JUECES 1 - Diospaj Shimi

Judapaj, Simeonbaj aillucunami Adoni-bezec shuti runata prezu japinajushca

¹ Josué huañushca jipami, cashna tucurca: Israelc unaca, Mandaj Diostami cashna nishpa tapunajurca: “Ñucanchi puramandaca, ¿maijanda cananeocunahuan macanajungapaj, pundaca vichai rina capanchi?” ninajurcami.

² Shina nijpimi Mandaj Diosca, cashna nishpa tigrachirca: “Judá aillurami vichai ringa. Ricuichi, chai llactataca, paicunapaj maquipimi churarcani” nircami.

³ Shina nijpimi Judá ailluca, paicunapaj huauqui Simeón aillutaca, cashna nirca: “Ñucanchiman carashca llactata japingapaj, ñucanchihuan vichai rishpa, cananeocunahuan macanajushunchi. Ñucanchipash, canguna japina llactaman rishunllami” nircami. Shina nijpimi Simeón ailluca, paicunahuan rirca.

⁴ Judá aillu runacuna vichai rijpimi, Mandaj Diosca cananeo nishca, ferezeo nishca gentecunataca, paicunapaj maquipi churarca. Chaimandami pai puramandaca, chunga huaranga runacunata, Bezec shuti pueblopi chugrichishpa huañuchirca.

⁵ Adoni-bezec shuti jatun mandajtapashmi, Bezec shuti pueblopi tuparirca. Paihuambash macanajushpami, cananeo nishca, ferezeo nishca gentecunataca mishanajurca.

⁶ Ashtahuangarin Adoni-bezec shuti runaca, pacajungapajmi calpajurca. Shina calpajujta catishpa japishpami maquimanda, chaquimanda mama dedocunata muchunajurca.

⁷ Shina rurajpimi Adoni-bezec shuti runaca, cashna nirca: “Paicunapaj maquimanda, chaquimanda mama dedocunata muchui tucushca canchis chunga jatun mandajcunami, ñuca meza ucuman urmashca micunata tandachishpa micunajurca. Taita Diosca, ñuca imashna rurashcashnallatami tigrachihuashca” nircami. Chai jipaca, Jerusalenman apajpimi chaipi huañurca.

Judá ailluca, Jerusalén, Hebrón pueblocunatapashmi mishashca

⁸ Judá runapaj miraicunaca, Jerusalenbi causajcunahuan macanajushpami, chai pueblota japinajurca. Chaipi causajcunatapash espadahuan huañuchishpami, chai pueblotaca rupachinajurca.

⁹ Chai jipami Judá runapaj miraicunaca, urcucunapi, Neguev pambapi, jatun pambacunapi causanajuj cananeocunahuan, macanajungapaj urai rirca.

¹⁰ Judá ailluca, Hebrón shuti pueblopi causanajuj cananeocunahuan macanajungapajmi rirca. Chai puebloca pundaca, Quiriat-arba shutimi carca. Chai pueblopimi Sesai, Ahimán, Talmai shuti mandajcunatapash chugrichishpa huañuchirca.

Otonielca, Debir shuti pueblota mishashpami, Acsa shuti huarmihuan cazarashca

¹¹ Chai pueblomandami Judá ailluca, Debir shuti pueblopi causajcunahuan macanajungapaj rirca. Chai puebloca pundaca, Quiriat-sefer shutimi carca.

¹² Chaipimi, Caleb shuti runaca cashna nirca: “Quiriat-sefer shuti pueblopi causajcunahuan macanajungapaj yaicushpa, chai pueblota maijambash quichujpica, Acsa shuti ñuca ushitami, paipaj huarmi cachun cusha” nircami.

¹³ Chai pueblotaca, Cenaz shuti runapaj churi Otonielmi japirca. Cenaz shuti runaca, Caleb shuti runapaj jipa huauquimi carca. Chashna japijpimi Caleb runaca, Acsa shuti paipaj ushitaca, Otoniel runapaj huarmi cachun curca.

¹⁴ Otoniel runaca, paipaj huarmi paihuan ña rijujpimi paipaj taitata, alpata mañagrichun ari nichirca. Shina nijpimi chai huarmica, paipaj burromanda uriajurca. Shina uriajujpimi, Caleb runaca: “¿Imatata ningui?” nishpa tapurca.

¹⁵ Shina tapujpimi chai huarmica, cashna nishpa tigrachirca: “Ñuca mañashcata carahuayari. Neguev pambapica, ñami alpacunata carahuarcangui. Shinallata pugyu yacu tiaj alpacunatapash carahuayari” nircami. Shina mañajpimi Caleb runaca janajmambash, uramambash pugyucuna tiaj alpacunata cararca.

Judapaj, Benjaminbaj aillucunaca, ashtahuanmi alpacunata japishpa catinajushca

¹⁶ Moisespaj suedro, ceneopura runapaj churicunami, palmera quirucuna tiaj pueblomandaca, Judá llactapi tiaj jichushca pambaman, Judá runapaj miraicunahuan vichai rirca. Chai pambaca, Arad shuti pueblo ladollapi tiaj Neguev shuti pambapimi carca. Paicunaca, chaipi causanajuj gentecunahuan chaipi causangapajmi quedarca.

