APOCALIPSIS 1 - Quichua Imbabura 2016

Jipaman ima tucunatapash, Jesucristomi ricuchishca

¹ Jipaman ima tucunatapash, Paita catijcunaman villachunmi, Taita Diosca Jesucristoman curca. Chaicunaca ñallami pactana carca. Chaitaca, Paipaj angelta cachamushpami, Paipajta ruraj Juanman villarca.

² Juanmi, Taita Diospaj Shimitapash, Jesucristo imata villashcatapash, pai imata ricushcatapash, aligutapacha villajun.

³ Jipaman ima tucunata, caipi quilcashpa villashca shimicunata quilca catishpa, uyashpa, cazushpa pactachijcunaca, ninanda cushijuichi. Caicuna pactana punllacunaca ñami chayamujun.

Canchis pueblocunapi tandanajuj crijcunatami “alillachu capanguichi” nishca

⁴ Asia llactapi tiyaj, canchis pueblocunapi tandanajuj crijcunamanmi quilcani. Ñucami Juan cani: “Diosca, cunambash Paillatami causajun, pundapash Paillatami causajurca, Paillatami shamunga. Shinallata, Pai mandangapa tiyarina ñaupajpi tiyanajuj, canchis espiritucunapash, ninan juyaita, ali causaiguta charipanguichi” ninajunmi.

⁵ Shinallata, villachun mingashcata aliguta pactachij Jesucristopashmi, chashna “ali causaiguta charipanguichi” nijun. Paimi, huañushcacunapaj chaupimandapash punda causarirca. Shinallata, cai pachapi tiyaj jatun mandajcunatapash, Paimi mandajun. Paica, ñucanchita juyashpami, ñucanchi juchacunataca, Paipaj yahuarhuan maillarca.

⁶ Paimi ñucanchitaca, jatun mandajcuna tucushpa, sacerdotecuna tucushpa, Taita Diospajta rurajcuna cachun churarca. Paitami, “causaita causaicaman, tucuita mandajmi cangui, jatun ushaita charijmi cangui” nina canchi. Chashna cachun.

⁷ Ricuichi, Cristoca fuyupimi shamunga. Paitaca, tucuicunami ricunga. Paita chugrichishpa huañuchijcunapash ricungami. Cai pachapi miraicunaca tucuicunami, Paita ricushpa ninanda llaquirishpa huacanajunga. Ari, Chashna cachun.

⁸ “Ñucami, A letrashna tucuita callarichijpash, Z letrashna tucuita tucuchimujpash cani” nijunmi Taita Diosca. Tucui Ushaita Charij Dios cashpami, cunambash Paillata causajun, pundapash Paillatami causajurca, Paillatami shamunga.

Runa Aichayuj Tucushcatami muscuipishna ricushca

⁹ Ñucami, cangunapaj huauqui Juan cani. Jesucristota crishcamanda, cangunashnallata llaquicunata apajushpami, Dios mandanapi cashpa ñaupajman catijuni. Ñucami, Taita Diospaj Shimita villajushcamanda, shinallata, Jesucristo imatalla pactachishcata villajushcamanda, mama cucha chaupipi tiyajuj, Patmos shuti pueblopi prezu tiyajurcani.

¹⁰ Chaipica, Apunchi Jesusta yarina punllapimi, Diospaj Espiritupaj ushaihuan cashpa, trompeta huacajshna, shinllita ñuca huashata rimamujta uyarcani.

¹¹ Cashna nijtami uyarcani: “Ñucami, A letrashna tucuita callarichijpash, Z letrashna tucuita tucuchimujpash cani. Can imata ricushcatapash, shuj libropi quilcangui. Chaitaca, Asia llactapi tiyanajuj: Éfeso, Esmirna, Pérgamo, Tiatira, Sardis, Filadelfia, Laodicea shuti, canchis pueblocunapi tandanajuj tucui crijcunaman cachangui” nihuarcami.

¹² Shina nijpimi, “pita ñucahuan rimajun” yashpa, tigrarishpa ricurcani. Shina ricushpaca, curita rurashca canchis candelerocunatami ricurcani.

¹³ Chai canchis candeleropaj chaupipica, Runa Aichayuj tucushcaman rijchajtami ricurcani. Paica, chaqui pundacaman churajushcami, curi chumbitapash pechopi huatarishca shayajurca.

¹⁴ Paipaj uma ajchapash, yuraj milmashna, rasushna yuraj yurajmi carca. Pai ricujuj ñavipash, nina rupajujshnami carca.

¹⁵ Paipaj chaquipash, nina hornopi bronceta rupachishpa punchayachishcashnami carca. Pai rimajujpash, ashtaca yacu ninanda huacajunshnami uyarijurca.

¹⁶ Paipaj ali maquipica, canchis luzerocunatami charijurca. Paipaj shimimandaca, ishcandi manñaman filo filo shuj espadami llujshijurca. Paipaj ñavipash, indi ninandapacha rupajujshnami, punchapamba shitamurca.

¹⁷ Paita ricushpaca, huañushcashnami Paipaj chaquipi shitarircani. Shina shitarijpimi, Paipaj ali maquita ñuca jahuapi churashpa cashna nihuarca: “Ama manllarichu. Ñucami callarichijpash, tucuchijpash cani.

¹⁸ Ñucami huañushpapash cutin causajuni. Cunanga, causaita causaicamanmi causajuni. Chashnapachami cani. Huañuipajpash, Hadespajpash, Ñucami pascanacunataca charijuni.

¹⁹ Imata ricushcatapash, cunanbi imashna cajtapash, caicunapaj jipa ima tucunatapash quilcangui ninimi.

²⁰ Ñuca ali maquipi charijuj, can ricushca canchis luzerocunapash, curita rurashca canchis candelerocunapash, cashnatami villajun: Chai canchis luzeroca, canchis pueblopi tandanajuj crijcunapaj angelcunami. Can ricushca canchis candelerocunaca, canchis pueblopi tandanajuj crijcunami.