ABDÍAS 1 - Quichua Imbabura 2016

Edom llactapi causajcunata, llaquichinamanda

¹ Abdías shuti runaca, muscuipishnami ricushca. Mandaj Diosca, Edom llactapi causajcunamandaca, cashnami nirca: “Mandaj Dios Ñuca villashcataca uyashcanguichimi. Shuj villajtami, tucui llactacunapi causajcunaman villachun cachamurcani. Chai villaj runaca: ‘Edom llactapi causajcunahuan macanajungapa, tucuilla jatarishpa jacuchi’ nircami.

² Edom llacta, candaca cai pachapi llactapuramandaca, ashtahuan uchilla llactatami rurasha. Canga, tucuicuna na ricunayachishcami cangui.

³ Cambaj shungupi pitapash na cazushpa jariyashpami, pandarishcangui. Urcupi, rumi chaupicunapi causajushpami, canga: ‘¿Pita caimandaca, pambaman urmachihuangayari?’ yajungui.

⁴ Jatun angashna rijujpipash, luzerocunapaj chaupicunapi tazinda rurashpa tiyajujpipash, urmachishallami” ninmi Mandaj Diosca.

⁵ Taita Diosca cashnatapashmi nirca: “Shuhuacuna tuta shamushpaca, ¿nachu paicuna apai ushanalla, ashtahuan alicunatalla apanman? Uvacunata pallajcuna shamushpapash, ¿nachu huaquin pallajunata saquinman? (¡Candaca ashatallapash na saquishpami tucuchinga!)

⁶ ¡Esaú imatalla charishpa pacashcatapash, tucuillami quichurca! Ima juyaillacunata charishcatapash, tucuillami mascashpa aparca!

⁷ Canhuan ali causanajuj llactacunallatami, candaca umachirca. Tucui llactacunapi, chingashca purijuchunmi calpachirca. Canhuan cushijushpa causajcunallatami, candaca fiñashpa llaquichirca. Canhuan micushpa tiyajcunallatami, tugllata churanshna japichirca. Paicunapaj shungupica, imata ali yaringapapash illanmi” ninmi.

⁸ Mandaj Diosca, cashnatapashmi nin: “Chai punllapica, ¿nachu Edom llactapi causaj alipacha yachajushca runacunata huañuchisha? ¿Nachu Esaupaj urcupi alipacha yachajushca runacuna causanajujta, huañuchinajuchun saquisha?

⁹ Temán shuti pueblomanda, alipacha macanajunata yachaj runacunapash, ninandami manllaringa. Esaupaj urcupi causajcunapash, ninanda llaquichijpimi huañushpa tucuringa.

¹⁰ Cambaj huauqui Jacobta na alicachishpa rimashcamandami, ninanda pingaichi tucungui. Canga tucuillami tucuchi tucungui, causaita causaicamanmi chashna llaquichi tucungui.

¹¹ Can ricujta, Jerusalén gentecunata ista runacuna, prezu apajui punllapica, Jerusalén pueblo pungucunatapash, faquishpa ima tiyashcatapash, pipaj urmajta ricushpami chaupirinajurca. Chaipi imatapash na rurashcamandami, cambash paicunashnallata tucurcangui.

¹² Cambaj huauqui chashna llaquita apajui punllapica, na cushijushpa ricujunachu carcangui. Judá llactapi causajcuna llaquichi tucujui punllapica, na cushijunachu carcangui. Paicuna llaquita apajui punllapica, na cushijushpa asijunachu carcangui.

¹³ Pai llaquita apajui punllapica, Ñuca agllashcacunapaj pueblo pungutaca na yaicunachu carcangui. Pai llaquita apajui punllapica, napacha ricujunachu carcangui. Paita ninanda llaquichijui punllapica, pai imata charishcatapash, napacha japinachu carcangui.

¹⁴ Huañunamanda pacajushpa rinajujtapash, canga na ñangunapi chapashpa, huañuchinachu carcangui. Chai llaquichijui punllapi, pacajushcacunataca na llaquichinajuchun cunachu carcangui.

Israelcunaca jatumbi churai tucuna cashcamanda

¹⁵ Mandaj Dios tucui llactacunata, ninanda llaquichina punllami ña chayamujun. Imashnami shujcunata ninanda llaquichircangui, chashnallatami candapash llaquichinga. Can llaquichishcamandami, llaquitaca apanallata cangui.

¹⁶ Imashnami Ñucapajlla urcupi, jayajta copapi ufianshnami llaquichi tucurcanguichi, chashnallatami tucuilla llactapi causajcuna jayajta ufianshnallata llaquichi tucunguichi. Shina cashpami, tucuilla tucurishpa imallapash na saquiringa.

¹⁷ Ashtahuangarin Sión lomapica, huaquinguna quishpirishpa saquiringami. Chai lomaca, Diospajlla agllashca lomami. Jacobpaj miraicunaca, paicunapaj alpacunataca cutinmi japinga.

¹⁸ Jacobpaj miraicunaca, rupachij ninashnami canga. Josepaj miraicunaca, tucuita rupachishpa tucuchijmi canga. Esaupaj miraicunaca, ujsha jupashnami canga. Shina cashpami, ñapash tucurinalla canga. Esaupaj miraicunaca, ashallapash na puchungachu” ninmi, Mandaj Diosca.

¹⁹ Neguev llactapi causajcunaca, Esaupaj miraicuna causana urcutami japinajunga. Sefela shuti pambapi causajcunaca, filisteocunapaj llactatami japinajunga. Efraín llactatapash, Samaria llactatapashmi japinajunga. Benjaminbaj miraicunaca, Galaad llactatami japinajunga.

²⁰ Prezu apai tucushcamanda tigramushca Israel macanajuj rurajcunaca, cananeo gentecuna causanajuj llactata, Sarepta shuti pueblocamanmi japinajunga. Jerusalenmanda prezu apajpi, Sefarad shuti pueblopi causajcunaca, Neguev pambapi tiyaj pueblocunatami japinajunga.

²¹ Tucuita mishashpa tucuchishpami, Esaupaj urcu alpacunata, Sión lomamanda mandangapa vichai rinajunga. Chashnami mandanaca, Mandaj Diospajlla canga.