JONÁS 1 - Quichua Imbabura 2016

Mandaj Diospaj ñaupajmanda, Jonás pacajushpa rishcamanda

¹ Mandaj Diosca, Amitai shuti runapaj churi Jonás runatami cashna nirca:

² “Nínive shuti jatun puebloman rishpa, paicunata llaquichina cashcata villagri. Paicuna na alita rurashcacunaca, ñami Ñuca ñaupajman chayamushca” nircami.

³ Shina nijpimi Jonasca, Mandaj Diospaj ñaupajmanda, Tarsis puebloman pacajushpa ringapa, Jope shuti puebloman urai rijurca. Paica, Mandaj Diospaj ñaupajmanda pacajushpa ringapami, Tarsis puebloman rigrijuj barcopi culquita cushpa, paicunahuan ringapa yaicurca.

⁴ Ashtahuangarin Mandaj Diosca, ninan huairatami mama cuchaman cachamurca. Shinamandami mama cuchapica, barcopash faquirishpa tucurinatashna ninan huairahuan tamiajurca.

⁵ Chaimandami barcota purichijcunaca, ninanda manllarishpa, paicunapaj dioscunata caparishpa mañanajurca. Shinallata, barco fangalla tucuchunmi, barcopi ima tiyashcatapash yacuman shitanajurca. Ashtahuangarin Jonasca, chai barcopi imatapash alichina ucuman uriajushpami, ninanda puñujushca carca.

⁶ Shina puñujujpimi, chai barcota purichijcunata mandaj runaca, Jonaspajman urai rishpa cashna nirca: “¿Imashpata puñujunguilla? Jatarishpa, cambaj Taita Diosta mañai. Imashpapash ñucanchita, cai llaquimanda quishpichingapashchari” nirca.

⁷ Tucuicunami, paicunapaj cumbacunata cashna ninajurca: “Maijanmanda cai llaquicunaca shamushcata yachangapa, Pipaj urmajta rurashpa yachashunchi” ninajurcami. Pipaj urmajta rurashpa ricujpica, Jonás runapajpimi urmarca.

⁸ Chaimandami paicunaca, cashna ninajurca: “¿Imashpata cai llaquicunaca shamun? ¿Imatata rurashpa causangui, maimandata shamungui? ¿Maijan llactamandata cangui, maijanpurata cangui?” ninajurcami.

⁹ Shina nijpimi Jonasca cashna nirca: “Ñucaca, hebreo runami cani. Jahua pachapi causaj Mandaj Taita Diostami cazushpa causani. Paica, mama cuchatapash, cai pachatapash ruraj Taita Diosmi” nirca.

¹⁰ Shina nijpimi chai runacunaca, ninanda manllarinajurca. Shinallata, Mandaj Diospaj ñaupajmanda pacajushpa rijushcata villajpi yachashpami: “¿Imapata chashna rurarcangui?” ninajurca.

¹¹ Mama cuchaca, ashtahuan ashtahuan shinlliyashpa cuyujujta ricushpami: “Cunanga, cai yacu casilla tucuchunga, ¿candaca imatata rurashun?” ninajurca.

¹² Shina nijpimi Jonasca cashna nirca: “Ñucata mama cuchaman shitajpillami, mama cuchaca casilla saquiringa. Ninan huairahuan cai tamiapash, ñucamanda cangunata cashna llaquijujtami yachani” nircami.

¹³ Chai runacunaca, barcota alpaman llujchishun yashpami, ashtahuan shinllita purichinajurca. Chai mama cuchaca, ashtahuan ashtahuan shinlliyashpa cuyujujpimi, alpaman llujchitaca na ushanajurca.

¹⁴ Chaimandami chai runacunaca, cashna nishpa Mandaj Diosta mañanajurca: “Mandaj Dioslla, cai runamandaca, ama ñucanchitapash huañuchihuaichu. Ima na alitapash na ruraj cai runapaj yahuarmandaca, ama ñucanchitapash juchachihuaichu. Mandaj Dioslla, can imata rurangapa munashcatami rurashcangui” ninajurcami.

¹⁵ Chai jipami Jonastaca, mama cuchaman shitanajurca. Shina shitajpimi mama cuchaca, ninandapacha shinlliyashpa cuyujushpapash, casilla saquirirca.

¹⁶ Chaita ricushpami, Taita Diostaca ninanda manllanajurca. Chaimandami animalta Taita Diosman cushpa huañuchishpa, tucuipi cazushpa causangapa ari ninajurca.

¹⁷ Ashtahuangarin Mandaj Diosca, Jonasta langachunmi, shuj jatun pijita cachamurca. Chai piji langajpica, quimsa punlla quimsa tutatami, pijipaj vijsa ucupi carca.