LEVÍTICO 1 - Diospaj Shimi

Diosman animalcunata cushpa tucuillata rupachinatami villajun

¹ Mandaj Diosca, paihuan tuparina jatun carpamanda Moisesta cayashpami, cashna nijurca:

² “Israelcunaman, cashna nishpa villangui: ‘Maijambash canguna puramanda, Mandaj Diosman carangapaj apamushpaca, huagrata, na cashpaca llamatami apamunga.

³ Diosman cushpa tucuillata rupachina jari huagrata cushpaca, imapash na tucushca huagratami cunga. Chaitaca, tucui munaihuan apamushpami, Dioshuan tuparina jatun carpa pungupi, Mandaj Diospaj ñaupajpi cunga.

⁴ Tucuillata rupachina chai animalpaj umapi maquita churashpami, Diosman cunga. Shina rurajpimi juchata anchuchingapaj Diosca chasquinga.

⁵ Chai jipami chai shicutaca, Mandaj Diospaj ñaupajpi cungata muchushpa huañuchinga. Yahuartaca, Aaronbaj churi curacunami, Dioshuan tuparina jatun carpa pungu ladopi tiaj altar muyundipi, Diosman cushpa tsirapachinajunga.

⁶ Tucuillata rupachina shicuta lluchushpami, aichataca asha asha cuchushpa chaupinga.

⁷ Aarón curapaj churicunaca, altarpi ninata japichishpami, chai ninapica yamdata aliguta alichishpa churanajunga.

⁸ Chai jipami, Aaronbaj churi curacunaca, fitishca aichacunatapash, umatapash, chunlluli viratapash, altarpi nina rupajuj yamda jahuapi aliguta churanajunga.

⁹ Chunllulicunata, changa aichacunataca yacuhuanmi maillanga. Chaitaca curami, Diosman cushpa altarpi tucuillata rupachinga. Shina cushpa tucuillata rupachijujpimi, Mandaj Diospaca mishquillagu ashnajunga.

¹⁰ Diosman cushpa tucuillata rupachina animalta cushpaca, llamacunamanda cashpa, chivocunamanda cashpapash, imapash na tucushca jari animaltami cunga.

¹¹ Chai animaltaca, altar jahua ladomanmi, Mandaj Diospaj ñaupajpi cungata muchushpa huañuchinga. Chai animalcunapaj yahuartaca, Aaronbaj churi curacunami, altar muyundipi tsirapachinajunga.

¹² Chai animaltaca, asha asha fitishpa chaupishpami umandi, chunlluli viracunandi churanga. Chaitaca, curallatami altarpi nina rupajuj yamda jahuapi aliguta churanga.

¹³ Ucu chunllulicunata, changa aichacunataca, yacuhuanmi maillanga. Chai tucuitaca, curami altar jahuapi churashpa rupachijunga. Shina cushpa tucuillata rupachijujpimi, Mandaj Diospaca mishquillagu ashnajunga.

¹⁴ Mandaj Diosman cushpa tucuillata rupachina alasyu animalcunata apamushpaca urpicunata, na cashpaca palomacunatami apamunga.

¹⁵ Chaitaca curami, Diosman cungapaj altar ladoman apanga. Shina apashpami umata anchuchishpa, chai umataca altarpi rupachinga. Yahuartaca, altar patapimi capinga.

¹⁶ Buchetapash, plumatapash anchuchishpami, chaitaca altar ladopi, uchufata shitana pushtupi, indi llujshimuj ladoman shitanga.

¹⁷ Chai animalcunapaj alasta faquishpapash, na ishcai tucungacaman chaupingachu. Chaitaca curami, altarpi yamda rupajuj jahuapi churashpa rupachinga. Shina cushpa tucuillata rupachijujpimi, Mandaj Diospaca mishquillagu ashnajunga.