ESTER 1 - Quichua Imbabura 2016

Vasti shuti huarmi, jatun mandaj Asuero runata na cazushcamanda

¹ Asuero shuti runaca, patsaj ishcai chunga canchis marcacunatami, India shuti llactamanda, Etiopía llactacaman mandajurca.

² Jatun mandaj Asuero shuti runaca, llactata mandana Susa shuti pueblopimi, shinllitapacha mandajurca.

³ Paica, quimsa huatata ña mandajushpami, pai churashca cati mandajcunaman, paipajta rurajcunaman, jatun micuita rurarca. Chai jatun micuipica, Persia shuti, Media shuti llactacunamanda ninan ushaita charijcunapash, llactacunata mandajcunapashmi, paihuan chaipi carca.

⁴ Pai mandajuj llactapi ima juyailla tiyashcacunata, nina juyailla jatun ushaihuan mandajushcata ricuchingapami, patsaj pusaj chunga punllacaman micuitaca rurarca.

⁵ Chai punllacuna ña yalijpica, pai mandana jatun huasi quimiriaj patio huertapimi, cutin shuj jatun micuita, canchis punllacaman rurarca. Chai micuitaca, tucuilla Susa shuti pueblopi causanajuj alicachi tucushca gentecunaman, yangalla gentecunamambashmi rurarca.

⁶ Chaipica yuraj, verde, azul juyailla telacunahuanmi huarcushpa alichishca carca. Chai telacunataca, racuta caupushca lino puchacunahuan, yana puca racu puchacunahuan, culqui argollacunapi, mármol rumi pilarcunapi yalichishpa huatashcami carca. Marcarishpa tiyarinacunapash, curihuan, culquihuan rurashcami carca. Chaicunataca, alabastro, jacinto, yuraj, yana rumicunahuan rurashca jahuapimi rurashca carca.

⁷ Ufiachumbash, shujta shujta rurashca curi copacunapimi caranajurca. Jatun mandajcuna ufiana vinotapash, jatun mandaj na mitsashpa carachun mandashcashnami, ashtacatapacha caranajurca.

⁸ Chai ufianataca: “Pimambash, munai na munaica na caranachu canguichi. Paicuna munashcatalla caranguichi” nishpami, jatun mandajca, paipajta rurajcunataca mandashca carca.

⁹ Shinallata jatun mandaj Vasti shuti huarmipashmi, chai mandajcunapaj huarmicunaman, jatun mandaj Asuero shuti runa mandana huasipi, jatun micuita rurajurca.

¹⁰ Chai micuicuna tucuri canchis punllapimi, jatun mandajca vinota ufiashpa, paipaj shungupi cushijushca tiyajurca. Shina cashpami jatun mandaj Asuero shuti runaca, Mehumán, Bizta, Harbona, Bigta, Abagta, Zetar, Carcas shuti, paipajta ruraj ali cumbaj canchis runacunata cayarca.

¹¹ Paicunataca, jatun mandaj huarmicuna churajun coronata, jatun mandaj Vasti shuti huarmiman churachishpa, pushamuchunmi cacharca. Chai huarmi juyaillagu cashcata tucui gentecuna, cati mandajcuna ricuchunmi, pushamuchun cacharca. Chai huarmica, juyaillagupachami carca.

¹² Ashtahuangarin, jatun mandaj Vasti shuti huarmica, chai canchis runacunahuan, pushamuchun mandashpa cachashcataca, na cazushpami, paipaj ñaupajman na shamurca. Chaimandami jatun mandajca, ninandapacha fiñarirca.

¹³ Shina cajpimi, punllacuna imashna cajta ricuj ali yachajcunata tapurca. (Paicunata tapuj cashpami, jatun mandajca mandashca shimitapash, imata ruranatapash alipacha tucui yachajushcacunata tapurca.

¹⁴ Chaipica: Carsena, Setar, Admata, Tarsis, Meres, Marsena, Memucán shuti canchis cati mandajcunami, jatun mandajhuan pacta cashpa, paihuan parlai ushaj carca. Paicunaca, Persia shuti, Media shuti llactacunata mandajcunami carca).

¹⁵ Jatun mandaj Asuero runaca: “Mandashcapi nijujshnaca, jatun mandaj Vasti shuti huarmitaca, ¿imatata rurana canchi?” nishpami tapurca. Chai canchis runacunahuan pushamuchun cachajpi, na cazushcamandami, chashna tapurca.

¹⁶ Chaita tapujpimi, Memucán shuti cati mandajca, jatun mandajpaj ñaupajpipash, caishuj cati mandajcunapaj ñaupajpipash, cashna nijurca: “Jatun mandaj Vasti shuti huarmi, chashna na cazushpaca, na Asuero jatun mandajtalla llaquichishcachu. Ashtahuangarin, cati mandajcunatapash, tucui llactacunapi causaj gentecunatapashmi llaquichishca.

¹⁷ Ashtahuangarin, jatun mandaj huarmi chashna rurashcataca, tucui huarmicuna yachaj chayashpaca, paicunapaj cusacunata yangapi churashpami, cashna ninajunga: ‘Jatun mandaj Asuero shuti runaca, jatun mandaj huarmitami paipaj ñaupajman pushamuchun cachashca. Shina cachajpipash, paica na cazurcachu’ ninajungami.

¹⁸ Shinamandami, jatun mandaj huarmi chashna rurashcataca, Persia shuti, Media shuti llactacunata mandajcunapaj huarmicuna yachanga. Shina yachashpami, jatun mandaj churashca tucui cati mandajcunaman villanajunga. Shina cashpami, ninanda na cazurinajuicuna, fiñanajuicuna tiyanga.

¹⁹ Shina cashcamanda can jatun mandajpaj ali cajpica, can jatun mandajllata shuj mandashcata quilcachipailla: ‘Vasti shuti jatun mandaj huarmica, jatun mandaj Asuero runapaj ñaupajman, ama ashtahuan shamuchun’ nishpa mandapailla. Shinallata jatun mandajca, chai huarmipaj randica, shuj ashtahuan ali huarmita, jatun mandaj huarmi cachun churapangui. Chai mandashcata ama yangapi churachunga, Persia shuti, Media shuti llactacunapi tiyaj mandashcacunapipash quilcachipangui.

²⁰ Jatun mandaj, can mandashpa quilcachishcataca, can mandana llacta jatun cajpipash, tucui llactacunapimi uyanajunga. Shina cajpimi tucui huarmicuna, paicunapaj cusacunataca, ashtahuan alicuna cajpipash, yangallacuna cajpipash, cazunajunga” nijurcami.

²¹ Jatun mandajpaj yuyaipipash, cati mandajcunapaj yuyaicunapipash, chai shimicunaca alimi uyarirca. Chaimandami jatun mandajca, Memucán shuti cati mandaj ima nishcatapash pactachirca.

²² Paica, pai jatun mandaj mandajuj tucuilla marcacunamanmi cartacunata cacharca. Tucui marcacunamanmi, paicunapaj rimaicunapi quilcashpa cacharca. Chai cartacunapica: “Tucui cusacunami, cangunapaj huasipica, huarmicunataca ali cazuchina canguichi” nijurcami. Chaitaca: “Tucui marcacunapi causaj gentecunapaj rimaicunapimi villana canguichi” nishpami cacharca.