LUCAS 1 - Diospaj Shimi

Cai librotaca, Teófilo shuti runamanmi escribishca

¹ Ñucanchi purapi, ima juyailla rurashcacunata, chashnapacha cajta yachashcatami, taucacuna aligutapacha callarimanda escribishpa churangapaj callarishca.

² Paicunapaj ñavihuan callarimanda imata rurajta ricushcacunami, chaitallata ñucanchiman yachachinajurca. Paicunaca Diospaj Shimita villashpami, Diospajta ruranajurca.

³ Ñuca escribingapajpash ali cana cajpimi, callarimanda imata rurashcacunata manñamandapacha aliguta tapushpa purijurcani. Chaicunatami, aligutapacha churashpa, alicachi tucushca quiquin Teofiloman escribishpa cachamuni.

⁴ Canman chaicunata alipacha yachachishca cajpipash, chai yachashcacunaca chashnapacha cajta ashtahuan aliguta yachachunmi escribini.

Bautizaj Juan huacharinatami, ángel villashca

⁵ Judea llactata jatun mandaj Herodes mandajui punllacunapimi, Zacarías shuti cura causajurca. Paica, ñaupa Abías shuti cura purami carca. Zacariaspaj huarmica, Elisabet shutimi carca. Paica, ñaupa Aarón shuti curapaj mirai purami carca.

⁶ Paicunaca, cusandi huarmindimi, Taita Diospaj ñaupajpica imatapash cashcatapacha rurashpa causajcuna carca. Jatun Dios rurachun mandashcacunatapash, tucuita pactachijcuna cajpimi paicunataca, pipash na juchachi ushan carca.

⁷ Elizabetca, huahuaguta na tarij huarmimi carca. Chashnami paicunaca, huahua illaj ishcandi rucuyanajurca.

⁸ Zacarías cura puracunaca, Taita Diospaj ñaupajpi paipajta rurana punllapimi, cashna tucurca:

⁹ Imata ruranata ñucapaca urman nishpami, suerteta ruranata curacunaca yacharca. Chashna ruranajujpimi Zacariaspaca, Jatun Diospaj huasi ucuman yaicushpa, altarpi inciensota cushnichina urmarca.

¹⁰ Inciensota cushnichijujpica, tucuilla gentecunami Diosta canllapi mañanajurca.

¹¹ Chaipica, Jatun Dios cachamushca shuj angelmi, inciensota cushnichina altar ali ladoman ñapash shayarishpa, Zacariasman ricurirca.

¹² Chai angelta Zacarías ricushpaca, ninandami manllarishpa musparirca.

¹³ Shina manllarijujpimi angelca, cashna nirca: —Zacarías, ama manllarichu. Can mañashcataca, Taita Diosca uyashcami. Shinamandami, cambaj huarmi Elisabetca, shuj jari huahuaguta ungunga. Chai huahuagutaca, Juandami shutichingui.

¹⁴ Chai huahuaguhuanga, ninandapachami cushijungui. Chai huahuagu huacharishcamandaca, ashtacacunami ninanda cushijunajunga.

¹⁵ Paimanmi Taita Diosca, ninan ushaita caranga. Paica, vinotapash, sidratapash na ufiangachu. Paica, mamapaj vijsapi cajpillata, Diospaj jucha illaj Espíritu jundami canga.

¹⁶ Shina cashpami ashtaca israelcunata, paicunata Mandaj Taita Diospajman tigrarichun yachachijunga.

¹⁷ Taita Diosca, paipaj Espiritutapash, paipaj ushaitapash Eliasman carashcashnami, Juanmambash caranga. Shina cashpami Jatun Diospaj punda shamushpa, taitacunapaj shungutaca huahuacunata juyachun alichinga. Shinallata na cazujcunatapash, imatapash cashcatapacha rurajcunashna aligutapacha yarishpa purichunmi yachachijunga. Chashna rurashpami, Quishpichij shamujpica, alipacha chasquinalla shuyanajuchun, gentecunataca alichijunga— nijurcami.