¹⁷ Judá ailluca, paicunapaj huauqui Simeón ailluhuan rishpami, Sefat shuti pueblopi causanajuj cananeocunata mishashpa, llaquinayaita tucuchirca. Chaimandami chai pueblotaca, Horma nishpa shutichirca.

¹⁸ Judá ailluca: Gaza shuti pueblotapash, chai muyundi llactandi, Ascalón shuti pueblotapash, chai muyundi llactandi, Ecrón shuti pueblotapash, chai muyundi llactandimi japirca.

¹⁹ Mandaj Diosca, Judá ailluhuanmi carca. Paimi, urcucunapi causajcunataca llujchishpa cacharca. Ashtahuangarin jatun pambacunapi causajcunataca, jirru carretacunata charijpimi, na llujchishpa cachai ushanajurca.

²⁰ Moisés imashna villashcashnallatami, Hebrón shuti pueblotaca, Caleb runaman curca. Chai pueblomandami paica, Anac shuti runapaj quimsa churicunata llujchishpa cacharca.

²¹ Ashtahuangarin Benjamín ailluca, Jerusalenbi causanajuj jebuseocunataca, na llujchishpa cacharcachu. Chaimandami jebuseocunaca, Benjamín ailluhuan Jerusalenbi cunangaman causanajun.

Josepaj ailluca, Bet-el shuti pueblotami mishashca

²² Josepaj huasi ucu purapashmi, Bet-el shuti pueblopi causajcunahuan macanajungapaj vichai rinajurca. Mandaj Diosca, paicunahuanmi carca.

²³ Josepaj huasi ucu puracunaca, Bet-el shuti pueblopimi pacalla ricujcunata churarca. Chai puebloca pundaca, Luz shutimi carca.

²⁴ Chai pacalla ricujcunaca, pueblomanda shuj runa llujshijujta ricushpami, tuparishpa cashna ninajurca: “Cunanga, cai puebloman maita yaicunata ñucanchiman ricuchi. Shina ricuchijpica, candaca llaquishpa na huañuchishunllu” ninajurcami.

²⁵ Shina nijpimi chai runaca, chai puebloman maita yaicunata ricuchirca. Chaimandami paicunaca, chai pueblopi causajcunataca, espadahuan chugrichishpa huañuchinajurca. Ashtahuangarin chai runatallami, paipaj tucui familiacunandi llujshishpa richun saquirca.

²⁶ Chai runaca, heteocunapaj llactaman rishpami, shuj pueblota shayachirca. Chai pueblotaca, Luz shutitami shutichirca. Cunangaman chai shutihuanllatami.

Manasespaj, Efrainbaj aillucunapash ashtahuanmi alpacunata japishpa catinajushca

²⁷ Manasés aillupashmi, Bet-seán, Taanac, Dor, Ibleam, Meguido shuti pueblocunapi causajcunatapash, chai pueblocunapaj muyundi uchilla llactacunapi causajcunatapash, na llujchishpa cachai usharca. Chaimandami cananeocunaca, chai llactapillata causashpa catinajun.

²⁸ Shina cajpipash israelcunaca, ashtahuan shinlli tucushpami cananeocunataca, impuestota cuchun mandashpa charirca. Ashtahuangarin chaimanda llujchishpa cachaitaca na usharcachu.

²⁹ Efraín aillupash, Gezer shuti pueblopi causanajuj cananeocunataca, na llujchishpa cachai usharcachu. Ashtahuangarin cananeocunaca, paicunapaj chaupipillatami Gezer shuti pueblopi causanajurca.

Chaishuj aillucunapash, ashtahuanmi alpacunata japishpa catinajushca

³⁰ Zabulón aillupash, Quitrón shuti, Naalal shuti pueblocunapi causanajuj cananeocunataca, na llujchishpa cachai usharcachu. Ashtahuangarin paicunapaj chaupipillatami causanajurca. Paicunataca, impuestota cuchun mandashpami charirca.

³¹ Aser aillupash: Aco, Sidón, Ahlab, Aczib, Helba, Afec, Rehob shuti pueblocunapi causanajuj cananeocunataca, na llujchishpa cachai usharcachu.

³² Llujchishpa cachaita na ushashcamandami, Aser ailluca chai llactapi causanajuj cananeocunahuanllata causanajurca.

³³ Neftalí aillupash, Bet-semes shuti, Bet-anat shuti pueblocunapi causanajuj cananeocunataca, na llujchishpa cachai usharcachu. Ashtahuangarin chai llactapi causanajuj cananeocunahuanllatami causanajurca. Bet-semes shuti, Bet-anat shuti pueblocunapi causaj cananeocunataca, impuestota cuchun mandashpami charirca.

³⁴ Amorreocunaca, Dan aillupaj miraicunataca urcucamanmi catinajurca. Shina catishpami, jatun pambacunaman urai richunga na saquinajurca.

³⁵ Shinamandami amorreocunaca, Heres shuti urcupi, Ajalón shuti, Saalbim shuti pueblocunapi causashpa catinajurca. Shina cajpipash Josepaj huasi ucu puracunaca, ashtahuan shinlli tucushpami amorreocunataca, impuestota cuchun mandashpa charirca.

³⁶ Amorreocunapaj linderoca, Acrabim shuti vichai urcumanda, Sela shuti pueblo jahuacamanmi carca.