ÉXODO 1 - Quichua Imbabura 2016

Israelcuna, Egiptopi llaquita apanajushcamanda

¹ Egipto llactamanga, taita Israelpaj churicunaca, paicunapaj ayllucunandimi yaicurca. Jacobpaj churicunapaj shuticunaca caicunami:

² Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad, Aser, shuticunami carca.

⁵ Jacobpaj miraicunaca, canchis chungami carca. Joseca, Egiptopimi ña causajurca.

⁶ Josepash, tucuilla paipaj huauquicunapash, chai tucui miraicunapashmi huañurca.

⁷ Israelcunaca ashtahuan mirashpami ninanda jundanajurca. Chashnami alipacha shinlli runacuna tucushpa, chai llactapica jundanajurca.

⁸ Chai punllacunapimi Egiptopica, Joseta na rijsishca shuj mushuj jatun mandaj tiyarirca. Chai mandajmi, chaipi causajcunataca cashna nijurca:

⁹ “Israelcunaca ñucanchita ashtahuan yali ashtacacunami. Paicunaca, ñucanchitaca yali ashtahuan shinllicunami.

¹⁰ Cunanga, paicuna ama ashtahuan mirachun, alipacha yarishpa paicunataca imatapash rurashunchi. Ñucanchihuan jatun macanajui tiyajpi, ñucanchita fiñajcunahuan tandanajushpa, paicunapash ñucanchihuan macanajushpaca, cai llactamanda llujshishpa ringallami” nijurcami.

¹¹ Shina nijpimi, Israelcunamanga ashtahuan shinlli ruraicunata cushpa llaquichinajuchun, shuj mandajcunata churarca. Shinallata, Pitón shuti, Ramesés shuti, pueblocunatami Faraonman shayachinajuchun mandarca. Chai pueblocunapimi, Faraonga ima charishcatapash alichijurca.

¹² Ashtahuangarin chashna ninanda llaquichinajujpipash, paicunaca ashtahuanmi mirashpa jundanajurca. Chaimandami Egipto llacta runacunaca, Israelcunataca ninanda manllanajurca.

¹³ Egipto llacta runacunaca, Israelcunataca shinllitapachami imatapash rurachishpa charirca.

¹⁴ Paicunataca, turuta, ladrillota rurachishpa charishpami, ninandapacha llaquichishpa charirca. Shinallata pambacunapipash, imata ruranacunapipash, shinllitapachami mandashpa charinajurca.

¹⁵ Egipto llactata jatun mandajca, huahuata unguchij hebreopura, Sifra shuti, Fúa shuti huarmicunatami cashna nirca:

¹⁶ “Hebreopura huarmicunata huahuata unguchinajushpaca, jari huahua cajpica, huañuchinguichilla. Huarmi huahua cajpica, causachun saquinguichilla” nircami.

¹⁷ Ashtahuangarin huahuata unguchij huarmicunaca, Taita Diosta manllashpami, Egipto llactata jatun mandaj ima nishcataca na rurashpa, jari huahuacunatapash causachun saquinajurca.

¹⁸ Egipto llactata jatun mandajca, huahuata unguchij huarmicunata cayachun cachashpami cashna nirca: “Cangunaca, ¿imashpata chashna rurarcanguichi? ¿Imashpata jari huahuacunatapash, causachun saquircanguichi?” nircami.

¹⁹ Shina nijpimi huahuata unguchij huarmicunaca, Faraondaca cashna ninajurca: “Hebreopura huarmicunaca, Egiptopi causaj huarmicunashnaca na canllu. Paicunaca shinllicuna cashpami, ñucanchi nara paicunapajman chayajpillata ungunlla” ninajurcami.

²⁰ Shina shinllicuna cashpami Israelcunaca ashtahuan miranajurca. Shinallata, Taita Diosca chai unguchij huarmicunata alicachircami.

²¹ Chai unguchij huarmicuna, Taita Diosta manllashcamandami, paicunataca bendiciashpa mirachirca.

²² Shinamandami Faraonga, tucuilla paipaj gentecunata cashna nishpa mandarca: “Jari huahuata ungujpica, jatun yacupi shitanguichilla. Tucui huarmi huahuacunataca, causachun saquinguichilla” nircami.