¹⁸ Shina nijpimi Zacariasca, angelta cashna nishpa tapurca: —Can villajushca pactanataca, ¿imata ricushpata yachapasha? Ñucapash rucumari cani, ñuca huarmigupash ña payagumari— nircami.

¹⁹ Shina nijpi ángel tigrachishpaca, cashnami nirca: —Ñucami, Taita Diospaj ñaupajpi shayaj Gabriel cani. Paimi, canman cai ali mushuj villanacunata villachun cachamuhuarca.

²⁰ Paillatami, pai munashca punllapi pactachimunga. Ñuca villajpi can na crishcamandami, canga huahua huacharingacaman, na rimai ushashpa upa tucugringui— nircami.

²¹ Zacariasta canllapi shuyanajuj gentecunaca: —¿Imashpata Diospaj huasi ucumandaca, na ucha llujshimun?— nishpami manllarinajurca.

²² Diospaj huasi ucumanda llujshimushpa, na rimai ushajpica, ucupimi imapash muscuipishna ricurishcanga ninajurcami. Chashna upa cashpami, maquihuan ricuchishpalla villajurca.

²³ Diospajta rurana punllacuna tucurijpica, Zacariasca huasiman tigrarcallami.

²⁴ Chai punllacunapaj jipami, paipaj huarmi Elisabetca, vijsayu tucurca. Chai huarmica, maimambash na llujshishpa, picha quillacaman huasi ucupilla tiajushpami, cashna nijurca:

²⁵ —Pipash ama ashtahuan nalicachishpa ricuhuachunmi, Jatun Diosca cunambira llaquishpa, chashna carahuashca— nijurcami.

Jesús huacharimunatami, ángel villashca

²⁶ Sucta quillapimi ángel Gabrieltaca, Galilea llactapi tiaj Nazaret shuti puebloman, Taita Diosca cachamurca.

²⁷ Chai angelmi, jarihuan nara tacarishca María shuti cuitsaguman villangapaj shamurca. Chai cuitsaguca, ñaupa taita Davidpaj mirai José shuti runahuanmi, cazarangapaj ari nirishcalla carca.

²⁸ María tiajuj huasi ucuman yaicushpaca, angelca cashnami nirca: —¡Diosmi candaca ninanda juyajun, cushijui! Jatun Diosca canhuanmi. Canga, huarmi puracunapica, bendiciai tucushcami cangui— nircami.

²⁹ Ashtahuangarin Mariaca, angelta ricushpaca chashna nijpimi: “¿Imashpashi cashna nihuan?” yashpa, ninanda manllarirca.

³⁰ Shinamandami angelca, cashna nirca: —María, ama manllarichu. Canga, Taita Diospaj ñaupajpica alimi ricurishcangui.

³¹ Cunanga, vijsayu tucushpami, shuj jari huahuaguta ungugringui. Chai huahuagutaca, JESÚS shutita shutichingui.

³² Paica, ninan ushaita charijmi canga. Paitaca: ‘Jahua pachapi causajuj Diospaj Churimi cangui’ ninajungami. Mandaj Taita Diosca paimanmi, paipaj ñaupa taita David mandashpa tiajushcataca cunga.

³³ Paimi, Jacobopaj mirai israelcunataca, causaita causaicaman mandajunga. Pai mandanaca, napacha tucuringachu— nijurcami.

³⁴ Shina nijpimi angeltaca, Mariaca cashna nirca: —¿Imashnata chashnaca cangayari? Nara cusayu canica— nircami.

³⁵ Shina nijpimi ángel tigrachishpaca, Mariataca cashna nirca: —Diospaj jucha illaj Espíritu cambajman cachamunga. Jahua pachapi causajuj Diospaj ninan ushaihuanmi candaca, fuyushna llandunga. Shinamandami, Jucha Illaj Huahuaguta ungungui. Paitaca: ‘Taita Diospaj Churimi cangui’ ninajungami.

³⁶ Ricui, cambaj familiapura Elisabetpash, paica paya cashpapash, jari huahuagutami ña sucta quillata vijsayu tucushca. Paitaca: ‘Huahuata na tarinata yachaj huarmimi’ ninajunmi carca.

