaj mirai ayllucunatapash, Manasespaj chaupi ayllutapashmi cashna nijurca:

¹³ “Mandaj Diospajta ruraj Moisés mandashcata yarichi. Paica, cashnami nirca: ‘Cangunata Mandaj Taita Diosca, chai llactata carashpami, cangunataca samachisha’ nircami.

¹⁴ Cangunapaj huarmicuna, huahuacuna, animalcunaca, Jordán yacu caiman Moisés cushca alpapimi saquiringa. Ashtahuangarin, macanajunata ali yachaj, ninan shinlli runacunaca, tucuillami macanajunacunata apashpa, cangunapaj huauquicunata yanapangapa, ñaupashpa chimbana canguichi.

¹⁵ Mandaj Taita Dios cangunaman samanata carashcashna, cangunapaj huauquicunamambash, Mandaj Diosllata carashca alpata japingacamanmi chashna yanapana canguichi. Chai jipaca, Jordán yacuta yalimushpa, indi llujshimuj cai pushtucunaman, Mandaj Diospajta ruraj Moisés cushca alpacunaman tigramunguichillami. Shina tigramushpami, chai alpataca cangunapaj cachun japinguichi” nijurcami.

¹⁶ Shina nijpimi Josuetaca, cashna ninajurca: “Ñucanchica, can imata mandashcatapash tucuita rurapashunllami. Can maiman cachajpipash, ripashunllami.

¹⁷ Moisesta cazushcashnami, candapash cazupashun. Canda Mandaj Taita Dios, imashna Moiseshuan pacta cashcashnallata, canhuambash pacta cachunmi munapanchi.

¹⁸ Can mandashcacunata, tucui imatalla can nishcacunata, maijambash na cazungapa munashpaca, huañungapachami. Canga, na manllashpa, shinlli tucunatallami charipangui” ninajurcami.