DANIEL 1 - Quichua Imbabura 2016

Danielca, paipaj cumbacunandimi Babiloniapi causajushca

¹ Judá llactata jatun mandaj Joacim runaca, ña quimsa huatatami mandajurca. Chai huatapimi, Babilonia llactata jatun mandaj Nabucodonosor runaca Jerusalenman shamushpa, chai pueblota chaupipi churarca.

² Jatun Diosca, Judá llactata jatun mandaj Joacim runataca, Nabucodonosor runapaj maquipimi churarca. Taita Diospaj huasipi imatalla charishcatapashmi shuj ashataca, chai runapaj maquipi churarca. Chaicunataca, Sinar shuti llactaman apamushpami, paipaj diospaj ucupi alichirca.

³ Jatun mandajca, eunuco runacunata mandaj Aspenaz shuti runatami cashna nirca: “Israelpuramandaca, jatun mandajpaj mirai mandajcunapaj churicunata apamungui.

⁴ Paicunaca, imapash na huagli, ali ñavi, tucuita alipacha yachajushca, imata cashpapash alipacha yachaj, ali yuyaita charij huambracunami cana. Jatun mandaj mandashpa tiyajuna huasipi imata ruraitapash ushanallacuna cachun. Paicunataca, ñucanchi caldeo gentecunapaj quilcacunatapash, rimaicunatapashmi yachachina canguichi” nircami.

⁵ Jatun mandaj Nabucodonosor runaca, pai jatun mandajpaj micunatallata, pai ufiana vinotallatami, punllandi paicunaman carachun mandarca. Quimsa huatacaman chashna charishca jipaca, pai jatun mandajpaj ñaupajman pushamuchunmi mandarca.

⁶ Chai huambracunaca, Daniel, Ananías, Misael, Azarías shuticunami carca. Paicunaca, Judá ayllupurami carca.

⁷ Paicunatami, eunuco runacunata mandaj runaca, shuj shutita shutichirca. Danieltaca, Beltsasar shutita, Ananiastaca, Sadrac shutita, Misaeltaca, Mesac shutita, Azariastaca, Abed-nego shutitami shutichirca.

⁸ Danielca, paipaj shungupimi, jatun mandajpaj micunahuan, vinohuanga, napacha mapayashachu yajurca. Chaimandami, eunuco runacunata mandajtaca: “Cai micunacunata micushpaca mapayashami, chaicunata micuchunga ama mandahuaichu” nirca.

⁹ Danieltaca, Taita Diosllatami eunuco runacunata mandajpaj ñaupajpi ali ricurichun churarca.

¹⁰ Chaimandami eunuco runacunata mandajca, Danieltaca cashna nirca: “Ñucata jatun mandajtami manllani. Paimi, cai micunatapash, vinotapash cangunaman punllandi carachun mandahuarca. Cangunashnallata chaishuj huambracuna ali cajpi, cangunaca paicunata yali irquilla ñavita ricushpaca, ñucatami jatun mandajca huañuchihuanga” nircami.

¹¹ Eunuco runacunata mandajca, Daniel, Ananías, Misael, Azarías shuti huambracunata ricuchunmi, Melsar shuti runata churashca carca. Paitami Danielca cashna nirca:

¹² “Cambajta ruraj ñucanchitaca, micunatapash aicha illajta, ufiangapapash yacutalla chunga punllacaman carashpa ricupai nipanimi.

¹³ Jatun mandajpaj micunata micuj huambracunapaj ñavihuan, ñucanchi ñavihuan chimbapurashpa ricupanguilla. Chai jipaca, cambajta ruraj ñucanchi imashna cajpipash ricushpa, canllata imatapash rurapanguilla” nircami.

¹⁴ Chashna rurangapa ari nishpami, chunga punllacaman chashna carashpa ricurca.

¹⁵ Ña chunga punlla jipa, paicunata ricujpica, jatun mandajpaj micunata micuj, chaishuj huambracunatapash ashtahuan yali ali racucunami carca.

¹⁶ Shinamandami Melsar shuti runaca, paicuna micuchun apamushca micunatapash, paicuna ufiana vinotapash apashpa, aicha illaj micunatalla carajurca.

¹⁷ Chai chuscu huambracunamanmi, Taita Diosca tucui quilcacunata, ima shuj yachajunacunata alipacha yachajuchun, ali yuyaita curca. Danielca, muscuipishna tucuita ricushcatapash, muscuicunatapash ima cajta yacharcallami.

¹⁸ Jatun mandajca, paicunata ima punlla paipajman pushanatami mandashca carca. Chai punlla pactajpimi, eunuco runacunata mandajca, Nabucodonosor runapaj ñaupajman pusharca.

¹⁹ Chaipimi jatun mandajca, paicunahuan rimajurca. Tucui paicunapurapica, Daniel, Ananías, Misael, Azarías shuti huambracunashnaca, pipash na tiyarcachu. Chashnami paicunaca, jatun mandajpaj ñaupajpi paipajta ruranajurca.

²⁰ Alipacha yachaihuan, ali yuyaihuan tigrachina tapuicunatami, jatun mandajca tapujurca. Shina tapujpica, pai mandajuj llactapi tiyaj tucui yachajcunatapash, luzerocunata ricujcunatapash, chungacaman yali alipacha tigrachindami ricurca.

²¹ Danielca, jatun mandaj Ciro shuti runa mandai callari huatacamanmi chaipi causajurca.