³⁷ Taita Diospaca, imata na rurai ushanllapash na tianllu— nijurcami.

³⁸ Shina nijpimi Mariaca, cashna nirca: —Ricui, Jatun Diosta servijca, caipimi capani. Can villashcashna, Diosca ñucaman carahuachun— nircami. Shina nijpimi angelca, paipaj ñaupajmanda anchurishpa rirca.

Elisabet huarmiguta ricungapaj, María rishcatami villajun

³⁹ Chai punllacunallatami, Judá llacta urcupi tiaj puebloman Mariaca rijurca.

⁴⁰ Chai puebloman chayashpaca, Zacariaspaj huasiman yaicushpami, Elisabet huarmigutaca: “¿Alillachu tiajupangui?” nirca.

⁴¹ Elisabet huarmiguta María alillachu tiajupangui nijhuanmi, Elisabetpaj vijsa ucupi huahuaguca cuyurirca. Elisabetca, Diospaj jucha illaj Espíritu jundashcami carca.

⁴² Shina cashpami Mariataca shinllita rimashpa, cashna nijurca: —Candaca, tucui huarmicunatapash yalitami, Diosca bendiciashca. Paillatami, cambaj vijsa ucupi huahuagutapash bendiciashca.

⁴³ Canga, ñucata Mandajpaj mamami capangui. ¿Imashpata ñucatara ricungapaj shamuhuangui?

⁴⁴ Can alillachu tiajupangui nijhuanmi, ñuca vijsa ucupi huahuaguca, cushijushpa cuyurirca.

⁴⁵ Canman villachun Jatun Dios cachamushcataca, pactachinapacha cashcata crishpami, ninanda cushijungui— nijurcami.

⁴⁶ Shina nijpimi Mariaca, cashna nijurca: “Ñucaca tucui almahuanmi, Jatun Diostaca ninanda jatunyachijuni.

⁴⁷ Ñuca espiritupash, ñucata Quishpichij Taita Dioshuanmi ninanda cushijun.

⁴⁸ Diosta servij ñuca na valigutaca, ninandami llaquihuashca. Cunanmandapachami ñucataca, tucui jipa miraicunapash alicachi tucushcami ninajuhuanga.

⁴⁹ Tucui Ushaita Charij Diosmi, ñucapi tucuita cashna juyailla rurahuashca. Paipaj shutica, jucha illajmi.

⁵⁰ Paita manllajcunapaca, pai llaquinaca mirai miraicunacamanmi.

⁵¹ Diosca, paipaj ninan ushaihuanmi juyailla rurashca. Shungupi jatun tucushpa jariyajcunataca, maitapashmi cachashca.

⁵² Ninan ushaita charijcunataca, paicuna mandashpa tiajujmandapash anchuchishpami, na jariyashpa causajcunatara jatumbi churashca.

⁵³ Ninanda yarjachishpa purijcunamambash, imagutapash llashajtami carashca. Ashtahuangarin ninan charijcunataca, imapash illajtami cachashca.

⁵⁴ Paita servij israelcunatami, paicunata llaquij cashcata yarishpa ayudarca.

⁵⁵ Shina llaquinatami, ñucanchi ñaupa taita Abrahamman, paipaj miraicunamambash, causaita causaicaman yarijushallami nishpa villajurca” nijurcami.

⁵⁶ Mariaca, quimsa quillatashnami, Elisabetpaj huasipi causajushpa, paipaj huasiman cutin tigrarca.

Bautizaj Juan huacharishcatami villajun

⁵⁷ Ña unguna punlla pactajpimi Elisabetca, shuj jari huahuaguta ungurca.

⁵⁸ Taita Diosca paita jatunyachishpa, ninanda llaquishpa carashcata yachashpami, ladolla causajcunapash, familiacunapash, Elisabethuan ninanda cushijunajurca.

⁵⁹ Ña pusaj punlla tucujpimi, cashna tucurca: Huahuaguta circuncisión nishcata rurangapajmi apanajurca. Shina apashpami: —Cai huahuagutaca, paipaj taitatashna Zacariasta shutichishun— ninajurca.

