JOEL 1 - Diospaj Shimi

Langosta jurucunami, granocunata micushpa tucuchishca

¹ Mandaj Diosca, Petuel shuti runapaj churi Joel runagumanmi, cai shimicunata cashna nishpa villarca:

² “Mandaj rucucunapash, cai llactapi tucui causajcunapash, caita ali uyaichi: ¿Canguna causajui punllacunapi, na cashpaca cangunapaj ñaupa taitacuna causajui punllacunapica, cashna llaquicuna tucushcachu?

³ Caicunataca, cangunapaj huahuacunamanmi villana canguichi. Paicunapash, paicunapaj huahuacunamanmi villanajunga. Chai huahuacunapash, paicunapaj miraicunamanmi villanajunga.

⁴ Oruga nishca jurucuna puchuchishca granocunataca, saltón nishca jurucunami micurca. Saltón jurucuna puchuchishcataca, revoltón nishca jurucunami micurca. Revoltón jurucuna puchuchishcataca, langostacunami tucuchirca.

⁵ Machajcuna, rijcharishpa huacaichiyari. Vinota ufiajcuna, llullu vino tucurishcamandaca, ninanda caparishpa tucuicuna huacaichiyari. Vinotaca, cangunapaj shimimandami quichushca.

⁶ Maitapash na cuentai ushanalla, ninan shinlli runacunami, ñuca llactaman vichai shamurca. Paicunapaj quirucunaca, ñaupaj lado quirucunapash, juchu quirucunapash, leonbaj quirucunashnami.

⁷ Ñuca uvas chagracunataca llaquinayaita tucuchishpami, ñuca jigos yuracunatapash, lluchushpa saquirca. Llaquinayaita lluchushpami, urmachishpa saquirca. Malquicunapash, yurajlla caspicunallami quedarca.

⁸ Chairalla viñai cuitsa cajpi cusa tucuna huañushcamanda cañamuta churajushpa, chairalla viñai cuitsa huacanshna huacayari.

⁹ Mandaj Diospaj huasimandaca, Diosman imata caranapash, talina vinopashmi chingarca. Chaimandami, Mandaj Diosta servij curacunaca, llaquirishpa huacanajun.

¹⁰ Pambacunapash, llaquinayaitami tucuchi tucurca. Trigopash tucurijpi, llullu vinopash chaquijpi, aceitepash chingajpimi, pambacunaca llaquilla tucurca.

¹¹ Alpapi imatapash rurajcunapash, pingai tucuichiyari. Uvasta tarpujcunapash, aij nishpa huacaichiyari. Trigomanda, cebadamandapash huacaichiyari. Pambapi cozechanaca, tucuillami chingashca.

¹² Uvas chagracunapash chaquishcami. Jigos yuracunapash tucurishcami. Granadilla yuracuna, palmera yuracuna, manzana yuracunapashmi chaquishca. Alpapi tiaj tucui yuracunapash chaquishcami. Shinami, huañuna aichayu runacuna cushijunaca tucurishca.

¹³ Curacunapash, chumbilishpa huacaichiyari. Altarpi rupachishpa servijcunapash, aij nishpa huacaichiyari. Ñuca Taita Diosta servijcuna, cañamuta churajushpa puñuj shamuichiyari. Cangunapaj Taita Diospaj huasimandaca, imata caranatapash, talina vinotapash anchuchishcami.

¹⁴ Na micushpa tandanajuchun villaichiyari. Mandaj rucucunatapash, cai llactapi tucui causajcunatapash, cangunata Mandaj Taita Diospaj huasiman tandachishpa, Mandaj Diosta caparishpa mañaichiyari.

¹⁵ ¡Aij, Mandaj Dios shamuna punllapash ñami pactamujun! Tucui Ushaita Charij Dios ninanda llaquichina punllami, ña chayamujun.

¹⁶ ¿Nachu ñucanchi micunatapash, ñucanchi Taita Diospaj huasipi ninanda cushijunatapash, ñucanchi ricujta quichurca?

¹⁷ Granocunaca, alpa ucupillatami ismushpa tucurirca. Trigo chaquishcamandami, granota tandachinacunapash jichushca quedarca. Granota alichina ucucunapash, tucuchi tucurcami.

¹⁸ ¡Animalcunaca llaquinayaitamari huacanajurca! ¡Huagracunaca, jihua na tiajpimari, caita chaita mascashpa purinajurca! Shinallata ashtaca llamacunapash, yarjaimandami huañunajurca” nijurcami.

¹⁹ Mandaj Dioslla, candallami caparishpa mañasha. Jichushca pambapi viñashca jihuacunataca, ninami tucuchirca. Pambapi tiaj yuracunatapash, rupajuj ninami tucuchirca.

²⁰ Jatun larca yacucunapash chaquircami, jichushca pambacunapi tiaj jihuacunatapash, ninami tucuilla rupachirca. Chaimandami, sachacunapi causaj animalcunapash huacashpa, can Diosman villanajunga.