EFESIOS 1 - Quichua Imbabura 2016

“Alillachu capanguichi” nishcami

¹ Taita Dios munashpa agllashca, Jesucristopaj apóstol Pablomi cani. Éfeso pueblopi Taita Diospajlla causanajuj, Cristo Jesusta alipacha catijcunatami “alillachu capanguichi” nijuni.

² Ñucanchi Taita Diospash, Apunchi Jesucristopash, ninan juyaita, ali causaiguta cangunaman carachunmi munani.

Cristomandami bendicionda chasquinchi

³ Ñucanchi Apunchi Jesucristopaj Taita Diosca ninanda alicachi tucushca cachun. Jesucristopimi ñucanchitaca, jahua pachamanda ninandapacha bendiciamushca.

⁴ Diosca cai pachata nara rurashpallatami ñucanchitaca, Jesucristopaj agllarca. Paipajlla causashpa, ima juchatapash saquichunmi chashna agllarca.

⁵ Pundamandapacha ninanda juyashpami, Jesucristomanda Paipaj huahuacuna cachun, Paillata munashpa, ninanda juyashpa agllarca.

⁶ Diosca ninanda juyashpami, Paita alicachinajuchun, Paipaj juyashca Churimanda ñucanchitaca chasquirca.

⁷ Diosca, ñucanchita ninandapacha juyashpami, Jesucristopaj yahuarhuan ñucanchi juchacunata anchuchishpa quishpichirca.

⁸ Shinallata, ali yachajushca cachumbash, ali yuyaita charichumbash, Paillatami ninan ushaita caramurca.

⁹ Shinami, Diosca pacashpa charishcacunataca, cunanbi ñucanchiman ricuchimushca. Paillata ninanda juyashpami chashna pactachimushca.

¹⁰ Diosca, Pai munashcata rurana punllacuna chayamujpimi, jahua pachapi tiyajcunahuan, cai pachapi tiyajcunahuan, tucuilla tandachishpa Cristo mandachun churanga.

¹¹ Jesucristomandami tucuita carasha nijushcataca japircanchi. Pundamandapacha, Pai munashcashna tucuita ruraj cashpami, Pai munashcata pactachirca.

¹² Pundamandapacha Cristota ñucanchi shuyanajushcamandami, ninan ushaita charij Diosta ninanda alicachinajuchun chashna pactachirca.

¹³ Shinamandami, cangunaca quishpirinamanda na llullaj shimita uyashpa, Cristota crishcamanda, jucha illaj Diospaj Espirituhuan sellai tucushca canguichi.

¹⁴ Canguna ña quishpirishca cashcamanda, Dios carasha nishcata japigrinatami ricuchijun. Taita Diosta ninanda alicachishpa causachunmi chashna ricuchijun.

Ali yachajunata caraj Espiritumanda

¹⁵ “Apunchi Jesusta alipacha crishpami, Diospajlla causajcunatapash tucuicunata juyanajun” nijtami cangunataca uyarcani.

¹⁶ Chaimandami, cangunamandaca, na shaijushpa Diosta pashi nijuni.

¹⁷ Ñucanchi Apunchi Jesucristopaj Taita Diosca ninan ushaitami charin. Shina cashcamandami, alipacha yachajushca cana Espiritutapash, Diosta ashtahuan rijsina Espiritutapash cangunaman carachun mañajuni.

¹⁸ Cangunapaj yuyaita punchayachijpi, Dios imapa agllashcata yachashpa shuyanajuchunmi mañajuni. Shinallata, Paipajlla causajcuna, jahua pachapi imatapash juyailla japigrinata yachachunmi mañajuni.

¹⁹ Shinallata, Dios jatun ushaita charijta tucui crijcuna yachachunmi mañajuni. Diosca, jatun ushaita charishcata ricuchingapami,

²⁰ Cristotaca, huañushcacunapaj chaupimanda causachirca. Shinami, jahua pachaman pushashpa, Paipaj ali maquiman tiyachirca.

²¹ Ushaita charij mandajcunata, cati mandajcunatapash, tucuicunata mandangapami Cristoca chashna tiyarirca. Na cunan punllacunapilla mandajungachu, ashtahuangarin shamui punllacunapipashmi Paica tucuita mandajunga.

²² Tucui ima tiyajtapash, Cristo mandachunmi Diosca ushaita cararca. Shinallata, tandanajushca crijcunatapash umashna mandachunmi, Paiman ushaita curca.

²³ Tandanajushca crijcunaca Cristopaj cuerposhnami. Shinamandami, Cristo tucuipi paicunahuan cajpica, tucuipi ali causanajunga.