FILEMON 1 - Quichua Imbabura 2016

“Alillachu capangui” nishcami

¹ Jesucristomanda prezu tiyajuj Pablomi, huauqui Timoteondi, Diospajta rurashpa ñucanchihuan pacta purij juyashca Filemonman quilcamunchi.

² Shinallata, Apia shuti juyashca panimambash, ñucanchi cumba alipacha villaj Arquipo shuti huauquimanbash, Filemonbaj huasipi tandanajuj crijcunamanbashmi, quilcamunchi.

³ Ñucanchi Taita Diospash, Apunchi Jesucristopash, cangunaman ninan juyaita, ali causaita carachunmi munanchi.

Filemón runaca alipacha crij cashpami juyaita charishca

⁴ Ñuca Taita Diosta mañajushpaca, canda yariashpami “pashi” nijunilla.

⁵ “Apunchi Jesustaca alipacha crishpami, Diospajlla causajcunatapash, tucuillata juyajun” nijtami canmandaca uyarcani.

⁶ Cambash ñucanchishnalla alipacha crishpa, Cristo Jesusmanda tucuita yachajushpa, aliguta rurashpa pactachijuchunmi mañajuni.

⁷ Can juyashpa cushichishcamandami, ñucanchipash ninandapacha cushijushca canchi. Juyashca huauquigu, canmandami, Diospajlla causajcunapaj shungupash ninanda shinlli tucushca.

Pabloca, Onésimo shuti runagutaca “cutin chasquipangui” nishcami

⁸ Can ali cajta yachashpami, Cristomanda ushaita charishpa, can imatalla rurachumbash mandai ushanilla.

⁹ Shina cashpapash, candaca juyaihuanmi mañapani. Ña rucu Pablomi cani. Cunanga Jesucristomandami prezu tiyajuni.

¹⁰ Caipi prezu tiyajujpimi, Onésimo runaguca crishpa, ñuca huahuashna tucurca. Paimandami candaca ninanda mañapani.

¹¹ Pundaca, paica, cambajca imapallapash na alichu carca, ashtahuangarin cunanga, cambajpash, ñucapajpash ñami alipacha tucushca.

¹² Paitami cambajman cutin cachamujuni. Paitaca, ñucatashnalla chasquipangui ninimi.

¹³ Paitaca ñucahuan caipi saquirishpa, quishpirinamanda villajushcamanda ñuca prezu tiyajujpi, cambaj randi ñucapajta rurajuchunmi munaiman.

¹⁴ Ashtahuangarin, can nara imatapash nijpillata, ñuca munaita rurangapaca na munarcanichu. Ama ñuca nijpilla rurashpa, ashtahuangarin, can aliguta yarishpa, canllata rurapanguilla ninimi.

¹⁵ Onésimo runaguca, cambaj huasimandaca ashacamanllami llujshishpa rishcanga. Cunan can chasquijpica, huañuicamanmi canhuan causajunga.

¹⁶ Ashtahuangarin, ama cambaj gañandashna charishpami, cambaj huauquitashna juyashpa charina capangui. Ñucapash, paitaca ninandami juyani. Apunchi Jesusta crij cajpimi, paitaca huauquitashna ninanda juyana cangui.

¹⁷ Ñucapaj cumbapacha cashpaca, ñucatashnalla paitaca chasquipangui.

¹⁸ Pai imatapash na alita rurashpa llaquichishca cajpi, imamandapash cunata charijpica, ñucaman villahuanguilla. Paimandaca ñucami ricupasha.

¹⁹ Pablomi, ñuca maquihuambacha caitaca quilcamuni. Paimandaca, ñucami imata cashpapash tigrachipasha. Ashtahuangarin, cambashmi ñucaman cunata charingui nishpaca na yarichijunichu.

²⁰ Ari huauquigu, Apunchi Jesusta crij cajpi ima alitapash canmanda japingapami munani. Apunchi Jesusta crij cashcamandaca, ñuca shungupi cushichihuangui nipanimi.

²¹ Ñuca nijujta can cazushpa, ashtahuan yalitapash ruranata yachashpami caitaca quilcamuni.

²² Ñucata mingachingapapash alichijupangui. Canguna Diosta mañanajujta uyashpami, cangunapajman risha yashpa cushijushpa shuyajuni.

Aliguta causapanguichi, Dios bendiciapachun nishcamanda

²³ Cristo Jesusmanda ñucahuan prezu tiyajuj Epafras huauquipash, candaca “alillachu capangui” nijunmi.

²⁴ Ñucahuan Diospajta ruraj Marcos, Aristarco, Demas, Lucaspash, candaca “alillachu capangui” ninajunmi.

²⁵ Ñucanchi Apunchi Jesucristopaj ninan juyaica, cangunapi cachunmi munani. Chashna cachun.