⁶⁰ Shina ninajujpimi, mamaca: —Na chashnaca shutichinachu, Juandami shutichina capan— nirca.

⁶¹ Shina nijpimi paicunaca, cashna ninajurca: —¿Imashpata Juan shutitara munangui? Cambaj familia purapica, shujllapash chashna shutihuanga na tianllu— ninajurcami.

⁶² Paicunaca maquihuan ricuchishpami: —Cambaj huahuagutaca, ¿ima shutitata shutichishun?— nishpa, taitataca tapunajurca.

⁶³ Shina tapujpimi, tablaguta mañashpa: “Cai huahuaguca, Juan shutimi capan” nishpa, paipaj taitaca escribishpa ricuchirca. Chaita ricushpaca, tucuillami ninanda manllarirca.

⁶⁴ Shina rurashpallami Zacariasca, cutin rimai ushashpa, Taita Diostaca ninanda alicachijurca.

⁶⁵ Paipaj ladolla causajcunapash, tucuillami ninandapacha manllarinajurca. Chashna tucushcataca, Judea llactapi tiaj tucuilla urcucunapi causajcunapashmi, chai tucuita ninanda parlanajurca.

⁶⁶ Shina tucushcata uyashpaca: —Chai huahuagu viñashpaca, ¿imashi tucunga?— nishpami, na cungashpa tucuicuna tapurinajurca. Jatun Diosca paipaj ushaihuanmi, chai huahuagutaca cuidajurca.

Dios ima nishcatami, Zacarías villashca

⁶⁷ Juanbaj taita Zacariasca, Diospaj jucha illaj Espíritu junda cashpami, Dios ima nishcata cashna nishpa villajurca:

⁶⁸ “Ñucanchi israelcunata Mandaj Taita Diostaca, aligumi cangui nishunchi. Paimi, pai agllashca gentecunata ricungapaj shamushpa quishpichishca.

⁶⁹ Ninan ushaita charij Quishpichijtaca, paita servij Davidpaj mirai puratami, ñucanchipajman cachamushca.

⁷⁰ Paipajlla causanajushpa, pai ima nishcata villajcunahuan ñaupamandallata imashna villachishcashnallatami cachamushca.

⁷¹ Ñucanchita fiñajcunamanda ñucanchita millanayachi tucui runacunapaj maquimandapashmi quishpichishca.

⁷² Ñucanchi ñaupa taitacunata llaquishpa, paillata ari nishcata na cungashpa pactachingapajmi quishpichishca.

⁷³ Ñucanchi ñaupa taita Abrahamman carashapachami nishpa juramentushpaca, cunambi ñucanchiman carangapajmi, cashna nishca:

⁷⁴ ‘Ñucanchita fiñajcunapaj maquimandaca quishpichishami. Shinamandami ñucataca, na manllashpa servinguichi.

⁷⁵ Ñucanchi huañuna punlla chayangacamanmi, imatapash cashcatapacha rurashpa, ñucapaj ñaupajpica ñucapajlla aliguta causashpa, ñucataca servinguichi’ nishcami.

⁷⁶ Can huahuaguca: ‘Jahua pachapi causajuj Dios ima nishcata villajmi’ nijpimi puringui. Canmi, Jatun Dios cachamujpi shamushpa purichunga, ñanda alichishpa ñaupajungui.

⁷⁷ Shina ñaupashpaca: ‘Diosmi, pai agllashcacunapaj juchacunata anchuchishpa quishpichinga’ nishpami villajungui.

⁷⁸ Ñucanchi Taita Diosca, ninandapacha llaquishpami, indi punchapamba llujshimunshna, jahua pachamanda ñucanchita ricungapaj shamushca.

⁷⁹ Huañunata manllashpa, yana yanapishna causajcunata, michashna punchayachingapajmi, paica shamushca. Casilla ali causaita ñucanchi charichumbash, chai ñanda purichun ricuchingapajmi, paica shamushca” nijurcami.

⁸⁰ Chai huahuaguca, Diosmanda aliguta yachajushpami viñajurca. Israelcunaman villangapaj llujshina punlla chayangacamanmi, jichushca pambacunapi paica causajurca.