JUAN 1 - Diospaj Shimi

Dios Rimashca Shimi nishcami, Aichayu tucushca

¹ Callaripica, Dios Rimashca Shimi nishcami ña tiarca. Chai Shimi nishcami, Taita Dioshuan causajurca. Chai Rimashca Shimica, Diosllatami carca.

² Callaripica, paica ñami Taita Dio shuan causajurca.

³ Ima tiachumbash paihuanllatami, Diosca tucuita rurarca. Ima tiachun churashcapash, paihuanllatami rurarca.

⁴ Paipimi causaica tiarca. Chai causaimi, tucuilla gentecunata punchayachij micha carca.

⁵ Chai michami, yana yana tutapishna causajcunataca punchayachijun. Chai yana yanataca, chai michata mishashpa yanayachitaca na usharcachu.

⁶ Taita Dios cachamushca shuj runami tiarca. Paica, Juan shutimi carca.

⁷ Paimi, chai michamanda villachingapaj shamurca. Chai michata tucuicuna crichunmi villachijurca.

⁸ Juanga, na chai michachu carca. Ashtahuangarin michamanda villajuchunmi, paita cachamushca carca.

⁹ Tucuilla gentecunata punchayachij michagupachami, ña cai pachaman chayamujurca.

¹⁰ Chai Rimashca Shimica, cai pachapimi carca. Cai pachatapash, paihuanllatami rurashca carca. Ashtahuangarin cai pachapi causajcunaca, paitaca na rijsircachu.

¹¹ Pai rurashca gentecunapajman shamujpipash, pai rurashca gentecunaca na chasquircachu.

¹² Ashtahuangarin tucui paita chasquishpa, paita crijcunataca, Taita Diospaj huahuacuna cachunmi ushaita cararca.

¹³ Paicunaca yahuarmanda, aichamanda, runapaj munaimanda huacharishcacunaca na canllu. Ashtahuangarin paipaj huahuacuna cachun, Taita Dios munashcacunami can.

¹⁴ Chai Rimashca Shimi nishcami, aichayu tucushpa ñucanchihuan causajurca. (Taita Diospaj shujlla Churitaca, paishnallata ushaita charijta, punchapambagu cajtapashmi ricurcanchi). Paica, ninanda juyaj, napacha llullajmi carca.

¹⁵ Juanga, paimandami caparishpa cashna nishpa villachijurca: “Paimandami cashna nijurcani: ‘Ñucapaj jipami shamunga. Paica, ñucapaj pundallatami causajurca’ nijurcanimi” nishpami villachijurca.

¹⁶ Tucui imatapash pai charishpa ninanda juyajujpimi, ñucanchica ashtahuan ashtahuan japinajurcanchi.

¹⁷ Diosca, pai mandashca shimicunataca, Moisesman cushpami ñucanchiman curca. Ashtahuangarin ninan juyaihuan, na llullaj shimihuanga Jesucristomi shamurca.

¹⁸ Taita Diostaca, pipash ima horallapash na ricushcachu. Paipaj Taitahuan tiajuj paipaj shujlla Churimi, paitaca rijsichirca.

Bautizaj Juanmi, Jesucristomanda villachijushca

¹⁹ Judiocunaca, curacunata, levitacunatami Bautizaj Juanda: —¿Quiquinga pita capangui?— nishpa tapuchun, Jerusalenmanda cachamurca. Shina cachamujpi, villachishca shimicunami caipica tiajun.

²⁰ Paica villachircallami, paica: —Ñucaca, na Quishpichij Cristo canichu— nishpami villachirca.

²¹ Paicunaca, cutinmi cashna nishpa tapurca: —Shina cashpaca, ¿pita capangui? ¿Quiquinllu Elías cangui?— nijpimi Juanga: —Na chaichu cani— nirca. Shina nijpi, paicuna cutin tapushpaca: —¿Quiquinllu Dios ima nishcata villachij capangui?— ninajurcami. Shina nijpimi: —Na chaichu cani— nishpa tigrachirca.

²² Shina nijpica paicunaca, cashna nishpami tapunajurca: —¿Shinaca maijanda capangui? Maijan cashpapash villachillayari. Imata tigrachishcatapash, ñucanchita cachamushcacunaman villachinapachami canchi— ninajurcami.

²³ Shina nijpimi Juanga, cashna nijurca: —Ñucaca, Dios ima nishcata villachij Isaías villachishca shinallata cani: ‘Jatun Diosman ñanda alichipaichi’ nishpa caparishpa, jichushca pambapi villachij runallami cani— nijurcami.

²⁴ Fariseocunami paicunataca cachashca carca.

²⁵ Paicunami Juandaca, cashna nishpa tapunajurca: —Quiquinga, Quishpichij Cristopash, Eliaspash, Dios ima nishcata villachijpash na cashpaca, ¿imashpata cashna bautizajungui?— nishpami tapunajurca.

²⁶ Shina nijpimi Juanga, cashna nishpa tigrachirca: —Ñucami yacupilla bautizajuni. Ashtahuangarin quiquinguna purapimi, quiquingunapash na rijsishca shuj runagu tian.

²⁷ Paimi, ñucapaj jipa shamushpapash, ñaupamandapacha ña tiashca. Shinamandami, paipaj chaquipi churajushpa huatarishcata pascangapajllapash nali cani— nijurcami.

²⁸ Jordán shuti yacu chimbapillami, Betábara shuti uchilla pueblogupi, chashna tapunajurca. Chaipimi Juanga bautizajurca.

