ESDRAS 1 - Quichua Imbabura 2016

Ciro shuti jatun mandaj, Jerusalenman tigrachun mandashcamanda

¹ Ciro shuti jatun mandajca, Persia llactataca ñami shuj huatata mandajurca. Chai huatapimi Mandaj Diosca, Jeremías villashca pactachun, Mandaj Diosllata, Persia llactata jatun mandaj Ciro shuti runaman shuj yuyaita curca. Shina cashpami, pai mandajuj tucui llactacunapica shimihuanbash, quilcashcahuanbash cashna nichun mandarca:

² “Persia llactata jatun mandaj Ciro shuti runami, cashna nin: ‘Jahua pachapi causajuj Mandaj Diosmi, cai pachapi tiyaj tucui llactacunata mandachun cuhuarca. Paillatami, Judá llactapi tiyaj Jerusalenbi, Paipaj huasita shayachijuchumbash mandahuarca.

³ Shina cashcamanda, Diosta catijcuna tiyashpaca, Judá llactapi tiyaj Jerusalenman tigranallami. Chaiman rishpami, Israelcunata Mandaj Diospaj huasitaca cutin shayachinga (Paica, Taita Diospachami)’ nircami.

⁴ Shinallata chai llactapillata saquirishpa maipi causanajujpipash, culquita, curita, imalla alicunata, animalcunata carashpa yanapanguichi. Taita Diospaj huasita Jerusalenbi shayachinajuchun, cangunapaj tucui munaihuan imagutapash carashca jahuami, chashna rurana canguichi. ninmi” nishpa villachunmi mandarca.

Jerusalenman tigrashcamanda

⁵ Shinamandami Judá ayllupaj, Benjamín ayllupaj ñaupa taitacunapaj huasi ucupuracunata mandajcunapash jatarinajurca. Shinallata, sacerdotecunapash, levitacunapash, Mandaj Diospaj huasita shayachingapa, Jerusalenman vichai rina yuyaita Taita Dios cujpimi, tucuicuna ringapa alichirinajurca.

⁶ Paicunapaj muyundipi tucui causajcunami, culquihuan, curihuan, tucui alicunahuan, animalcunahuan, ima juyaillacunahuan, paicunapaj munai carashca jahua, chashna yanapanajurca.

⁷ Mandaj Diospaj huasipi imalla tiyashcacunataca, jatun mandaj Ciro shuti runami tigrachingapa llujshirca. Chaicunataca Nabucodonosor runami, Jerusalenmanda llujchishpa apashpa, paipaj dioscunapaj huasipi churashca carca.

⁸ Persia llactata jatun mandaj Ciro shuti runaca, culquita alichij Mitrídates shuti runatami llujchichun mandarca. Paimi, Judá llactata mandaj Sesbasar shuti runapaj maquipi yupashpa curca.

⁹ Paicuna yupashcacunaca, caicunami carca: quimsa chunga curi tastacuna, huaranga culqui tastacuna, ishcai chunga iscun cuchillocuna,

¹⁰ curita rurashca quimsa chunga uchilla tastacuna, culquita rurashca chuscu patsaj chunga uchilla tastacuna, ashtahuan shuj huaranga imalla charishcacunami carca.

¹¹ Curita, culquita rurashca imalla charishcacunaca, picha huaranga chuscu patsajmi carca. Chaicunataca, Sesbasar shuti runaca, Babilonia llactapi prezu causanajushcamanda, Jerusalenman paihuan vichai shamujcunahuanmi apamurca.