Taita Diospaj Llamagumandami villachijun

²⁹ Chai cayandi punllami Juanga, Jesús paipajman shamujujta ricushpa cashna nijurca: —Ricuichi, Taita Diospaj Llamaguca chaipimi capan. Paimi, cai pachapi causajcunapaj juchata anchuchin.

³⁰ Paimanda villachijushpami, cashna nijurcani: ‘Ñucapaj jipaca, shujmi shamunga. Paica, ñucapaj pundami carca. Paica, ñucapaj pundallatami causajurca’ nijurcanimi.

³¹ Paitaca, ñucapash na rijsircanichu. Ashtahuangarin israelcuna rijsinajuchunmi, yacupi bautizangapaj shamurcani— nircami.

³² Shinallata Juanga, pai ricushcatami cashna nishpa villachijurca: —Jahua pachamanda Diospaj Espiritumi, palomagushna urai shamushpa, paipaj umapi tiarishpa quedajta ricurcani.

³³ Ñucapash paitaca na rijsircanichu. Ashtahuangarin yacupi bautizachun ñucata cachamuj Diosmi, cashna nihuarca: ‘Ñucapaj Espíritu urai shamushpami, umapi tiarishpa quedanga. Chaita ricushpami, jucha illaj Espirituhuan pai bautizanata yachangui’ nihuarcami.

³⁴ Chaitaca ricurcanimi. Chaimandami: ‘Caimi, Taita Diospaj Churi capan’ nishpa, quiquingunaman villachijuni— nircami.

Jesuspaj callari yachajujcunamandami villachijun

³⁵ Chai cayandi punllami Juanga, paipaj yachajuj puramanda ishcaihuan chaipillata cutin shayajurca.

³⁶ Jesús chaita yalijujta ricushpami Juanga: —Ricuichi, caimi Taita Dios cachamushca Llamagu capan— nijurca.

³⁷ Shina nijujta uyashpami, chai ishcai yachajujcunaca, Jesusta catishpa rinajurca.

³⁸ Paicuna catishpa rinajujpi, Jesús tigrarishpa ricushpami: —¿Imatata mascanguichi?— nirca. Shina nijpimi paicunaca: —Rabí, ¿maipita causajungui?— ninajurca. (Rabí nishpaca, Yachachij nijunmi).

³⁹ Shina tapujpimi, Jesusca: —Jacuchi, rijsinguichi— nirca. Shina nijpi rishpami, pai maipi causajujtaca rijsinajurca. Ña chishajujpimi, paicunaca chai punllapica, Jesushuan chaipi quedanajurca.

⁴⁰ Chai ishcandimi, Juan chashna villachijujta uyashpaca, Jesusta catishpa rinajurca. Chai ishcai puramanda shujca, Simón Pedropaj huauqui Andresmi carca.

⁴¹ Andresca, paipaj huauqui Simonda punda tuparishpaca: —Mesiashuanga ñami tuparircanchi— nircami. (Mesías nishpaca, Quishpichij Cristo nijunmi).

⁴² Andresca, paipaj huauquita tuparishpaca, Jesuspajmanmi pushamurca. Jesús paita ricushpami, cashna nirca: —Quiquinga, Jonaspaj churi Simonmi cangui. Cunanmandaca, Cefas shutimi cangui— nircami. (Cefas nishpaca, Pedro nijunmi).

Felipe shuti, Natanael shuti runacunatami Jesusca cayachishca

⁴³ Chai cayandi punllami Jesusca, Galilea llactaman ringapaj munarca. Felipeta tuparishpaca: —Ñucata catihuai— nircami.

⁴⁴ Felipeca, Betsaida shuti pueblomandami carca. Andrespash, Pedropash chai pueblomandallatami carca.

⁴⁵ Natanael runata Felipe tuparishpaca, cashnami nirca: —Mandashca shimita Moisés escribishcapipash, shinallata Dios ima nishcata villachijcuna escribishcapipash villachij runatami tuparishcanchi. Paimi, Nazaret pueblomanda Josepaj churi Jesús capan— nircami.

⁴⁶ Shina nijpimi Natanael runaca, cashna nirca: —Nazaret pueblomandaca, ¿ima alipash llujshingachu?— nijpimi, Felipeca: —Shamui, ricungui— nirca.

⁴⁷ Jesusca, Natanael runa paipajman shamujujta ricushpami: —Ricuichi cai runaguca, Israel runapacha cashpami, umachinataca na yachan— nijurca.

⁴⁸ Shina nijujpimi, Natanael runaca: —Ñucataca maipita rijsihuarcangui?— nirca. Shina nijpimi Jesusca, cashna nishpa tigrachirca: —Felipepash quiquinda nara jacu nijpillatami, jigos yura ucupi tiajujta quiquindaca ricujurcani— nircami.

⁴⁹ Shina nijpimi Natanael runaca, cashna nishpa tigrachirca: —Rabí, quiquinga Taita Diospaj Churimi capangui. Quiquinga israelcunata Jatun Mandajmi capangui— nijurcami.

⁵⁰ Shina nijujpimi Jesusca, cashna nijurca: —Quiquindaca: ‘Jigos yura ucupi tiajujtami ricurcani’ ¿nijpillachu crihuangui? Na caitalla ricunguichu, ashtahuan caitapash yali imata ruraitapash ricunguirami.

⁵¹ Napacha llullashpami, quiquingunataca cashna nini: Cunanmandapachami, jahua pacha pascarishcata ricunguichi. Shinallata Runa Aichayu tucushca ñucapajman, Taita Dios cachamujpi angelcuna jahuaman rinajujta, uraiman shamunajujtami ricunguichi— nijurcami.